Seia Tatou Toe Feiloai
Vavega
Mai le “Miracles,” New Era, Iuni 1975, 39–44, o se tusiga na sii mai se saunoaga na tuuina atu i le faigalotu a le Iunivesite o Polika Iaga i le aso 18 o Fepuari, 1953. Ua faatulagaina faailoga, mataitusi tetele, ma le tetele o parakalafa.
“Alu se feau i alii faifeautalai; e le o lelei tele la’u faalogo.”
Ua sili laitiiti ma se tausaga talu ai, na o mai ai i totonu o lo’u ofisa se ulugalii ma sii mai se tamaitiiti laitiiti. Sa faapea mai le tama ia te a’u, “Ua lua aso o ma anapogi ma lo’u toalua, ma ua ma auamaia si a ma tamaitiiti mo se faamanuiaga. O oe lea na auina mai matou i ai.”
Sa ou faapea atu, “O le a le mea ua tupu ia te ia?”
Sa la’ua fai mai, sa fanau mai o ia e tauaso, tutuli, ma gugu, e le galulue faatasi ona musele, ma ua lima tausaga e le’i mafai lava ona totolo.
Sa ou faapea ifo ia te a’u lava, “Ia o lea la. ‘Ua na o le anapogi ma le tatalo e o ese ai mea faapenei’ [tagai Mataio 17:21].” Sa i ai lo’u faatuatua atoa i le anapogi ma tatalo a na matua. Sa ou faamanuiaina lena tamaitiiti, ma o ni nai vaiaso mulimuli ane, sa ou mauaina ai se tusi: “Uso Cowley, maimau pe ana mafai ona e vaai i le ma tamaitiiti i le taimi nei. Ua totolo o ia. A matou togiina se polo i le isi itu o le fola, e topetope atu i ai i ona lima ma tulivae. Ua mafai ona pupula. A patipati o matou lima i luga a’e o lona ulu, e te’i o ia. Ua mafai ona faalogo.”
Na togi solo o fomai ma fai mai ua leai se mea latou te mafaia. Na suitulaga mai i ai le Atua. …
Sa ou alu atu i se fale i se nuu laitiiti i Niu Sila i se tasi o aso. O iina sa tapena ai e tuafafine o le Aualofa le tino [maliu] o se tasi o le latou Au Paia. Sa latou tuuina lona tino i le pito i luma o se fale tele, e pei ona latou ta’ua ai, o le fale lea e o mai i ai tagata e tagitu’i ma tagiaue ma faavauvau ai i le tagata maliu, ae natinati mai loa i totonu le uso o le alii ua maliu. Sa ia fai mai, “Faauu o ia.”
Ae na fai mai tagatanuu talavou, “Aisea, e le tatau ona e faia lena mea. Ua maliu o ia.”
“Tago oe e fai!”
… Sa ma i ai faatasi [ma se toeaina Maori faamaoni]. … Sa tootuli ifo le tagatanuu talavou ma faauu lenei alii. Ona tootuli ifo ai lea o lenei toeaina maoae atamai ma faamanuia o ia ma poloaiina o ia e tulai.
A outou vaai i le taape a tuafafine o le Aualofa. Sa saofai a’e o ia ma fai mai, “Alu se feau i alii faifeautalai; e le o lelei tele la’u faalogo.” … Sa matou fai atu ia te ia, na faatoa uma ona faauuina o ia, ma sa ia faapea mai, “Oi, o lena la.” Sa ia fai mai, “Sa ou oti. Na mafai ona ou lagonaina le toe foi mai o le ola i totonu ia te a’u, pei lava o se palanikeke o loo talatala.” Sa umi atu o soifua o ia nai lo lona uso lea na sau i totonu ma fai mai ia i matou e faauu o ia. …
E i ai i le Atua le pule i nei elemene uma. E mafai e oe ma a’u ona aapa atu, ma afai o Lona finagalo lea, e mafai ona tatou aumaia na elemene i lalo o la tatou pule mo Ana faamoemoega.