Kahupayan sa Refugee: “[Usa ko ka Estranghero]”

Uban sa pagtugot sa Unang Kapangulohan, ang kinatibuk-ang mga kapangulohan sa Relief Society, Young Women, ug Primary nagdapit sa mga kababayen-an sa tanang edad sa pagserbisyo sa mga refugee diha sa ilang kasilinganan ug mga lokal nga komunidad pinaagi sa paningkamot sa paghupay nga gitawag og “Usa ko sa Estranghero “(tan-awa sa Levitico 19:34; Mateo 25:35).

“Dunay daghan kanato ang mapanalanginan pinaagi sa paghigalaay, paggiya, ug uban pang Kristohanong gugma ug pagserbisyo,” miingon si Sister Linda K. Burton, kinatibuk-ang presidente sa Relief Society. “Ang paghatag og ingon niini nga pagserbisyo usa ka mahinungdanong bahin sa ebanghelyo.

“Napahinumduman ako sa kasulatan nga nag-ingon nga dili angay nga ‘kamo [maka]hikalimot sa pag-abiabi og mga dumuloong: kay pinaagi niini may nanagpakaamuma og mga manolunda sa wala lang nila hibaloi’ [Mga Hebreohanon 13:2],” miingon si Sister Burton. “Awhagon namo ang mga sister sa pagmainampuon sa pagpangitag mga oportunidad nga makaserbisyo ug pagkonsiderar sa pagpangitag mga paagi nga makasuporta sa kasaligan nga lokal nga komunidad ug sibik nga mga organisasyon. Makakita kamo og mapuslanong mga ideya diha sa IWasAStranger.lds.org, ug mahimo kamong mopakigbahin og mga kasinatian pinaagi sa pagpadala og email ngadto sa [e-mail].”

Sulat gikan sa Unang Kapangulohan mahitungod sa “Usa ko ka Estranghero” gipadala ngadto sa stake, ward, ug branch councils sa katapusan sa Marso. Ang mga sumbanan alang sa mga lider giuban sa sulat. “Ang mga sister mahimong moapil niini nga paningkamot kon ang panahon ug mga kahimtang motugot,” ang sulat nagtambag, “nagsiguro nga walay usa nga ‘modagan nga labaw pa kay sa iyang kusog’ ug ang tanang ‘butang kinahanglan gayud nga mabuhat diha sa kahusay’ (Mosiah 4:27).” Sulat sa Unang Kapangulohan gipetsahan og Oktubre 27, 2015, nag-awhag usab sa tanang miyembro sa paghatag og Kristohanong pagserbisyo ngadto sa mga nanginahanglan.

Sulat gikan sa kinatibuk-ang mga presidente sa Relief Society, Young Women, ug Primary nga naghatag og dugang nga impormasyon mahitungod sa “Usa ko sa Estranghero” bag-o lang usab nga giapud-apod sa mga miting niana nga mga organisasyon.