O Le Faamoemoe o le Alofa i le Aiga e Faavavau

Saunia e Peresitene Henry B. Eyring

Fesoasoani Muamua i le Au Peresitene Sili

Mai meaalofa uma ua tuuina mai e lo tatou Tama Faalelagi i Lana fanau, o le meaalofa silisili lava o le ola e faavavau (tagai MF&F 14:7). O lena meaalofa o le nonofo lea e faavavau i le afioaga o le Atua le Tama ma Lona Alo Pele i ni aiga. E na o malo aupito maualuga o le Atua, o le selesitila, o le a faaauau ai sootaga alofa o le olaga i le aiga.

O i tatou uma lava e faamoemoe mo le olioli o le nonofo ai i ni aiga agaalofa. Mo nisi o i tatou, o se lagona tatou te le’i oo i ai—o se lagona ua tatou iloa e mafai ona maua ae le’i oo i ai. Atonu na tatou vaai i ai i olaga o isi. Mo nisi o i tatou, o le alofa i le aiga ua foliga mai e sili atu le moni ma le pele pe a tuueseeseina i tatou e le oti mai se tamaitiiti, se tina, se tama, se uso, se tuafafine, po o se matua o matua agaalofa ma peleina.

Ua tatou lagonaina uma le faamoemoe ia i ai se aso tatou te toe lagona ai le alofa mafanafana a lena tagata o le aiga sa tatou matuai alofaina ae ua oi nei ia toe opoina.

E silafia e lo tatou Tama Faalelagi agaalofa o tatou loto. O Lona faamoemoega ia tuu mai ia i tatou le fiafia (tagai 2 Nifae 2:25). Ma o lea na Ia tuuina mai ai le meaalofa o Lona Alo ina ia mafai ai ona maua le olioli i sootaga faaleaiga lea e faaauau e faavavau. Ona sa motusia e le Faaola filifili o le oti, o le a faapea ona tatou toetutu ai. Ona sa Ia togiolaina a tatou agasala, tatou te mafai ai, e ala i le faatuatua ma le salamo, ona agavaa i le malo selesitila, lea e fusia faatasi ai aiga i le alofa e faavavau.

Na auina mai e le Faaola le Perofeta o Elia ia Iosefa Samita e toefuatai mai ki o le perisitua (tagai MF&F 110). Faatasi ai ma na ki na oo mai ai le mana o le faamauga, o le ofoina mai o le meaalofa sili a le Atua i Lana fanau—le ola e faavavau i aiga e fusia faatasi e faavavau.

O se ofo e mafai ona talosaga i ai atalii/afafine uma o le Atua o e e o mai i lenei lalolagi. O le tasivaetolu o Ana fanau agaga na teena Lana ofo i le lalolagi o agaga. Ona o le leai o se faatuatua ma le faaali atu o le fouvale aliali, sa latou filifili ai ia le iloa lava le olioli o le meaalofa a le Tama Faalelagi o aiga e faavavau.

Mo i tatou o e ua pasia le suega taua i le muai lalolagi o agaga, ma faapea ona agavaa ai e maua le meaalofa o tino faitino, o le filifiliga maoae o le ola e faavavau e a tatou lava e fai. Afai ua faamanuiaina i tatou e maua le talalelei toefuataiina, e mafai ona tatou filifili e osia ma tausia feagaiga a le Atua lea tatou te agavaa ai mo le ola e faavavau. A o tatou tumau i lena faamaoni, o le a faamaonia e le Agaga Paia lo tatou faamoemoe ma le talitonu o loo tatou i ai i le ala i le ola e faavavau, ia nonofo faatasi i ni aiga e faavavau i le malo selesitila.

Mo nisi, o lena olioli e faavavau e ono foliga mai o sina atagia tainane foi o se faamoemoega e galo atu. Atonu na fai e matua, fanau, uso, ma tuafafine ni filifiliga e foliga mai e faaleaoga ai i latou mo le ola e faavavau. Atonu foi e te mafaufau, pe mata ua e agavaa e ala i le Togiola a Iesu Keriso.

Sa tuuina mai e se perofeta a le Atua ia te a’u le fautuaga ua aumai ai ia te a’u le toafilemu. Sa ou popole ona atonu o le a le mafai ai e lo matou aiga ona faatasia e faavavau ona o filifiliga a isi. Sa ia saunoa mai, “Ua e popole i le faafitauli sese. Tau lava o lou ola agavaa mo le malo selesitila, ma o le a sili atu le matagofie o le faatulagaga o le aiga nai lo le mea e mafai ona e manatu i ai.”

Ia i latou uma o e ona o aafiaga faaletagata lava ia po o faaipoipoga ma fanau—po o le leai o na mea—ua lafo atu ai se puao i o latou faamoemoe, e tuuina atu la’u molimau: O loo silafia ma alofa le Tama Faalelagi ia te oe o Lona atalii/afafine agaga. A o e i ai faatasi ma Ia ma Lona Alo Pele a o le’i i ai lenei olaga, sa Laua tuuina i lou loto lou faamoemoe o loo i ai e uiga i le ola e faavavau. Faatasi ai ma le mana o le Togiola a Iesu Keriso e galulue faatasi ma le taitaiga a le Agaga Paia, e mafai ai ona e lagona i le taimi nei, ma o le a lagona i le lalolagi a sau le alofa o le aiga lea e matuai finagalo lou Tama ma Lona Alo Pele ia e mauaina.

Ou te molimau atu a o e ola agavaa mo le malo selesitila, o le folafolaga faaperofeta e faapea, “o le a sili atu le matagofie o le faatulagaga o le aiga nai lo le mea e mafai ona e manatu i ai” o le a fai mo oe.