Auala ia Tumau ai le Agavaa

Saunia e Peresitene Thomas S. Monson

Mai se saunoaga i le konafesi aoao ia Aperila 2011.

Ua lava le umi ua ou ola ai e molimauina ai le tele o le suiga o le uiga mama o malo. I se tasi taimi na tele lava ona tutusa tulaga faatonuina o le Ekalesia ma tulaga faatonuina o malo, o lea ua i ai se vā tēle i lo tatou va, ma o loo faatupulaia pea lena va.

O le tele o ata tifaga ma televise o loo faaalia ai ata o uiga ia e faasagatau tonu lava i tulafono a le Atua. Aua nei noatiaina oe lava ia i mea eleelea taumatemate ma manino ia e masani lava ona maua iina. O upu i le tele o musika o aso nei ua i ai foi i le faavasegaga lava lea e tasi. O gagana masoa ua matua taatele ia i tatou i aso nei sa lei taliaina i se taimi e lei mamao tele atu. Ou te aioi atu ia te outou ia aua nei tautala ai pe faia soo se mea tou te le mitamita ai.

Ia matuai alu ese lava mai ponokalafi. Aua lava e te faatagaina oe e matamata i ai. Ua faamaonia lona avea ai ma se vaisu lea e matuai faigata lava ona faatoilaloina. Aloese mai le ava malosi ma le tapaa po o soo se isi lava fualaau faasaina, e faapena foi vaisu ia o le a faigata ona e faatoilaloina.

O le a le mea o le a puipuia oe mai le agasala ma le leaga ua siomia ai oe? Ou te folafola atu o se molimau malosi o lo tatou Faaola ma Lana talalelei o le a fesoasoani e taitai oe i le saogalemu. Afai e te lei faitauina le Tusi a Mamona, faitau i ai. Afai tou te faia ma le agaga tatalo, ma se naunautaiga faamaoni ina ia iloa le upu moni, o le a faaali mai e le Agaga Paia ia te outou lona moni. Afai e moni—ma e moni lava—o lona uiga o Iosefa Samita o le perofeta na vaai i le Atua le Tama ma Lona Alo o Iesu Keriso. E moni le Ekalesia. Afai e te lei maua lava se molimau o nei mea, ia e faia mea e tatau ai ina ia maua ai se molimau. E taua mo oe le i ai o sau lava molimau, aua o le molimau a isi e faatapulaa lona aoga mo oe. A maua loa, e manaomia e se molimau ona faatumauina le taūa ma le ola e ala i le usitai i poloaiga a le Atua faapea ma le tatalo e le aunoa ma le suesue i tusitusiga paia. Auai i le lotu. Auai i le seminare.

Afai o i ai se mea e le talafeagai i lou olaga, ua i ai se auala e faatoilaloina ai. Ia taofi soo se amioletonu. Talanoa i lou epikopo. Pe o le a lava le faafitauli, e mafai lava ona faaleleia e ala i le salamo tatau. E mafai ona toe faamamaina oe (tagai MF&F 58:42).

Na faamatala e le Faaola o tagata, o ia lava sa i ai i le lalolagi ae lē o se tasi o le lalolagi. E mafai foi ona tatou i ai i le lalolagi ae le o ni o le lalolagi pe a tatou teenaina manatu faavae sese ma aoaoga sese. Tumau ma le faamaoni i mea ua poloaiina ai i tatou e le Atua.