O Le Tama’i Fagu o le Filemu
E alala le tusitala i Iuta, ISA.
Aisea o le a ave ai e Tamamatua se atigifau e leai se mea o i ai ia Gage?
“Ou te tuuina atu ia te outou le manuia, o lo’u manuia ou te avatu ai ia te outou” (Ioane 14:27).
Sa faataupupula atu Gage i le tama’i fagu tuai e leai se mea o i totonu ma fefulisa’i i luga o ona lima. Sa laitiiti ma lanumeamata puaoa, ma se momono i le pito i luga. Sa tuuina atu e Tamamatua Russell ia te ia ina ua uma lona papatisoga.
“O le a lea mea?” na fesili ai Gage. “Ou te iloa o se fagu—ae e le o i ai se mea i totonu.”
“Oi, o loo tumu,” na fai mai ai Tamamatua.
Sa lulu e Gage le fagu. “Ae, o la’u vaai e leai se mea o i ai.”
Na ata Tamamatua. Sa ia aveesea mai le momono ae tuutuu atu faalatalata le fagu i le taliga o Gage. “O e faalogo atu i ai?” sa ia musumusu ai.
“Faalogo i le a?” Sa toe musumusu atu ai Gage.
Sa ataata tamamatua. “Filemu,” na ia fai mai ai. Sa ia toe faamauina le momono o le fagu. “I le lalolagi i aso nei, ua fai lava si faigata ona maua o le filemu. E pei o le vai mai le fomai, ma o mataua taitasi e taua pei o le auro.”
Sa faafetai atu Gage ma ave le meaalofa ese lava a Tamamatua i le fale. Peitai sa le’i mafaufau tele i ai o ia.
O ni nai vaiaso mulimuli ane, ma maliu ai Vini le uso matua o lona tama. Ina ua uma le falelauasiga, sa toatele tagata o le aiga sa tumutumu i le potu i luma o le fale o Gage e asiasi atu. Sa sola Gage i lona potumoe ma tapuni le faitotoa. Sa ona lagona atu leo o ona matua ma ona aiga i lalo o le potu tele.
Sa iloa atu e Gage le tama’i fagu tuai lanumeamata o loo tutu i luga o lana kesi ma uu mai loa. Sa ia fefulisaia i luga o ona lima. Na fai mai Tamamatua o le filemu sa pei lava o se vai mai le fomai. Sa manaomia e Gage ona maua sina toafilemu ma se faamafanafanaga i le uma ai o le maliu o Vini, le uso o lona tama.
Sa se’i ese e Gage le momono mai le fagu ma faasipa le gutu o le fagu, ma faafoliga o loo liligi mai i fafo sina filemu. Sa ia iloaina sa le’i tumu mo’i le fagu i le filemu. Ae sa ia iloaina, sa ia manaomia sina taimi paganoa ia lagona ai le latalata atu i le Atua.
Sa ia lagona le amata ona tumu o ona mata i loimata. O le a le toe i ai iina le uso o lona tama, o Vini—e le toe i ai ni mea ula faavalevalea, le toe i ai ni piiga ma ia. Sa tiga le loto o Gage ona o le misia o ia.
Ma i le filemu, na lagona ai e Gage se faalogona mafanafana o tupu a’e i totonu o lona loto ma tuuitiitia ai le tiga. Sa ia manatuaina sa le aluese atu Vini e faavavau; sa na ona me’i atu o ia i le isi lalolagi. Ona o Iesu Keriso ma le ata o le faaolataga, o le a ola ai e faavavau tagata uma. Sa iloa e Gage e i ai se aso o le a ia toe vaai ai ia Vini le uso o lona tama.
A o ia uuina le fagu, sa lagona e Gage le toafilemu i totonu. Sa ia iloaina na mafua ona o le Agaga Paia ae le o le fagu. Sa na ona faamanatu atu e le fagu ia te ia, e filemu ina ia mafai ona ia lagona le Agaga Paia. Sa ia toe momonoina le fagu ma toe tuu i lalo.
Ona toe alu atu loa lea i le potu i luma e faatasi ai ma lona aiga. E mafai ona ia tauave le toafilemu ma le mafanafana o le Agaga Paia i totonu ia te Ia, e faapena foi i fafo o lona potu filemu.