Sauniuniga mo ni Faalavelave Faafuasei: Mafuie ma Fagu Tamione [Demijohns]

Ricardo Sosa, Santa Lucia, Atenitina

Ata

earthquake wreckage

Ata na tusia e Allen Garns

Ina ua iva masina o lo’u matua, sa maua ai o’u matua—o se ulugalii talavou, ma ni tamaiti se toatolu ma le isi sa maitaga ai [tina]—i se mafuie e 7.5 le malosi i Atenitina. A o amata ona pau i lalo le matou fale, sa toso mai i matou e lo’u tama ma lou tina ma taufetuli loa. Ina ua uma ona siaki e vaai pe le o afaina i matou, sa laua fetilotilofa’i solo loa i le faatamaiaga. Sa vave ona iloilo e lo’u tama mea na faaleagaina ma le aoga, ma iloa ai, o le a leai ni a matou vai mama mai le alavai faitele. Sa lei lava foi ni vai e fufulu ese ai le pefu mai fale na pauu!

Ina ua aluese atu le lagona o le faate’ia, sa toso mai e lo’u tama lana uila ma alu loa e siaki lona tina, o le sa nofo i se pitonuu e le mamao ese atu. Ina ua oo atu i le fale ua faaleagaina a lona tina, sa savali atu i le pito i tua i le mea sa saofai ai [lona tina] ma ni nai ona maosiosia.

Sa fai atu lo’u tinamatua i lo’u tama e faasao mai nisi o mea mai mea na faaleagaina, ao ia faia lea mea, sa tau ai i ni fagu tamione se lua (o ni koneteina mata’eta’e sa faatau mai ai le 5 i le 15 kalone [20 i le 60 L] o le uaina) na tumu i le vaiinu mama. Sa le’i faaleagaina ia [fagu].

O ni nai masina a o le’i oso le mafuie, sa faatonuina ai e Peresitene Spencer W. Kimball (1895–1985) le Au Paia i le lalolagi atoa e teu ni meaai ma ni vai. Sa faalogo lo’u tinamatua, o se tagata fou liliu mai. Mai i na fagu tamione e lua, sa mafai ai ona taulima manaoga o lo’u aiga mo ni aso se lua seia oo ina taunuu mai le fesoasoani.

O lenei faataitaiga o le usiusitai o lou tinamatua, sa o se molimau i lo’u tama, o le na liliu mulimuli ane i le talalelei. Talu mai lena taimi ua faamauina lo’u aiga i le malumalu. Ou te matuai faafetai i le faatuatua ma le usiusitai o lou tinamatua i le valaau e saunia.