Laveaiina e Lo’u Tuagane
E alaala le tusitala i Idaho, ISA.
Ina ua atoa le 12 o lo’u tuagane o Tana, sa ou valaauliaina o ia e amata ona ma o i le malumalu. Ae ou te le’i iloa o le a ma matuai manaomia le lagolago a le tasi ma le isi i tausaga i le lumanai.
Na toeitiiti lava atoa lo’u 12 i le taimi na faapaiaina ai le Malumalu o Twin Falls Idaho. Sa matuai ou fiafia lava ina ua fai mai lo’u uso matua ia te a’u mo le taimi muamua, pe sa ou manao e amata ona matou o soo ma lana uo i le malumalu.
Sa ou fiafia ina ua atoa le 12 tausaga o lo’u tuagane laitiiti o Tana i le tolu tausaga mulimuli ane aua ua mafai ona ou valaaulia o ia ma te o atu i le malumalu.
O taeao uma lava sa ma o ai, ma te fesoasoani i le tasi ma le isi e fafagu i luga ma ma o, ma pe a ma lelavava, e fai e Tana ni tala malie e fesoasoani ma te feala ai i luga. A uma ona ma o i le malumalu, ma te faaalu ni taimi e talanoa ai e uiga i o ma lagona i totonu o le malumalu ma mea sa ma mafaufau i ai.
O le o atu i le malumalu ma Tana sa avea ma faatumutumuga faaleagaga o lo’u vaiaso. E ala i a ma asiasiga faisoo i le malumalu, sa oo ai ina avea i ma’ua ma se uo lelei atu, lea sa faamalosia ai a’u nai lo o mea e mafai ona ou mafaufau i ai, pe a oo mai nisi o tofotofoga i lo’u ala. Sa o ese atu o ma uso matutua e toalua mo le kolisi, ma na faatoa uma lava ona vaelua le matou uarota, na tuua ai i maua ma Tana ua na o nisi o le autalavou malolosi [i le Ekalesia] a le matou uarota.
Sa ma faaaluina ma Tana ni itula e telefoni ma valaaulia ai le autalavou le toaaga i le lotu ma le Mutuale. E masani ona pei o se taumafaiga e leai se faamoemoe, ona e leai se tasi na sau e tusa lava pe toafia ni teineiti sa ou taumafai e faauo i ai.
Sa taumafai foi o ma matua e fesoasoani mai. La te molimau mai ia i maua pe a ma lotovaivai, ma tuu mai ia i maua e talanoa atu e uiga i mea ma te feita ai pe a ma o mai i le fale ma le le fiafia. Ae e ui lava i lea, sa le’i faafuasei ona toatele ni a ma uo i le lotu, ma sa atili faigata foi le manao e alu ae sa na o a’u le teine talavou iina. Sa amata ona ma tau le o soo i le malumalu ona o le pisi o a ma fuafuaga o le aoga.
Sa ou faaaluina le tele o le taimi e faitau ai a’u tusitusiga paia ma aioi atu i le Alii e fesoasoani mai ia ou malosi. Sa ou lagona le tuua na o a’u ma lelava—lelava i le tuua na o a’u, lelava i a’u taumafaiga ae leai se eseesega na tupu ai, lelava i le tauiviga faaleagaga ma le faalelagona.
I le taimi lenei, sa ou faigaluega ai o se tagata laveai i le vaitaele a le aai. Sa tele atu lo’u fiafia e i ai iina nai lo o le i ai i le lotu, ona o a’u soafaigaluega o a’u uo ma sa latou fiafia i taimi uma pe a vaai mai ia te a’u. O se tasi aso, sa ou filifili ai o le a ou le toe alu i le Mutuale ona sa sili atu le malie ma sili atu le aoga o le galuega ia te au i tulaga faaletupe.
Sa ou le manatu o se mea taua seia oo ina ou matauina a’u lava, ua tuutuu maualalo o’u tulaga faatauaina. Sa leai sa’u tala na fai atu i le palalauvavale a a’u uo, ma i se tasi aso sa ou te’i ai i lo’u faalogo atu ua oso faafuasei la’u palauvale ae ou te le’i faia muamua lava. Sa faapea foi ona ou matamata i se tifaga le talafeagai i se tasi o po i se pati ma a’u uo faigaluega laveai. Sa ou lagona le faanoanoa tele ma mafaufau po o le a la’u mea na fai.
O le taimi lea, sa fai mai ai o’u matua i le sili atu o le tuuatoatasi o Tana talu mai ona ou le toe alu i le Mutuale. O vaiaso taitasi e fesili mai ai o ia ia te a’u, “Ei, e te alu i le Mutuale nanei?” A foi mai o ia mai le Mutuale, e faasasao lava i lona potu ma faitau ana tusitusiga paia mo se taimi umi. Sa le toe tautala tele foi, ma a ou fesili atu ia te ia pe o Fiafia, pau lava lana tala o le, “Leai” ma savali ese.
O se tasi po na sau ai i le fale ma le tagi ona sa ia lagonaina le matuai tuuatoatasi.
O le taimi lena na ou filifili ai loa e tatau ona ou toe foi. E le afaina po o le a le faigata mo a’u; sa manaomia a’u e Tana.
Sa ave e Tana se kosi o talafaasolopito o aiga i le lotu, ma sa ou filifili ai ou te alu ma te o faatasi ai. Sa ma mananao e toe amata ona ma o soo i le malumalu, ma o lenei la o le a mafai ona maua ni a maua lava igoa.
Sa ma fiafia e o faatasi i le vasega i Aso Sa. Pe a tuua le lotu, ma te sueina faatasi ni igoa. O le mea e sili ona manaia ai le ave o o maua lava igoa i le malumalu, ona sa ma mauaina faatasi, ae maise foi, sa mafai ona lagolago ai e le tasi le isi i le lotu, ma fiafia ai i le lotu ona sa ma faia le galuega a le Alii.
O le filiga o Tana e auai i le lotu ma le Mutuale sa o se faataitaiga mamana ia te a’u. Sa i ai sa’u molimau i le talalelei, ae sa ia fesoasoani ina ia ou maua se molimau o le auai i le sauniga ma gaoioiga a le ekalesia.
Sa ma mafaia faatasi ona faamafanafana le tasi ma le isi ma faaaoga a maua molimau o le malumalu e fesoasoani ai i le tasi ma le isi ia malosi i le Ekalesia. Sa le’i lelei tele le auai a le autalavou i le lotu ma le Mutuale, ae na faapea ona ma malolosi atili ai ma Tana ma faateleina le mafai ona tauave a ma’ua avega a o ma fesoasoani i le tasi ma le isi e fetaomi atu pea i luma.
E ese lo’u fiafia ona sa ou valaauliaina o ia e sau ma te o i le malumalu. E ui ou te mautinoa sa fesoasoani ia te ia, ae ou te iloa na laveaiina ai a’u.