O le Avea ma se Tamaitai: O Se Vaaiga e Faavavau

Saunia e Sharon Eubank

Faatonu o Auaunaga Alofa a le AAG

Mai i se tautalaga na tuuina atu i le FairMormon Conference i Provo, Iuta, ISA, i le aso 8, o Aokuso, 2014.

Ou te fia faapea atu faalauaitele mai lo’u lava aafiaga e faapea, o lo’u olaga ua tumu ma faamamaluina ma tele ina lelei ona o le talalelei a Iesu Keriso.

O ni tausaga se tele ua mavae, sa faia ai e la’u uo ma lona toalua se aoaoga faaleautaitai i nuu maotua o Ghana, ma ina ua uma sa sau se tamaitai ia te ia ma fai mai ma le ootia lava, “O le ekalesia lenei e mo se tamaitai.” Sa fai atu la’u uo i le tamaitai po o le a le uiga o lana faamatalaga. Sa ia fai mai, muamua lava, “Ua ia i tatou se Aualofa matagofie, ua faapea ona aoao mai ia i tatou e uiga i mea faaleagaga ma mea i aso uma ua manuia ai o tatou aiga ma i tatou. Ae o le taimi lava lea, o loo i ai lou alii i le isi potu e sosoo atu o loo aoaoina o matou taitoalua e ao ona latou faia a latou ava ma fanau i le agalelei ma le agamalu. Ua i ai le malumalu, ina ia mafai ona avea ai la’u fanau ua maliliu ma a’u fanau e faavavau. O mea uma lava ou te manao i ai, ou te maua i le ekalesia lenei. O le ekalesia lenei e mo se tamaitai.”

Pe o se ekalesia lenei e mo se tamaitai? Faatasi ai ma ni nai mea malie e ese ai, o lo’u aafiaga patino na tele lava ina maua ai le malosiaga. O lea la, nai lo o le taliina o le fesili mo oe, o le a ou faalagolago lava i mea ua ou molimauina i le lalolagi atoa. E le o a’u o se polofesa, se tagata atamai, po o se sooupu a le Ekalesia. Ae ou te fia tautala faalauaitele atu mai o’u lava aafiaga e faapea, o lo’u olaga ua tumu ma faamamaluina ma tele ina lelei ona o le talalelei ma le Ekalesia a Iesu Keriso o le Au Paia o Aso e Gata Ai.

E mautinoa lava e le o taofiofia ai tamaitai pe i ai ni manatu le aoga e uiga i matafaioi a tamaitai i totonu o le aiga, o le aoaoga faavae a le Ekalesia e uiga i matafaioi o tamaitai i le aiga, Ekalesia, alalafaga, malo ma le malumalu—ma le ala e fesootai ma fegalegalea’i faatasi ai alii ma tamaitai—o le aoaoga faavae aupito talafeagai, mamana, atamai, ma faaosofia ua ou faalogo o tautalagia. O lea ou te faapea atu ai i o’u uso, o mea o loo outou mananao moni i ai i lou matafaioi o se tamaitai, se Kerisiano, o se tagata atamai, o se tagata e faavavau, o loo iinei i le aoaoga faavae a Iesu Keriso ma i le faaaogaina o lena aoaoga faavae i le Ekalesia.

O le Aoaoga Faavae a le Atua ua Tutusa ai Alii ma Tamaitai i a Laua Filifiliga

O le talalelei a Iesu Keriso e faatatau uma i alii ma tamaitai, ma o aoaoga faavae a le Atua e tau fai tali uma atu ai i laua mo a laua filifiliga, ae e leai ni tulaga faatauaina e ese mo tamaitai, ese foi mo alii. E le faatagaina e le Atua ni ponokalafi, mulilua, sauaga mataga, faatamala, faailoga tagata, po o le faalealofa, e tusa lava po o a o tatou itupa.

O lenei foi aoaoga faavae ua aumai ai foi ia i tatou lo tatou malamalama o le mea na tatou o mai ai, aisea ua tatou i ai iinei, ma o fea o loo tatou o i ai. Ua aumai ai lo tatou malamalamaaga i lo tatou itupa o ni tamaitai ma ni alii faapea foi ma o tatou matafaioi o ni afafine ma alii, uso ma tuagane, ava ma tane, ma tina ma tama.¹

Ua aoao mai Elder D. Todd Christofferson o le Korama a Aposetolo e Toasefululua, “Ua faaalia mai e perofeta e faapea, na muai ona tatou ola o ni atamai ma sa tuuina mai ia i tatou ni foliga faatusa, po o ni tino agaga, e le Atua, o lea na avea ai ma Ana fanau agaga—o atalii ma afafine o ni matua faalelagi.”² Sa i ai lava i taimi uma le atamai (tagai MF&F 93:29).

O a’u o se tamaitai. Faatasi ai ma le itupa na oo mai ai foi ni uiga auaumama ma ni tiutetauave faapitoa.

O a’u o se tama teine. O le matafaioi lenei ua faamatala tonu ai, o ai a’u e faatatau i le Atua. E i ai ni o’u matua faalelagi ma ua i ai le aia tatau, o se afafine, e talanoa ai ma le Tama Faalelagi e ala i le tatalo ma ia maua faaaliga e ala i le Agaga Paia.³

O au o se uso. O le uiga o lenei matafaioi, o a’u o se Kerisiano, o se tagata o le Ekalesia, o se uso i le talalelei, o se soo, ma ua ou osia ni feagaiga o le a ou ositaulaga ma faapaia ma auauna ma taitai.

E mafai foi ona ou maua le avanoa i lenei olaga e avea ai o se ava—afai e le o le olaga lenei, e mautinoa lava i le olaga a sau. O le matafaioi lenei o a’u lea e faatatau i se paaga tutusa ua filifilia, se tane. E ui e le tutusa i ma’ua—ona e leai se tasi e i ai le tuufaatasiga o meaalofa ma uiga o loo ia te a’u pe o loo ia te ia—ma te faaaoga ai o ma’ua uiga felagolagoma’i e taumafai ai ia tasi. O le upu faamauga o se faamatalaga lelei tele lea o le tuufaatasiga e faavavau o se faaipoipoga na faia i le pule o le perisitua i totonu o se malumalu.

O le matafaioi o le tina o a’u lea e faatatau ia i latou e tupuga mai ia te a’u. Pe ou te mauaina moni lenei matafaioi i lenei taimi puupuu i le lalolagi po o le, pe a mavae le lalolagi, o le folafolaga o aiga e faavavau ua faia ia i latou o a latou faaipoipoga sa faamauina i le malumalu ma e ala i le Agaga Paia o Folafolaga (tagai MF&F 132:19).

O la tatou aoaoga faavae e tulaga ese i le lalolagi, ma o se vaega o le Toefuataiga o le talalelei a Iesu Keriso. Mafaufau po o le a tonu le uiga pe afai e te malamalama i lenei aoaoga faavae ma talitonu i ai. Ia te a’u, e aumai ai se vaaiga e faavavau i mea uma ou te faia.

O le Ekalesia O Le Nofoaga Lea Tatou Te Faataitaia ai le Aoaoga Faavae a le Atua

Ou te talitonu o le avea ma se tagata o le Ekalesia ua avea ai a’u o se vaega o se tasi o polokalama sili ona lelei o le atinaega ua faapea ona mamanuina. O se polokalama lautele o le atinaega o le tagata lava ia, faamalosiga, ma le tulaga faaletaitai mo tamaitai e tupu i le na o le faia o mea e faia e tagata uma o le ekalesia: tulaga faaletaitai, failauga, faia o faaiuga, talanoaga faatauanau, paketiga, auauna atu i le lotoifale, tusitusi ma faitautusi, sailiiliga, atiina a’e o punaoa, fai togalaau, teuina o meaai, ola maloloina o le aiga—e alu lava alu lava [le lisi].

Ou te talitonu o feeseeseaiga e faatatau i matafaioi o tamaitai e tulai mai pe oo ina i ai se mea ua motusia i le va o le aoaoga faavae ma le faatinoga o le aoaoga faavae. Ae peitai, e ala i faaaliga faifaipea mai le Atua i Ana perofeta ma ia i tatou e ala i le Agaga Paia, e mafai ona faaauau ona tatou iloa ma tuuitiitia le tele o le feeseeseaiga e alia’e mai.

Mo se faataitaiga, o loo faaauau ona faamanino mai e aposetolo ma perofeta ni mataupu ua loa ona tatou talitonu i ai:

Na saunoa mai Elder M. Russell Ballard o le Korama a Aposetolo e Toasefululua: “a o atu ia alii ma tamaitai i le malumalu, ua faaee uma mai ia i laua le mana lava e tasi, o lona uiga o le mana o le perisitua.”⁴
Sa saunoa Elder Dallin H. Oaks o le Korama a Aposetolo e Toasefululua, “E le masani ona tatou talanoa i tamaitai i le i ai o le pule o le perisitua i o latou valaauga faale-Ekalesia, ae o le a se isi pule o i ai?”⁵
Sa faamalamalama mai e Peresitene James E. Faust (1920–2007), Fesoasoani Lua i le Au Peresitene Sili, “O tama uma i lona aiga o se faatama [peteriaka] ae o tina uma o se faatina [meteriaka] e tutusa i laua i o laua matafaioi faamatua e iloagofie ai.”⁶

1. Tuu se Vaaiga Lautele i le Mafaufau

Se’i ou tuuina atu ni fautuaga se tolu o le a fesoasoani ia i tatou i lo tatou faatinoina o lenei aoaoga faavae? O la’u fautuaga muamua o le, ia manatua le vaaiga lautele na tuuina mai e le aoaoga faavae a Iesu Keriso.

I se taimi ua mavae atu, i le avea ai ma faatonu o Auaunaga Alofa a le AAG, a o ou i ai i se fonotaga sa ou maua se talosaga faatopetope e faatatau i tagata Kerisiano sulufai o e sa tutuliese uma mai Mosula, Iraki, e vaegaau a le Setete Isalama ma sa lolofi atu i Ketisitana. E toa 5,000 ni tagata sa tautulei atu i le faafeagaiga Anelikana i Baghdad mo se avanoa i le lotoa o lona falesa, ma sa leai ni a latou meaai. Sa talosaga mai le ulugalii faamisiona mo fesoasoaniga alofa a le Au Paia o Aso e Gata Ai mo ni tupe faavavave e faatau ai ni araisa, pi, ga’o, ma ni palanikeke, ma sa tatou tali vave atu i ai ina ia mafai ona latou maua se taumafataga i lena afiafi.

Ona o la’u galuega, o ituaiga mea nei e feagai ma a’u i aso uma. O le faamalosia e vaai atu i le ata lautele i le tele o taimi, ou te fesili ai ia te a’u lava, o a ni auala e sili ona lelei e faaaoga ai lo’u malosi? A o tatou sailia ni tali, se’i o tatou suesue i aoaoga faavae o le talalelei. “Vaai i tala atu o le faailoga” (Iakopo 4:14) po o le tautu lava i le fesili e tasi po o le faiga e tasi e masani ona see ese ai lo tatou taulai atu ma le taimi mai le ola i le talalelei.

Sa saunoa Bonnie L. Oscarson, peresitene aoao o Tamaitai Talavou e uiga i le tumau ona pipii i le talalelei a o tatou sailia ni tali: “E mafai ona tatou filifili pe o le a faaauau pea ona tatou mulimuli i mea ua uma ona tatou lagonaina. E le o i ai ni tali i mea uma, ae e mafai ona tatou filifili pe o le a tatou faamaoni i mea ua uma ona tatou lagonaina mai i le Agaga Paia. Ia tatou galulue pea e faaleleia ia mea, ae mo le taimi nei, taofimau pea i le faatuatua.”⁷

O le a faaauau pea ona suia a tatou faatinoga i le Ekalesia a o tatou aoao e faaaoga a tatou aoaoga faavae i ni auala e lelei atu ma sili ona atoatoa. Ou te faamoemoe o le a sili atu le talafeagai ma tutusa o le augatupulaga e sosoo ai i lana faatinoga o le talalelei. Ae ou te talitonu foi ua mautu maa faavae lapopoa ma ua lava e faafailele ai o tatou faatuatua ma a tatou molimau.

2. Ia Tumau le Faamoani E Ui lava i le Tetee

O le faafeagai e le o se mea e leaga moni. Ou te talitonu o le faafeagai e faamalosia ai foi i tatou. Ina ua ou asiasi atu i le Huntington Botanical Gardens i San Marino, Kalefonia, ISA, sa ou matauina ai ni ili lapopoa i le faaaliga na faafoligaina le agi i taimi uma o le to’elau lea e faamalolosia ai laau o tau vevela ina ia tatalia ni afa e ono oso mai. E auina mai pe faataga i aso uma e le Alii ni “matagi to’elau” e faaaoga ai faafitauli ma le le fia taliaina [o se mea] ina ia mafai ona faamalosia ai o tatou aa ma ia tatou mau fetuunai ai. O luitau faapena o le mea moni o se meaalofa.

O tala nei e lua mai le talafaasolopito o le Ekalesia tatou te maua ai se vaaiga i mea faafeagai:

O le tala muamua o le taunuu atu o Poika Iaga i le Vanu o Sate Leki i le 1847, e pei ona faamatalaina e Peresitene Gordon B. Hinckley (1910–2008): “E leai se palau na suaina lona eleele. Sa le’i iloa e [Polika Iaga] se mea e tasi e uiga i lona lafulemu, leai se mea [na iloa] e uiga i vaitau, i le tau, i le kiona, i le maatiati o taumalulu, o le ono aafia i ni mala iniseti. Sa leai se upu lelei a [le au uluai suesue] o Jim Bridger ma Miles Goodyear na fai e uiga i lenei nofoaga. Sa augani atu Sam Brannan ia te ia e o agai i Kalefonia. Sa le’i faalogo o ia i se tasi o i latou. Sa ia taitai atu ona tagata i lenei nofoaga vevela ma le mea sa foliga mai o se nofoaga tuufua. Ina ua ia taunuu atu, sa vaavaai atu o ia agai i le folasi tele e tau atu i le vaituloto masima i sisifo ma faapea atu, ‘O le nofoaga sa’o lenei.’”⁸

O le tala lona lua o le manatuaina e Uilifoti Uitilafi o se saunoaga a le Perofeta o Iosefa Samita. Sa saunoa le Perofeta i aso popofou o le Toefuataiga i se faapotopotoga toalaiti o taitai e uiga i le tele o le malamalama faalemataupu faavae o loo taatia i luma atu mo i latou: “Ua matuai faamalamalamaina ma aoaoina au i a outou molimau i lenei po, ae ou te fia fai atu ia te outou i luma o le Alii, e le sili atu ni mea ua outou iloa e uiga i taunuuga o lenei Ekalesia ma le malo nai lo o se tamameamea i luga o vae o lona tina. Tou te le malamalama i ai.”⁹

Ua ou faasoa atu nei tala e lua ona la te faamatala atu ai lagona o loo o’u lagonaina. O le i ai i le nofoaga sa’o po o le maua o le aoaoga faavae sa’o e le faapea ai o le a leai ni eria laugatasi masima e segaia ai le vaai, ma le mumu o alisi uli po o kiona e oti ai po o tagata e fai mai e te le manuia, ae o le nofoaga ma le aoaoga faavae sa’o lenei. Ma e tatau ona tatou faaauau pea. E tutusa lava lo tatou malamalama ma se pepe i luga o vae o lona tina e uiga i le mea o loo faia e le Alii i alii ma tamaitai ma le perisitua. Ae e fiafia le Alii e aoao i tatou pe a tatou mafaia, pe a tatou tuputupu a’e, pe a tatou ole atu. Ma pe a tatou faateleina lo tatou malamalama, e mafai ona tatou faia le mea e pei ona fai mai ai Sister Oscarson, “I le taimi nei ia taofimau lo tatou faatuatua.”

3. Saili le Agaga Paia

O le faia o ni fesili ma le mauaina o tali o le fatu lea o le mauaina o se molimau i aoaoga faavae a le Atua. O le a molimau mai le Agaga Paia pe a sa’o se mea e ala i lagona toafilemu ma le mafanafana. Fai mai Linda K. Burton, peresitene aoao o le Aualofa e uiga i lenei faagasologa: “Tatou o i punavai sa’o mo ni tali. Aisea o le a tatou talitonu ai i le Initoneti ae le o perofeta? E mafai ona tatou iloa le ala e fai atu ai fesili i se auala e faigofie ai ona galulue faatasi ma faaalia ai ni atugaluga faamaoni. … Ae ia onosai ma lotomaualalo.”¹⁰

Ua aoao mai e Elder Jeffrey R. Holland o le Korama a Aposetolo e Toasefululufa ia i tatou le eseesega i le va o uunaiga a Satani ma tali mai le Atua: “O ai lea e musumusu mai ma le atamai ia [pepelo] i o tatou taliga? … Ua tatou taufai iloa uma le o loo faia lenei mea–o le tama o pepelo uma. O Lusifelo, o lo tatou fili e toatasi.”¹¹

Sa taumafai le Perofeta o Iosefa Samita, o le sa tele atu lona potomasani i le mauaina o faaaliga nai lo o se isi lava i lenei tisipenisione, e aoao i tatou e faapea, o fesili e ao ona taulimaina ma se tautinoga i le lotogatasi ma le faaaloalo. O lenei mea e valaaulia ai le Agaga Paia. I le 1839, sa tusia ai e Iosefa i lana tusi mai le Falepuipui o Liperate e faapea “o aia o le perisitua ua fesootai e le mavavaeeseina ma mana o le lagi” ma o le mana o le perisitua e ao ona faaauau pea “[nao i] le faatauanau, i le talitiga, i le agamaualalo ma le agamalu, ma le alofa faamaoni” (MF&F 121:36, 41). Sa aoao atu foi e le Perofeta ni mataupu faavae talitutusa i le Aualofa: “O le agamalu, alofa, ma le mama—o mea nei e tatau ona viia ai [tatou].”¹²

Sa saunoa Iosefa Samita e uiga i le agavaivai ma le agamalu o auala e lagona ai le Agaga Paia ma faaaoga ai uunaiga amiotonu. Sa ia saunoa atu i lenei mea i alii ma tamaitai aua e aafia uma ai itu e lua o le mafutaga. O le pule uma ma le faatagaga paia e faaleaogaina (aua e tuumuli le Agaga Paia) i le taimi lava e amata ai e se alii po o se tamaitai ona faaaoga le puleaga amioletonu (tagai MF&F 121:37) ma le mafai ai ona taitai ma le agamalu, alofa, ma le mama.

O Mea o Loo Naunau i ai Tamaitai o Loo i totonu o a Tatou Aoaoga Faavae

O loo i ai se naunautaiga i le toatele o tamaitai i le lalolagi ina ia faatauaina, ia maua le faamoemoega mo o latou malosiaga, ma ia su’e ni alii o e mananao e fausia ni aiga ma ia faamaoni.

Sa ou feiloai i se tasi o taimi i se tagata siva mai Peretania a o [o’u] malaga i se nofoaafi i Finelani. Sa ma tau fai fiafia ona ma te tautatala i le Igilisi, ma a o ma talanoa sa ma fesilisili atu i le tasi ma le isi ni fesili: O a au mea o fai i Finelani? O le a le mea e te talitonu i ai? O lona iloa ai o o’u talitonuga, sa ia fesili mai ai, “E te le ulaula pe inu ava malosi? E te le talitonu i feusuaiga a e le’i faaipoipo?” Ma i le ma talanoaga atoa, sa fai lava ma toe foi mai i le mataupu lenei, ma le fia iloa. “Ou te matea a e tafao faamasani i alii e faapena foi o latou lagona, o le a manuia la,” sa ia fai mai ai. Ma sa toe fai mai mulimuli ane: “E i ai la ni alii e faapena ni o latou lagona?” Sa amata mai e matuai le manao i ai, ae uma ane ua moomoo faanoanoa. Sa galala o ia mo se mea sa faalogo i ai i la tatou aoaoga faavae.

E le’i toe aluese lava ma a’u le manatuaga o le ma feiloaiga i luga o le nofoaafi, ma e masani ona faamanatu mai ai ia te a’u se saunoaga lauiloa mai ia Peresitene Spencer W. Kimball (1895–1985): “O le tele lava o le tuputupu a’e tele ua oo mai i le Ekalesia i aso e gata ai, o le a oo mai ona o le toatele o tamaitai lelei o le lalolagi … o le a taina mai i le Ekalesia i ni numera toatele. O le a tupu lenei mea i se maualuga e faapea ona atagia mai ai i tamaitai o le Ekalesia le amiotonu ma le tulaga lelei i o latou olaga, atoa foi ma le maualuga o loo vaaia ai tamaitai o le Ekalesia o ni tamaitai iloga ma le tulaga ese—i ni tulaga fiafia—mai tamaitai o le lalolagi.”¹³

O le aoaoga faavae o le faasinomaga ma matafaioi o tamaitai ua faatusa i ai faanaunauga sili o lo’u loto. O le faatinoina e tagata o le ekalesia i le lalolagi nei o aoaoga faavae o le Atua e le atoatoa, ae e mataala, ola, tumu i le faamoemoe ma faamoemoega lelei. Matou te talitonu “o le a faaali mai [e le Atua] le tele o mea silisili ma le taua tau i le Malo o le Atua i le lumanai” (Mataupu Faavae o le Faatuatua 1:9). E mafai ona tatou filifili e mulimuli i lena aoaoga faavae.

O lea la, ou te toe fesili atu ai: O se ekalesia lenei mo se tamaitai? O la’u tali e faavae tonu i o’u lava aafiaga i le lalolagi atoa. Ioe.