O Le Auala Na Ou Iloa Ai
Sailiga mo le Atua
E alala le tusitala i Santiago, Dominican Republic.
Ou te le’i lagonaina lava se faalogona malosi o le toafilemu e pei ona sa ou lagonaina ina ua ou auai mo le taimi muamua i le seminare.
Pe tusa na’o le valu o ou tausaga, sa ou mafaufau ai e uiga i le natura o le Atua. I se tasi aso, sa faitau ai e lo’u tama le mau mai le tusi a Iakopo lea o loo folafola mai ai, afai e leai so tatou poto, e mafai ona tatou “ole atu i le Atua, e foai tele mai … i tagata uma, ma le le toe ta’uta’ua; ona foaiina mai ai lea ia te ia” (Iakopo 1:5). O na upu sa faatumulia ai lo’u loto ma sa tusia i lo’u mafaufau.
Ina ua na o a’u i totonu o lo’u potumoe, sa ou tatalo i le Atua, ma fesili atu ia te Ia e ta’u mai ia te a’u pe na sa’o le lotu sa ou auai. Sa ou manao ia te Ia e tali vave mai. Ae sa lei tupu lena mea. Sa le’i faia e le Atua le mea na ou manao i ai, ma sa ou faanoanoa ona sa le’i vave tali mai o Ia i la’u tatalo. Sa ou fia iloa! Sa ou faia le mea sa ou manatu ua lava.
O le tuputupu a’e, sa ou maua ai le avanoa e saili ai i le tele o lotu mo le tali. A o ou faia, sa atili ai lava lo’u fenumia’i. Sa feteenai le tasi ma le isi, ma sa na ona latou sopo loa i a’u fesili e uiga i le natura o le Atua.
I tausaga mulimuli ane, ona o le lelava i le sailiga, sa ou faapea ai, “Ua leai se tali.”
Sa amata ona ou faia mea sa faia e le autalavou i aso nei, e pei o le alu i pati ma le auai i le tele o mea fiafia a le lalolagi. O vaiaso taitasi sa atili ai ona ou magoto atu i le pogisa ona sa le lelei a’u faaiuga. O mausa leaga sa faapea foi ona ou taumamao ai mai lo’u aiga, o e sa lagolagoina a’u i taimi uma.
Peitai sa toe foi mai ia te a’u le manao e ole atu i le Atua. Sa ou tatalo, “Le Tama e, o loo o’u faatalitali atu iinei. Sa ou sailiili, ae ou te le’i mauaina lava. O loo folafola mai e tusitusiga paia ia tali, ae e leai se mea o oo mai. Silasila mai ia te a’u. Ua na o a’u. Ou te fia iloa, ae ou te le iloa pe faapefea ona maua Oe.”
I le na lava taimi—e le’i tupu muamua pe na toe tupu mulimuli ane, ae i le taimi tonu lava na ou manaomiaina ai—sa ou lagonaina le malosi o le mu o lo’u fatafata e pei sa i ai i totonu o a’u se maugamu. Sa le mafai ona ou taofiofia loimata. Sa ou iloaina o le tali lea i la’u fesili.
I le aoauli, a o ou i ai i le aoga, sa ou mafaufau ai e uiga i la’u tali, ae fesili mai loa la’u uo lelei ia te a’u, “O le a le mea o loo e mafaufau i ai, Isamaeli?” Ou te le’i tuuina atu ia te ia se tali sa’o, ma fai atu ia te ia sa ou mafaufau i le matafaga ma sa ou fia alu e vaai i le oso a’e o le la i le taeao. Sa ou valaauliaina o ia ma te o.
“E le mafai,” sa ia fai mai ai, ma ataata.
“Aisea?” Sa ou fesili atu ai ia te ia. “O a au mea e fai i le taeao po?”
“Seminare” sa ia fai mai ai.
“Seminare? O le a le seminare?” Sa ou fesili atu ai ia te ia. Sa ia faamatala mai ia te au, o ni vasega sa fai e lana ekalesia.
“O le a le umi talu ona e alu i se lotu?” Sa ou fesili atu ai ia te ia, ma le te’i.
“O le umi lava e mafai ai ona ou manatua. O au o se tagata o Le Ekalesia a Iesu Keriso o le Au Paia o Aso e Gata Ai.”
Sa ou fai atu ia te ia ou te fia alu e vaai. Sa ou iloaina i totonu [o lo’u loto] o le tali lea i tele o tausaga o o’u tatalo.
O le aso na sosoo ai, sa ou ala i le 5:30 i le taeao ma alu atu i le seminare. O le mea na sili ona ou te’i ai, ona sa latou suesueina le Tusi Paia. E mafai ona ou faapea atu, ou te le’i lagonaina muamua lava se faalogona malosi o le toafilemu e pei ona sa ou lagonaina ina ua ou ulu atu i le falelotu o le paranesi i Matancita, i le Dominican Republic, lea sa faasoaina ai aoaoga faavae mama, e matagofie i se agaga sa faapea ona sailia ma le naunautai. O viiga sa faatumulia ai lo’u mafaufau ma lo’u loto i se manatu: “O le mea moni lenei.”
Sa ou faapea, “Oka, ou te manao e lagona lenei mea i aso uma.” Sa ou fesili po o afea e mafai ona ou toe sau ai, ma sa tuu mai e le faiaoga, o le uo a lo’u tina, aso ma taimi faatulagaina o le vasega ma valaaulia foi a’u ou te sau i sauniga a le paranesi i le Aso Sa.
Talu mai lava lena taimi, o Aso Gafua e oo i Aso Faraile uma lava, ou te ala ai i le 5:30 e alu i le seminare ma Aso Sa uma i le lotu. Sa le mafai ona ou misia. Na ou mauaina le mea sa ou sailia i taimi uma lava.
O le mea e faanoanoa ai, sa leai ni faifeautalai e aoaoina ma papatisoina a’u. Ina ua mavae se tausaga ma le afa ma le tele o tatalo, sa taunuu mai loa faifeautalai ma aoaoina au i lesona uma a faifeautalai i totonu o se vaiaso. Ou te manatua le taimi na loloina ai a’u i totonu o vai lanumoana o le matafaga matagofie a le matou nuu.
O lenei ua ou fiafia i le faamanuiaga o le le toe avea ma se tagata ese po o e aumau (tagai Efeso 2:19 ae o se uso o i latou uma o e ua ui atu i le ala a le Alii, le ala sa’o ma le vaapiapi.