O Tusitusiga Paia na Leiloloa
E faafofoga mai ma taliina e le Atua a tatou tatalo pe a tatou faatinoina le faatuatua ia te Ia ma Lona Alo.
Ata na tusia a Anna Sutor
I le aso 29 o Iulai, 1977, faatoa uma ona ma asiasi ma Sister Cook i le Misiona a Polivia Santa Cruz o se vaega o lou tofiga o se sui o Fitugafulu lea sa ma i ai i le malaevaalele i Cochabamba, Polivia pe a ma le lima itula. Sa ma matua le lavava lava, o lea sa ma fiafia ai ua maua ni nai itula e malolo ai. Ao ou faagalegale moe, sa ou maua se uunaiga malosi e tatau ona ou ala ma tusi i lalo ni nai manatu ua oo mai i lou mafaufau.
Sa ou tusitusi mo le toeitiiti atoa le tolu itula, foiaina o nisi o faafitauli tau le pulega lea sa ou tauivi ai i lau lava eria o le misiona mo le tele o tausaga. Sa ou lagonaina le liligi tele mai o le Agaga ma sa ou fiafia e tusi i lalo mafaufauga musuia taitasi.
Mulimuli ane sa ma malaga atu mo La Paz, Polivia. Sa faafeiloaia ma le faaaloalo i maua e Peresitene ma Sister Chase Allred i le malaevaalele ma aveina atu i le la veni i le ofisa o le misiona. Sa matou lokaina le veni, tuu a ma atopau ma lau tamai ato i totonu, ma sa talosagaina e Sister Allred se alii faifeautalai e vaai le veni.
I le ulufale atu i le ofisa, sa faafetaui le peresitene e se tamaitai ua lata ina oti lana tane. Sa ma faafilemuina uma ma le peresitene o ia ma fesoasoani i mea na ia manao ai. I lena taimi, na malaga atu ai Sister Cook ma Allred i le fale o le misiona.
Ina ua ma toe foi ma le peresitene i le veni, ua leai uma a ma meatotino. Sa ou faapea ua alu Sister Cook ma ave mea i le fale o le misiona. Ae ao matou agai atu i le fale, sa ou iloaina le tamai faamalama i le taumatau pito i luma ua faaleagaina ma ua amata ona popole masalo ua gaoia a ma meatotino.
I le taunuu ai i le fale o le misiona, sa ma iloaina e moni lava ua gaoia uma a ma mea totino. O le leiloloa o lavalava na tulai mai ai se faafitauli faafuasei ae e le tumau. O le mea na sili ona faanoanoa ai o au tusitusiga paia ia sa i totonu o le ato lea ua gaoia faatasi ai ma manatu musuia ia na faatoa maua i Cochabamba. Sa lofituina au i le faanoanoa, ita, ma lagona o le leai o se faamoemoe.
Ina ua uma ona matou tatalo uma mo le toe mauaina o a maua meatotino, sa ma taumafai ia maua le fiafia i la matou taumafataga o le afiafi ae sa lei mafai. O au tusitusiga paia na tuuina mai ia te au e ou matua, faatasi ma se tusiga paia ia te au mai lou tina ma lou tama ae lei maliu o ia. Sa ou faaaluina le afe o itula i le makaina, faafesootai mau, ma le alofa naunau ua pau ia o mea totino faalelalolagi na ou manatu e sili le taua.
E ui na tele se ma talanoaga ma Peresitene Allred, na ou maua se uunaiga malosi e tatau ona matou faia mea uma i lo matou malosi ia toe maua ai tusitusiga paia. O lea ina ua maea le taumafataga mama o le po o i latou uma na faatasi ai na toe tootutuli tasi lava. Na matou augani atu i le Alii ina ia toe faafoi mai tusitusiga paia, ina ia taitaia le tagata na avea ia ona iloa la latou amioletonu ma salamo, ma ia avea le toe faafoi mai o tusi ma auala o le aumaia o se tasi i le Ekalesia moni.
Na matou naunau e sailia le eria i tafatafa o le ofisa o le misiona ma le laufanua lata ane, ma le faamoemoe o le gaoi po o tagata gaoi o le a aveina mea e mafai ona faatau ae tiai tusi faa Peretania.
Ona matou o atu lea pe a ma le toasefulu o i matou i le veni ma moli uila ma lavalava mafanafana. Na matou tietie atu i luga ma lalo o auala, ma auiliili uma nofoaga avanoa ma talanoa i tagata seia leai se avanoa na tuua. Sa leai se isi na vaai pe na faalogo i se mea. Na iu loa ina matou toe foi i le fale ua le faamanuiaina. Na ma faauma ma Elder Allred a ma pisinisi ua leva le po, ma o le aso na sosoo ai na ma felelei atu ai ma Sister Cook i lo matou aiga i Quito, Ekuatoa.
I isi vaiaso na sosoo ai, na faaauau e faifeautalai i Polivia ona sailiili. I le leai lava o se faamoemoe, na latou filifili ai e tuu se faaaliga i nusipepa e lua o aso taitasi ma ofoina atu se taui.
O le taimi lea, i Quito, sa ou faia ai se tauiviga. Ou te lei toe suesue i tusitusiga paia talu mai ona leiloloa au tusi. Sa ou taumafai e suesue, ae o taimi uma lava ou te faitau ai i se fuaiupu, ou te manatua lava na o ni nai mau fesootai na ou faia i le silia ma le 20 tausaga. Sa ou lotovaivai, faavauvau, ma na leai se manao e faitau. Na ou tatalo mo le tele o taimi ina ia maua au tusitusiga paia. Na tatalo foi lou toalua ma tamaiti laiti i aso uma mo le tolu vaiaso, ma faapea atu, “Tama Faalelagi, faamolemole toe faafoi mai tusitusiga paia a Tama.”
Ina ua mavae le tolu vaiaso na ou mauaina se uunaiga faaleagaga malosi lava: “Elder Cook, o le a le umi o le a e faaauau ai e aunoa ma le faitau ma le suesue?” Na maatiati mai le vevela o upu, ma na ou filifili ai ua tatau ona lava lou lotomaualalo ma lava le usiusitai e toe amata uma ai. I le faaaogaina o tusitusiga paia a lou toalua, na ou amata ona faitau i le Kenese i le Feagaiga Tuai, ma faatasi ai ma lana faatagaga, ma toe makaina ma faafesootai mau.
Ia Aokuso i le aso 18, na taunuu mai ai se tagata faigaluega o le Ekalesia, o Uso Eb Davis, i Ekuatoa mai Polivia ma se afifi mai le peresitene o le misiona i La Paz. Na ia faataatitia au tusitusiga paia i luga o lau kesi faatasi ma faamatalaga na ou faia o au uunaiga faaleagaga.
O le olioli na ou oo i ai e le mafai ona faamatalaina. I le iloaina faapea o le Alii, i ni auala faavavega, e mafai ona aveesea mai na tusi mai La Paz, o se aai e 700,000–800,000 tagata, mai lima o tagata gaoi ma toe faafoi mai ma le atoatoa—leai se laupepa na toesea, masae, pe palapala—e le oo lava i ai lou malamalama. I lena aso, na ou folafola atu ai i le Alii o le a ou faaaogaina ia sili atu le aoga o lou taimi ma au tusitusiga paia nai so isi lava taimi muamua.
Na ou iloaina mulimuli ane faapea o se tamaitai na i ai i le maketi—o se tasi mai le fia selau i La Paz—na vaai i se tamaloa ona o loo talotalo solo se tusi lanu uliuli. O ia o se tasi o le lotu porotesano ma na maua se uunaiga malosi faapea o se mea paia o loo faia ma le le faaaloalo. Na ia agai atu i le tamaloa ma fesili atu po o le a lena mea. Na te lei iloaina ae na ia faaali atu ia te ia le tusi. Sa fesili atu o ia pe i ai se isi mea. Na ia toso ane i luga se isi tusi lanu uliuli. Na ia fesili atu pe i ai se isi mea. Na ia toese mai se faila e tumu i pepa ma faapea mai o le a ia susunuina. Ona ia fai atu lea o le a ia faatauina na mea mai ia te ia, lea na ia malie i ai, mo le tau e 50 peso (pe a ma le I.S. $2.50).
Mulimuli ane, na ia le mautinoa pe aisea na ia faatauina ai tusi. Na faaPeretania, ae na te le iloa lava se Igilisi. Ma na taugata tele—toeitiiti lava 10 pasene o lona totogi i le masina. Sa leai le mafuaaga na te faatauina ai tusi sei vagana ai lana uunaiga faaleagaga. Sa ia vave amata loa se sailiga mo le lotu lea na tusia i luma o tusi: O le Ekalesia a Iesu Keriso o le Au Paia o Aso e Gata Ai.
Ina ua mavae le fesili atu i ni nai lotu, na iu ina taunuu o ia i le ofisa o le misiona a le Ekalesia i La Paz. Na te lei faalogo e uiga i le taui pe vaai i le faasalalauga i le nusipepa, lea na tatau ona faaalia i lena aso. Na te lei fesili mo se tupe, e oo lava i le toe totogiina o le 50 peso na ia totogia. Na taliaina e faifeautalai tusi ma le olioli ma totogi atu pea ia te ia le taui.
Na ia tau i faifeautalai o loo faatasi o ia ma se vaega Penetekoso ae na faalogo ma le filiga ao latou tau atu ia te ia e uiga i le talalelei. Na ia manatuaina le faitau i se mea e uiga ia Iosefa Samita mai se tamai tusi na ia pikiina i le auala i le lua pe tolu tausaga talu ai. Na ia taliaina lesona a faifeautalai, ma i le maea ai o le lesona lona lua, na ia tautino mai e papatiso. I le lua vaiaso mulimuli ane, ia Setema aso 11, 1977, i se Aso Sa i le aoauli i se paranesi i La Paz, Polivia, na papatiso ai Maria Cloefe Cardenas Terrazas ma lana tama tama o Marco Fernando Miranda Cardenas, e 12 tausaga.
Na suia e le Alii ou lagona malolosi o le leai o se faamoemoe ina ua leiloloa au tusitusiga paia i ni lagona maoae o le olioli i le vaaia o Lona aao ua faaalia. Na fetalai mai le Alii, “O le mea lea ou te fai atu ai ia te outou, o mea uma lava tou te ole mai ai ia outou tatalo, ina faatuatua ia o le a maua e outou, ona faia lava lea mo outou” (Mareko 11:24).
E faafofoga ma tali mai le Atua ia tatou tatalo pe afai tatou te faia i le faatuatua ia te Ia ma Lona Alo, o Iesu Keriso.