Sister Bonnie H. Cordon

Ikaduhang Magtatambag, Kinatibuk-ang Kapangulohan sa Primary

Sa tibuok panahon sa iyang pagkabata sa southeast Idaho, USA, si Bonnie Hillam Cordon nakakat-on og daghang importante nga leksyon sa kinabuhi. Ang pagtrabaho, pagdula, ug pagpuyo sa umahan nagtudlo kaniya og self-reliance, kakugi, ug “dili mahadlok nga mosulay og mga butang,” miingon ang ikaduhang magtatambag sa kinatibuk-ang kapangulohan sa Primary.

Ang pinakaimportanting leksyon, bisan pa, naggikan sa iyang mga ginikanan, ni Harold ug Carol Rasmussen Hillam, kinsa mitudlo kaniya nga uban sa tabang sa Ginoo, makahimo siya og bisan unsang butang. “Walay limit,” moingon ang iyang papa.

Misalig si Sister Cordon niana nga kahibalo isip bag-ong natawag nga misyonaryo sa Lisbon, Portugal, naningkamot sa pagkat-on sa pinulongang Portuguese. “Daghang higayon miluhod ko nangayo og milagro. Apan tungod sa akong amahan, akong nakat-unan nga makahimo diay ko og lisud nga mga butang.”

Human sa daghang pag-ampo, buhat, ug pailub, anam-anam siyang nahanas sa pinulongang Portuguese, nga mipanalangin kaniya sa daghang katuigan human niadto dihang siya ug ang iyang bana gitawag nga moserbisyo sa Curitiba, Brazil.

“Maka-interes kon giunsa sa Ginoo nga maandam kita ug mapalig-on, sa hinay-hinay,” miingon siya. “Makahatag kanunay og dugang nga kahulugan kon ato kining masusi pag-usab. Kita kinahanglan lamang magbaton og hugot nga pagtuo.”

Si Bonnie Hillam natawo niadtong Marso 11, 1964, sa Idaho Falls, Idaho. Human sa iyang misyon mieskwela siya og education sa Brigham Young University, sa Provo, Utah, USA. Didto nagkasuod sila ni Derek Lane Cordon. Milambo ang ilang panaghigalaay ngadto sa panaghigugmaay, ug nagminyo sila niadtong Abril 25, 1986, sa Salt Lake Temple. Duna silay upat ka anak—tulo ka lalaki ug usa ka babaye—ug tulo ka apo nga lalaki.

Sulod sa mga katuigan nakaserbisyo sila og daghang mga calling sa Simbahan. Nakaserbisyo siya uban sa iyang bana dihang nangulo siya sa Brazil Curitiba Mission sugod 2010 hangtud 2013, ug nakaserbisyo siya isip Young Women president sa stake, nursery leader, ug seminary teacher, ug sa mga organisasyon sa Young Women sa ward, Relief Society, ug Primary.

Sa bag-o niyang assignment, miingon si Sister Cordon nga gipanghinaot niya nga makatudlo og usa ka mahinungdanong kamatuoran ngadto sa mga bata sa Primary sa Simbahan: “Ang Langitnong Amahan nahigugma kanila.”