Elder Massimo De Feo

General Authority Seventy

Sa wala pa madawat ang iyang full-time nga tawag sa pagmisyon, nakakat-on si Elder Massimo De Feo og mahinungdanong mga leksyon sa sakripisyo ug gugma gikan sa iyang papa, si Vittorio De Feo.

Ang pamilyang De Feo diyutay ra og kapanguhaang pinansyal, ug dili mga miyembro sa Simbahan si Vittorio ug ang iyang asawa, si Velia. Apan ang mas tigulang nga De Feo mitahud sa tinguha sa iyang anak nga mopakigbahin sa ebanghelyo.

“Nangutana ang akong papa, ‘Gusto ba gyud ka nga mobuhat niini?’” nahinumdom si Elder De Feo. “Miingon ko, ‘Oo, sa tibuok nakong kasingkasing gusto kong moserbisyo sa Ginoo.’”

Misaad si Vittorio nga buhaton niya ang tanan aron makabayad sa mga galastuhan sa iyang anak sa duha ka tuig nga pagserbisyo sa Italy Rome Mission.

“Gikonsiderar nako kadtong kwartaha nga sagrado—bunga kadto sa talagsaong sakripisyo gikan sa tawo nga wala motuo sa Simbahan,” miingon si Elder De Feo. “Mao nga mialagad ko og misyon sa tibuok nakong kasingkasing, gahum, hunahuna, ug kusog tungod kay akong gihigugma ang Ginoo ug gihigugma nako ang akong amahan.”

Ang mga baruganan sa ebanghelyo sama sa sakripisyo, pagkugi, pamilya, ug pag-alagad nakatabang sa paghulagway unsa si Elder De Feo.

Natawo sa Taranto, Italy, niadtong Disyembre 14, 1960, nahibaloan ni Massimo De Feo ang mahitungod sa Simbahan sa edad nga siyam dihang ang duha ka misyonaryo nanuktok sa iyang balay. Si Massimo ug ang iyang magulang nga lalaki, si Alberto, nabunyagan sa wala madugay.

Ang mga batang De Feo nalipay sa gugma ug suporta sa mahalarong mga lider sa branch dihang nanambong sila og Primary ug, wala madugay, sa Mutual. Nakakaplag usab si Massimo og mahangturong mga higala nga mga kabatan-onan sa branch—lakip ang kauban nga kinabig si Loredana Galeandro, kinsa iyang gipakaslan human sa iyang misyon. Na-seal sila niadtong Agosto 14, 1984, sa Bern Switzerland Temple. Ang De Feos adunay tulo ka anak.

Sa wala pa mahimong General Authority Seventy, si Elder De Feo nagpuyo sa Roma ug nagtrabaho kapin sa 30 ka tuig sa U.S. State Department. Nakaserbisyo siya isip branch president, district president, stake president, ug Area Seventy.