Fesili & Tali

“E i ai sau uo e lagonaina e pei e leai ni ana uo i le lotu sei vagana ai a‘u. O le a se mea e mafai ona ou faia e fesoasoani ai ia te ia?”

I le tulaga lenei, atonu o loo ia lagonaina le le amanaiaina, tuua toatasi, po o le vaivai. O le mea e lelei ai, ona o lau faauoga, e i ai ni nai mea e mafai ona e faia e faamalosiau ai ia te ia:

• Fesoasoani ia te ia e faauo atu i isi tamaiti o le autalavou. Faailoa atu o ia ia i latou, ia faaaofia o ia i au talanoaga ma i latou, ma fautua atu gaoioiga mo le autalavou o lau uarota e faamasani lelei ai le tasi i le isi. Ma le isi, e mafai ona e talanoa i lou peresitene o Tamaitai Talavou ina ia mafai ona fesoasoani mai o ia ma isi taitai.

• Fesoasoani ia ona iloa lona taua e faavavau. E mafai ona e ta’u atu ia te ia nisi o uiga lelei o loo e vaaia ia te ia.

• Fesoasoani ia ona manatua le alofa o le Faaola ma lou alofa. Na fetalai le Faaola, “O au nei o le leoleo mamoe lelei, ua ou iloa au mamoe, ua iloa foi a’u e a’u mamoe” (Ioane 10:14). E tusa lava pe manatu o ia e leai se tasi e malamalama, peitai, o le a silafia lelei e le Alii ona lagona. Tatalo mo ia, ma ioe, faaali atu lou alofa mo ia e ala i le faaaofia o ia i gaoioiga ma talanoa ia te ia i le lotu.

• Fautua atu i ai, ia liliu atu i tusitusiga paia ma le tatalo e faamalosia ai lo latou sootaga ma le Tama Faalelagi ma Iesu Keriso.

• Ae o le mea taua lava, ia uunai o ia e auai e le aunoa i le lotu, e tusa lava pe faigata ia te ia. Faamanatu atu ia te ia le taua o le tagofia o le faamanatuga ma le aoaoina o le talalelei i sauniga Lotu.

Afai e le vave ona aoga ou manatu, ia faaauau pea ona e i ai iina mo lau uo ma faamalosiau o ia e fai le mea sa’o.

Ia Malolosi Atu Faatasi

Ia uunaia ma fesoasoani ia te ia e fai atu i isi tagata talavou. Tatou te malolosi pe a na o i tatou taitoatasi, ae tatou te malolosi atu pe a faia faatasi. Fai atu i au uo o le a lelei atu ona ia fesoasoani i le faatupulaia o le malo o le Atua pe afai e i ai ni ana uo se toatele, o e o le a aoaoina o ia, avea ma se lagolago i lona olaga, ma fesoasoani ia te ia ia alofa ia Iesu Keriso ma Lana talalelei!

Scarlet M., 16 tausaga, Cautín Province, Chile

Valaaulia o Ia i Gaoioiga

Ina ua ou auai i le Ekalesia, sa ou lagona le tuuatoatasi, e ui ina sa taumafai nisi o le autalavou ia matou fegalegalea’i. Sa ou alu i gaoioiga o le Mutuale ma atili ai ona ou aofia i a latou talanoaga. Sa ou faalogo ia i latou ma tuuina atu lo’u sao. Sa ou ataata atu ia i latou ma faaali atu le fiafia moni ia i latou. O la’u fautuaga, ia e fesoasoani i lau uo e faasoa atu ona manatu ma lagona. Fesoasoani ia te ia ia auai i soo se gaoioiga a le Ekalesia, ma o le a amata ai ona fiafia i le faauoga a ni uo se toatele.

Faith O., 17 tausaga, Abia, Nigeria

Ia Faaaofia o Ia

Ou te taumafai e fesoasoani ia faaaofia lau uo i talanoaga ma gaoioiga faatasi ma isi talavou i le lotu. E mafai foi ona fesoasoani le talanoa atu i isi uo lelei e uiga i lagona o lenei uo. O le talosaga atu mo le latou fesoasoani ia faaaofia o ia e ono aumai ai le nofouta i isi uo i manaoga o lenei tagata, ma fesoasoani ai ia latou ia agalelei atili ma faaaofia o ia i talanoaga ma gaoioiga.

Trevor C., 14 tausaga, Idaho, ISA

Ta’u Atu ia te Ia Lona Taua ia te Oe

Sa faapena uma lava o’u lagona ina ua suia la’u uarota. E faigata tele lena tulaga. E taua le ta’u atu i lau uo lona taua tele, le tele o lona taua ia te oe, ma ona uiga lelei o loo i ai, ina ia ona lagona ai le lototele ma e le tatau ona fefe o ia. E taua uma lava i tatou. Uunai o ia e talanoa atu i se taitai, tatalo, ma faitau i tusitusiga paia e iloa ai e le o tuua na o ia.

Sharon G., age 14, Yucatán, Mekisiko

Ia Saunia e Fesoasoani Atu

E mafai ona e fesoasoani ia malamalama o ia, o i tatou uma o tagata o le aiga o le Atua, o uso ma tuagane, ma e tatau ona ia faaali atu le alofa ma fegalegalea’i ma tagata uma. Ma le isi, ta’u atu ia te ia, i totonu o le tatou aiga faaleagaga toatele, tatou te saunia i taimi uma e fesoasoani ma faamalosi i le tasi ma le isi. E tutusa uma lava la tatou sini o loo tatou taumafai i ai. I totonu o le talalelei, tatou te le lagona ai lava le tuuatoatasi.

Sister Anna Kaigorodova, Misiona a Moscow Rusia

Faalogo i le Taitaiga a le Alii

Tatalo mo ia ma ole atu i le Tama Faalelagi e fesoasoani ina ia e iloa le ala e mafai ona e fesoasoani ai ia te ia. Talanoa i ou taitai ma taumafai e faaaofia o ia i talanoaga ma isi teineiti i le lotu. Ia faaauau ona avea ma ana uo ma fai le mea sili e te mafaia, ma o le a fesoasoani atu le Alii ina ia e iloa le ala e fesoasoani ai ia te ia.

Anastasia B., 18 tausaga, Iuta, ISA

Talimalo i se Pati

E mafai e oe po o ia ona talimalo i se pati ma na o ni nai tagata mai le lotu. E lelei atu le faamasani i isi pe a o se vaega toalaiti.

Trais H., 13 tausaga, Idaho, ISA

Ta’u Atu ia te Ia E Le Tuua Lava Na’o Ia

O le mea muamua, tatou te tatalo mo lena tamaitai talavou ma valaaulia o ia i gaoioiga taitasi po o galuega fesoasoani, ina ia mafai ona ia lagona o ia o se tasi o le vaega. Ia aua ne’i o tatou tuuina soo se tasi e pau! Lona lua, Tatou te fai atu ia te ia, e le o tuua lava na o ia, o loo faatasi e le aunoa le Tama Faalelagi ma i tatou ma e alofa tele ma faavavau o ia ia i tatou. Tatou te faamanatu atu ia te ia le upusii mai lo tatou perofeta: “O le a i ai se aso tou te mafaufau ai i o outou olaga ma toe tepa i o outou taimi faigata, ma o le a outou iloa ai na i ai lava o Ia iina e le aunoa i ou autafa.” (Thomas S. Monson, “E Le Tuua Lava Na o i Tatou,” Liahona, Nov. 2013, 124).

Yenifer S., 18 tausaga, ma Fernando P., 18 tausaga, Tacuarembó, Iurukuei

O tali ua faamoemoe e mo se fesoasoani ma ni manatu ae e le o se faalauiloaga aloaia o aoaoga faavae o le Ekalesia.

O Se Uo Moni

“Tatou te taufai manaomia uma lava ni uo moni e alolofa ia te i tatou, e faalogo mai ia i tatou, e faasino mai ia i tatou le ala, ma molimau mai ia i tatou i le upumoni, ina ia mafai ai ona tatou faatumauina le mafutaga ma le Agaga Paia. E tatau ona avea oe o sea ituaiga o uo moni.”

Peresitene Henry B. Eyring, Fesoasoani Muamua i le Au Peresitene Sili, “O Uo Moni,” Liahona, Iulai. 2002, 32.

Fesili o Le a Sosoo Mai

“E mafai faapefea ona ou fesoasoani i au uo e faatoilalo ia faafitauli e pei o le palauvale po o le tele o taaloga faavitio?”

Auina mai lau tali ma, afai e manaomia, se ata manino lelei ae lei oo i le aso 15 o Setema, 2016, i le liahona.lds.org po o le i-meli i [e-mail].

Faamolemole ia aofia ai faamatalaga nei: (1) igoa atoa, (2) aso fanau, (3) uarota po o le paranesi, (4) siteki po o le itu, (5) lau faatagaga tusitusia, ma, afai e i lalo ifo o le 18 ou tausaga, o le faatagaga tusitusia a ou matua (e talia foi le i-meli) e lolomiina ai lau tali ma lou ata.

E ono faapupuuina tali mo le uumi po o le manino.