Faia o se Oso i Lona Lumanai
O se manatu, o se tapoleni osooso, ma se manao e fesoasoani i isi na faaosofia ai se teineitiiti e 11 tausaga le matua i lesona maoae e uiga i le ola tutoatasi ma le auauna atu.
O le tele lava o tamaiti e ta’i 11 tausaga ua pisi i le aoga, feau i le fale, ma gaoioiga ma uo. Peitai o Alexandra C. mai le setete o Durango, Mekisiko, sa le o se [tamaitiiti] 11 tausaga masani. E faaopoopo atu i mea uma e masani ona fai e tagata talavou o le vaitausaga lena, sa maua e Alexandra ni tupe mai lana ia lava pisinisi ma auauna atu i lona nuu.
Ia, e faapefea la ona amata e se teineitiiti laitiiti lana ia lava kamupani?
Amatalia i se Manatu
Sa amata ina ua faalogo Alexandra e uiga i nisi o vasega sa faia e le Ekalesia e fesoasoani ai i tagata ia iloa ona ola tutoatasi. O le vaega sa matele lava mo tagata e 18 tausaga ma matutua atu, ae sa naunau Alexandra e auai. Sa fiafia o ia i le manatu o le aoao i le auala e maua ai se galuega pe amata ai sana ia lava pisinisi.
Mata e mafai e ia, o se teineitiiti sa i ai lava i le aoga tulagalua, e le gata ina mamanu lona lava ia lumanai, ae fesoasoani foi i tagata e itiiti ni mea o latou maua nai lo o ia? O le mea taua, e toatele tagata o le Ekalesia na te iloa mai lona nuu na itiiti ni aoaoga ma i ai ni nai punaoa.
Sa auai Alexandra i se vaega na ta’ua o le “Amatalia ma le Faateleina o La’u Pisinisi,” o se tasi mai le tolu mataupu na tuuina atu. Nai lo o le aoaoina e se faiaoga, o le vaega sa taitaia e se taimua—o se sui o le vaega e taitaia isi sui i le aoaoga ma uunaia talanoaga. E fono Alexandra ma lana vaega i vaiaso uma lava mo le tolu masina.
A o aoao Alexandra i auala e ola tutoatasi ai faaletino ma faaleagaga, sa amata ona tilotilo solo o ia i manaoga o loo i totonu o lana eria. Sa ia matauina, sa le lava ni gaoioiga faafiafia mo tamaiti uma i le latou aai, o lea sa ia sefeina ai se tupe ma faatau ai se tamai tapoleni osooso. Sa tuu e Alexandra le tapoleni osooso i se nofoaga faitele ma amata ai ona nono atu i tua, e faaaoga ai manatu sa ia aoaoina i lana kosi e uiga i le faalauiloaga ma mea tautupe.
Sa oo ina lauiloa le tapoleni osooso i totonu o lona nuu.
O Faamanuiaga o le Auauna Atu ma le Galue Malosi
Sa amata foi ona faaaoga e Alexandra ona tomai i isi auala. Ona sa ia faaalia le faaaloalo tele i tagata uma o lana vaega, ma sa ia faia uma mea sa ia tautino ai, sa faatuatuaina ai Alexandra e taimua i se vaega fou—o se tulaga sa masani ona umia e tagata e 18 tausaga pe matutua atu.
Ina ua avea Alexandra ma se taimua, sa avea o ia ma tagata auai aupito laitiiti i lana vaega e toaono. Sa ia suesueina ma le toto’a ia mea e faaaoga a’o le’i oo i fonotaga taitasi a le vaega, ina ia ona mailoa le auala sili ona lelei e fesoasoani ai i tagata o lana vaega. Sa ia faia lana matafaioi ma le manatu mamafa i ai. “E popole o ia pe a le taunuu atu lana vaega i le taimi sa’o po o le, pe a le ola le masini vitio,” na fai mai ai lona tama o Tavita.
Sa matuai lelei lava Alexandra i le faapaleniga o meaaoga, le pisinisi o le tapoleni osooso, ma lona matafaioi o le taimua. Ma o lona manatu sa matuai aoga lava. Na fai mai o ia, “sa faamanuiaina a’u e le Atua ina ua Ia faia a’u o se taimua.” Mo ia, o se tasi o faamanuiaga o le aoao lea e uiga i le alofa ia i latou e te auauna i ai.
O lena alofa na taitai atu ai o ia e aapa atu i lana vaega ma se manao moni mo i latou ia manuia. Mo se faataitaiga, o taimi taitasi sa latou fono ai, sa fai ai e tagata o le vaega ni tautinoga faalevaiaso e faaaoga mea na latou suesueina i a latou pisinisi ona aoao lea o o latou aiga i mataupu faavae o le talalelei na latou aoaoina. Pe a le ausia e tagata auai o le vaega a Alexandra a latou sini pe misi se vasega, sa asiasi atu o ia i o latou fale e vaai pe na a mai i latou ma ia uunaia i latou e faataunuu a latou tautinoga. “E ese lo’u fiafia e asiasi atu i tagata o la’u vaega,” sa ia fai mai ai.
Sa faaopoopo mai le tama o Alexandra, “Ou te ofo i le vaaia o le malosi o lagona o lo’u afafine laitiiti i le manuia o i latou e limavaivai. E agaalofa tele o ia ia i latou o loo ia tautua i ai.”
O loo avea nei ma se Ofagapi i Tamaitai Talavou, ae ua i ai fuafuaga a Alexandra e faalautele atu lana pisinisi o tapoleni osooso i se nuu latalata ane. O le aoao ia faateleina le ola tutoatasi ma fesoasoani atu i isi ia faia foi lea lava mea, na fai mai ai o ia, ua amata ona ia vaaia ni suiga ia te ia lava ma ana uo fou i lana vaega. Na fai mai Alexandra, “Ua tuputupu a’e la’u molimau.” “Ua faateleina lo’u talitonu ia te a’u lava, ma ou te fia auauna atu.”
Na fai mai Alexandra, ona o lenei kosi faaleaoaoga, ua ia iloa atili ai lona tagata moni ma auala e mafai ona ia auauna atu ai. “Na ou aoaoina e mafai ona ou faaleleia atili a’u lava. Ma ou te fiafia e vaai atu o alualu i luma tagata uma o le vaega. Ou te iloa o le a tulaga lelei i le taimi nei; o le a alualu i luma a latou pisinisi. Ou te iloa na valaauina e le Atua le perofeta, ma o le aoaoga o le ola tutoatasi o se faaaliga mai ia te Ia.”
Mo Alexandra, o lana molimau, taua o le tagata lava ia, ma le auauna atu i isi, o mea mautinoa ia ua aoga ai le galue.