Faafaileleina Faatasi o Aiga

Ia suesue ma le agaga tatalo lenei savali ma saili ia iloa mea e faasoa atu. O le a faapefea ona faateleina e le “O Le Aiga: O Se Folafolaga i le Lalolagi” lou faatuatua i le Atua ma faamanuia ai i latou e te tausia i faiaoga asiasi? Mo nisi faamatalaga, alu i le reliefsociety.lds.org.

Faatuatua, Aiga, Toomaga

“O le tane ma le ava ua i ai se tiutetauave paia e alofa ma tausi e le tasi le isi ma a la fanau.”¹ Na saunoa Peresitene Russell M. Nelson, Peresitene o le Korama a Aposetolo e Toasefululua e faapea, “O le aiga e tatau ona avea ma fale su’esu’e o le Atua mo le alofa ma le auauna atu.”

“E finagalo lo tatou Tama Faalelagi i tane ma ava ina ia faamaoni a’ia’i le tasi i le isi, ma ia faataua ma tausi a latou fanau o se tofi lea mai le Alii.”²

I le Tusi a Mamona, ua saunoa mai ai Iakopo e faapea, o le alolofa o tane i a latou ava, o le alolofa o ava i a latou tane, ma le alofa o loo ia i laua mo a laua fanau, o nisi ia o mafuaaga sa sili atu ai i se tasi o taimi le amiotonu o sa Lamana nai lo o sa Nifae (tagai Iakopo 3:7).

O se tasi o auala sili ona lelei e valaaulia ai le alofa ma le lotogatasi i totonu o o tatou aiga, o le tautala ma le alofa i tagata o o tatou aiga. O le tautala ma le alofa e aumai ai le Agaga Paia. Sa talosaga mai Sister Linda K. Burton, peresitene aoao o le Aualofa, ina ia tatou mafaufau: “Na faafia ona tatou ‘fai [atu ni] upu alofa i le tasi’ ma le loto i ai?”³

Mau Faaopoopo

Roma 12:10; Mosaea 4:15; Mataupu Faavae ma Feagaiga 25:5

O Tala Ola

Sa faasoa mai e Elder D. Todd Christofferson o le Korama a Aposetolo e Toasefululua se aafiaga a o laitiiti na tamau ai ia te ia le taua o se aiga alofa. A o matou laiti ma o’u uso, sa faia ai se taotoga tele o lo latou tina ona o le kanesa, lea sa matuai tiga ai o ia pe a faaaoga lona lima taumatau. Faatasi ai ma se aiga o tama, sa tele ni auliga, ae a o auli lona tina, sa masani ona taofi ae alu i totonu o le potu e tagi ai seia oo ina te’a le tiga.

Ina ua iloa e le tama o Elder Christofferson le mea sa tupu, sa faalilolilo ona alu o ia e aunoa ma ni ana meaai i le aoauli toetoe lava mo se tausaga atoa, ina ia lava ai se tupe e sefe e faatau mai ai se masini na faafaigofie ai le auliga. Ona o lona alofa i lona toalua, sa ia faia ai se faataitaiga o le faafailelega i totonu o aiga mo lana fanau tama. E faatatau i lenei fesootaiga faagaeetia, na saunoa ai Elder Christofferson, “Ou te le’i iloa le ositaulaga ma le agaalofa o lo’u tama mo lo’u tina i lena taimi, ae o lea ua ou iloa, ou te faapea ifo ia te a’u lava, ‘O se tamatane lena.’”⁴