O Le Mea Tatou Te Talitonu I Ai
Tatou te Talitonu i le Tausiga o Tulafono e Sefulu
O Tulafono e Sefulu o loo maua i le Feagaiga Tuai (tagai Esoto 20:1–17), ae ua iloa e le Au Paia o Aso e Gata Ai, o na poloaiga e faatatau i augatupulaga uma, ae e le na o taimi o le Feagaiga Tuai. Sa aoao mai e Apinati ia Tulafono e Sefulu i le Tusi a Mamona (tagai Mosaea 12:33–36; 13:13–24), ma na toe faaali mai i latou e le Alii i le Perofeta o Iosefa Samita mo o tatou vaitaimi (tagai MF&F 42:18–29; 59:5–13).
E ui lava ina lafoai e le toatele o tagata i aso nei ia nei poloaiga, ae tatou te talitonu o loo aoga pea i latou. Na faamalamalama mai e Peresitene Thomas S. Monson:
“O amioga sa manatu muamua i ai e le talafeagai ma lē mama, i le taimi nei ua le gata ina onosaia ae ua manatu foi le toatele o tagata ua taliaina. …
“E ui lava ua suia le lalolagi, ae o loo tumau pea ia tulafono a le Atua. E le’i suia lava; ma o le a le suia lava. O Poloaiga e Sefulu e tonu—o poloaiga lava. E le o ni fautuaga. Ua tutusa lelei lava lo latou taua i aso nei e pei ona i ai foi i le taimi na tuu atu ai e le Atua i le fanauga a Isaraelu.”1
Tatou te le tautala leaga e uiga i isi ona o le le mulimuli i poloaiga. Ae, tatou te vaai ifo i o tatou lava olaga ma iloilo ai po o le a le lelei o loo tatou ola ai i aoaoga faalelagi ua tuuina mai ia i tatou.
O Tulafono e Sefulu ua faatusa i tulaga faatauaina autu o le amio, lea e mafai ona vaevaeina i ni vasega se lua: o le ala tatou te faia ai le Atua ma le ala tatou te faia ai isi. Ina ia fesoasoani ia tatou faatumauina le Atua i le totonugalemu o o tatou olaga, ua Ia poloaiina ai i tatou ia aua ne’i ifo atu i ni isi lava atua, ia tausia le paia o le aso Sapati, ma ia aloese mai le upuvale ma le ifo i tupua. Ina ia fesoasoani ia tatou alolofa i fanau a le Atua, ua Ia poloaiina ai i tatou ia ava i o tatou matua ma aua le gaoi, fasioti tagata, pepelo, mana’o, pe mulilua.
Ona o faaaliga faifaipea a le Atua i Ana perofeta, ua tatou aoao atili ai e uiga i mea ua Ia faamoemoe mai ia i tatou, ae e tumau lava ona avea Tulafono e Sefulu o se nofoaga lelei e amata ai i la tatou sailiga ia usiusitai. “O poloaiga a le Atua o se faailoaga o Lona alofa mo i tatou, ma o le usiusitai i Ana poloaiga o se faailoaga lea o lo tatou alofa mo Ia.”2
Ata na tusia e J. Beth Jepson