Fesoasoani i le Autalavou ia Aoao Atu

Saunia e Brian K. Ashton

Fesoasoani Lua i le Au Peresitene Aoao o le Aoga Sa

E tatau i le autalavou ona aoao atu, ma faatasi ai ma ni fesoasoani, e mafai ona latou aoao lelei atu.

E tatau i le autalavou ona aoao atu. Sa faamanino mai e le Alii le mea lenei ina ua Ia lisiina mai tiute o se ositaulaga:

“O le tiute o le ositaulaga o le talai atu, aoao atu, faamalamalama atu, apoapoai atu, ma papatiso atu, ma faamanuia le faamanatuga.” (MF&F 20:46; faaopoopo le faamamafa).

E na o ni nai fuaiupu mulimuli ane, o loo faasafua atu ai e le Alii le tiute ia aoao atu ma faamalamalama atu i aoao ma tiakono (tagai MF&F 20:58–59). O le mea moni, e manaomia e alii talavou ma tamaitai talavou uma le avanoa e aoao atu ai mai i lea taimi i lea taimi.

O Aoga o le Aoao Atu e Isi Talavou o Isi Talavou

O Iesu Keriso o le faiaoga atoatoa lea. O le aoao atu e fesoasoani ai i le autalavou ia mulimuli i le faataitaiga a le Faaola ma avea atili ai e pei o Ia. O le aoao atu foi e saunia ai i latou ia avea ma ni faifeautalai, matua, ma ni taitai i le Ekalesia. A aoao atu le autalavou, e tatau lava ona latou suesue i le talalelei ma ola ai. E i ai foi ia i latou le Agaga ina ia mafai ona aoao atu (tagai MF&F 42:14). O le taunuuga, o faiaoga autalavou, e masani lava ona tele atu mea [latou te] aoaoina ma maua ai se molimau malosi atu e uiga i le autu nai lo o tagata o le vasega.

Ma le isi, o le autalavou e aoao atu, latou te maua le to’a, aoao i tomai faafaiaoga, ma amata ona iloa mea latou te le iloa. O le autalavou o e na maua le avanoa e avea ai ma ni faiaoga e aoao foi ia avea ma ni tamaiti aoga ma ni tagata lelei atu o le vasega.

Ae o le mea e sili atu, o le autalavou na aoaoina e faapea foi ona faamanuiaina. E masani ona faalogo ma tele ina auai le autalavou pe a aoao atu la latou tupulaga. E faamalosia ai faauoga a o talanoa le autalavou i autu o le talalelei a o faatasi ai le Agaga. Ma e masani lava ona mafai lelei e le autalavou ona fesoasoani i le tasi ma le isi ia galulue e ala i a latou faafitauli masani.

E Mafai Faapefea ona Fesoasoani Taitai Matutua i le Autalavou ia Manuia?

Pe a aoao atu ia autalavou, e nafa taitai matutua mo le faamautinoaina o le amio talafeagai ma se siosiomaga faaleagaga.

E mulimuli taitai matutua i le Agaga pe a valaaulia le autalavou e aoao atu.¹ O nisi o le autalavou e le’i sauni e aoao atu, e ao ai i taitai ona faaeteete e aua ne’i lagona e nei tagata talavou le le toafimalie. Atonu ua saunia nisi o le autalavou e aoao atu na o se vaega o se lesona, ae o isi e mafai ona aoao atu se lesona atoa. I vasega toalaiti, ia mautinoa e taitai e le talosagaina soo le autalavou e aoao atu. Ma le isi, o nisi o lesona, ae maise lava lesona o autu faigata, e sili atu ona aoaoina e tagata matutua. Ma le isi, e manaomia ona vaaia e autalavou le faataitaia e taitai matutua o mataupu faavae sao o le aoao atu.

E mafai e taitai matutua po o matua ona galulue taitoatasi ma le autalavou e fesoasoani ai i le saunia o a latou lesona. O lenei fesoasoaniga e aofia ai le fai atu i le autalavou e faitau le lesona ia le itiiti ifo ma se vaiaso a o le’i faia,² fautua atu ia i latou e tatalo mo le mea e finagalo le Tama Faalelagi latou te aoao atu, faia o se fuafuaga o le lesona, ma faataitai le aoaoina atu faatasi o le lesona. A o maua e le autalavou faaaliga i le taimi o le faagasologa o le tapenaga, e mafai e taitai ona fesoasoani ia latou iloa ai o le faaaliga lava lena.

E mafai e taitai matutua ona fesoasoani i faiaoga talavou e fatu ni fesili e faaosofia ai le talanoaga, valaaulia le musumusuga a le Agaga Paia, ma fesoasoani i tamaiti aoga ia iloa upumoni mo i latou lava. E mafai foi i taitai ona fesoasoani i le autalavou ia iloa ona filemu pe a uma ona tuu atu se fesili e tuu atu ai se taimi i tagata o le vasega ia maua ai se faaaliga.

I le taimi o le lesona, e mafai e taitai matutua ona faasoa atu ni aafiaga patino ma ni molimau, e fesoasoani i le autalavou ia iloa e le o tuua na o i latou i o latou luitau ma tuu atu ia i latou le faamoemoe e faatoilalo ai. E manaomia e le autalavou le atamai ma le poto masani e ofo atu e taitai matutua. E tatau foi i taitai ona faamanino aoaoga faavae pe a manaomia ai.

Ia aloese taitai matutua mai le faoa o le lesona e tusa lava pe o tau taumafai atu pea le faiaoga talavou. Ae peitai, e mafai ona saunia taitai e tuuina atu le lagolago e ala i le suesue mamao i mea o le lesona ma tatalo mo ni auala e sili ona lelei e fesoasoani ai i le faiaoga talavou.

E Mafai e le Autalavou ona Aoao Atu, ma Lelei le Aoao Atu

Talu ai nei na talosagaina ai a’u ou te suimomo’e e aoao le vasega 12 ma le 13 tausaga o le Aoga Sa a la’u uarota. Sa ou fesili atu i lo’u atalii e 13 tausaga, e fesoasoani ia te a’u i le aoao atu. Sa ma faia faatasi se fuafuaga o le lesona. Sa fai e Iakopo le afa muamua o le lesona, ma faaali atu se vitio puupuu, faasoa atu mau e faatatau i le ma autu, ma fai atu ni fesili sa mafaufauina lelei. Sa fesili atu foi Iakopo i tagata o le vasega po o le a le mea na latou lagonaina ma fesoasoani ia latou iloa le Agaga Paia.

I le afa lona lua o le vasega, sa ou tuu atu i tagata o le vasega e aoao atu i le tasi ma le isi le Uluai Faaaliga. Ona ma valaauliaina lea o i latou e aoao atu le Uluai Faaaliga i o latou aiga i le afiafi faaleaiga. Ina ua uma le vasega, sa ma auina atu se imeli i matua e logoina ai i latou e uiga i le ma valaaulia.

Ina ua ou fesili atu ia Iakopo po o a ni ona lagona e uiga i le lesona, sa ia fai mai, “Sa matuai manaia lava. Ou te iloa sa i ai iina le Agaga aua ou te le’i mafaufauina e mafai e tagata o la’u vasega ona tali a ta fesili, ae sa latou taliina.”

E tatau i le autalavou ona aoao atu, ma e mafai ona e fesoasoani ia latou manuia. Pe a latou faia, o le a tuputupu a’e a latou molimau, ma o le a lelei ona saunia i latou e avea o ni faifeautalai, matua, ma taitai i le Ekalesia. Ae o le mea e sili ona taua, o le a avea atili i latou e pei o le Faaola.