Faigaluega: Tele o le Faatuatua, ma Meaafale Itiiti

Lenine Santiago Duarte Nazareno, Salvador, Bahia, Pasila

Ina ua ma faaipoipo ma lou toalua, sa ou le faigaluega. Sa laiti lava ni a ma’ua meaafale, ae sa tele lo ma alofa ma tele lo ma faatuatua.

Ina ua iu ina maua la’u galuega, sa manaomia ai ona ou faigaluega i afiafi o Aso Sa. Sa ou folafola atu i le Alii o le a ou le faigaluega i Lona aso. Ae sa ou nafa lava ma le tuuina mai o mea e manaomia e lo’u aiga. Ae ui lava i lea, sa le’i aluese mai lo’u mafaufau i la’u folafolaga sa fai.

Na oo mai la’u tali i le Aso Sa na sosoo ai a o usuina le “Faafetai mo le Sapati” (Viiga, nu. 177) ma iloa ia le taua o le aso Sapati. Ina ua ou iloaina o le fetuunaiga o se taimi faigaluega fou sa le o se filifiliga, na ou faamavae ai loa mai la’u galuega. Sa faasolo pea le olaga, ma le talitonu o le a tausia i ma’ua e le Alii. Sa faigaluega lo’u toalua e tausi ai i ma’ua, ma sa maua le ma tama teine muamua o Saria. O le taimi lea, sa ou aveina ai se kosi enisinia o mea tau eletonika, na faaaogaina ia le Tupe Faaagaga mo Aoga. Ae sa leai lava se galuega na maua.

Sa faapea ona toe foi lo’u toalua e faigaluega ina ua tolu masina talu ona fanau Saria, ae sa matuai misia tele o ia e Saria. Sa ma tatalo ina ia iloa ai le mea e fai, ma tonu ai e nofo o ia mai le galuega. Sa pei sa le faautauta, ae sa ma lagona o le mea lea na tatau ona ma faia. E fa masina o matou maua se tupe maua mo tagata e le o i latou lava ua mafua ai ona leai ni galuega, ina ia su’e ai sau galuega, ma i se taimi talafeagai lava, na maua ai sa’u galuega le tumau.

Ina ua fanau le ma tama teine lona lua o Amanda, sa iu loa ina ou maua se galuega faataitai e aoao ai, ae sa tumau lava le tulaga faigata. Sa itiiti lava a matou meaafale na i ai ma leai se galuega mautu. E faalua ona ou auai i le kosi o le tomai faapitoa o le ola tutoatasi na ofoina mai e le Ekalesia. Sa ou faia le mea na sili ona lelei, e ui lava na le a’ua’u si tupe itiiti na ou mauaina mo mea autu sa matou manaomia.

E sefululima masina talu ona amata la’u galuega faataitai e aoao ai, ona maua ai lea o la’u galuega o loo i ai nei. O loo avea nei a’u o se enisinia i le fuaga o le malosiaga tau eletise i se nofoaga fai faatau tele. Ou te faigaluega i le Aso Gafua e oo i le Aso Faraile, lea ou te ta’ua o se vavega i lenei ituaiga falefaigaluega. O isi a’u soagalulue e faigaluega i Aso Sa ma aso malolo. Ua i ai se matou fuafuaga faataatia mo le soifua maloloina ma meaafale! Ua ou iloa o le Alii ma le Tupe Faaagaga mo Aoga na alai ona ou oo mai iinei. Ua ou iloa afai e fai la tatou vaega, o le a fai e le Alii i taimi uma Lana vaega, ma o le a mafai ona tumau lo tatou ola tutoatasi.