O Oe e Tautupu
Mai i saunoaga a le Ofisa o Aoga a le Ekalesia, “Like a Watered Garden” ma le “A Regal Identity,” na fofogaina i Niu Ioka, ISA, i le aso 13 o Setema, 2015.
Ola e tusa ma lou taua e faavavau.
Ata o laau © iStock/Thinkstock
A o i ai lo matou aiga i Atenitina i se tofiga mai le Ekalesia, sa masani ona ma asiasi ma la’u tama tama i nofoaga taua i o ma’ua taimi avanoa. O se tasi o na nofoaga o se pa manu e le pei o se isi lava pa manu na ma vaai muamua i ai.
Nai lo o le ui atu i autafa o pa o manu tautulemomoe, sa valaaulia tagata asiasi e o atu i totonu o pa e milimili ia manu. O le mulimuli ai i le tagata e aoaoina manu, sa matou o atu ai i totonu o se lotoa na saunia mo leona ma milimili i latou a o foliga mai sa latou le ano mai ia i matou.
Sa ou fesili atu i tagata e aoaoina manu pe na faapefea ona latou tauanauina na manu sauai ia le aia i matou. Sa latou tatai atu lou mafaufau i ni tamai taifau malomaloa sa faapena foi ona nofoia ia pa. A o laiti ia liona, sa fetulina’i solo ma le faalealofa e na tamai taifau ia leona ma gali o latou mulivae. Na oo ina masani tamai liona i le faapupuu i le tulimanu, i le fefefe i taifau.
A o ola a’e liona, sa faaauau ona latou faapupuu i le fefefe. O le minoi lava o se alofilima po o se alofivae o se manu, e faigofie ai lava ona taufetuli atu na taifau, ae sa le’i iloa e leona i latou lava i le ituaiga manu e i ai moni i latou. Latou te le’i nofouta i lo latou faasinomaga mamalu ma gafatia.
Tatou te feagai uma lava ma ni faalavefau e faoa lo tatou talitonu ia i tatou lava ma tumau ai ona tatou faapupuu i tulimanu faafaatusa. Ou te ta’ua ni mea se tolu.
Leai o se Talitonu ia i Tatou Lava
O le toatele o i tatou e matele i le faavasega o a tatou faatinoga e ala i mea tatou te toilalo ai nai lo o mea tatou te manuia ai. Afai e sa’o ni a tatou fesili se 80 mai le 100, tatou te ioe ma le faanoanoa ua tatou misia fesili e 20 nai lo o le matauina ma le mitamita o le 80 na sa’o. O le leai o se talitonu i o tatou gafatia ma ia i tatou lava, e mafai ona faatauaso ai i tatou i lo tatou agavaa ma gafatia moni.
Le Atoatoa o le Malamalama
Sa vaai Nifae i se faaaliga i le tina o le Faaola, ae ina ua fesiligia pe ua malamalama i le afio ifo o le Atua, sa ia ioeina na te le’i iloa le uiga o mea uma. Ae sa ia ta’ua muamua le mea na ia iloa: “E alofa le [Atua] i lana fanau” (tagai 1 Nifae 11:12–17). O le mea aupito taua lena ia iloa. E taofia ai i tatou mai le faatagaina o faalavefau o le le atoatoa o le malamalama ia fetuunai lo tatou mautinoa o le moni o le Ekalesia ma lo tatou sootaga ma le Atua ma Lona alofa tumau ma mamana mo i tatou.
Faatamala po o le Le Mataala
O filifiliga leaga po o le le ano i filifiliga lelei e faasese ai le uiga o lo tatou vaaiga o le mea moni. Sa i ai se mafuaaga faafaailoga sa tatau ai i le fanauga a Isaraelu ona ao mai le manai i aso uma (tagai Esoto 16:4). O le matafaioi i aso uma o le ao mai o meaai sa fesoasoani ia i latou e manatua ai le Atua. O aso nei, o le faitauga o tusitusiga paia, tatalo, auai i le lotu, ma le auauna atu i le tasi ma le isi, o a tatou manai ia i aso taitasi o ni fanau a le Atua, e fesoasoani ina ia tatou manatua ai le Alii.
Ua ia i tatou le DNA faaleagaga a le Atua o loo fealuai solo i o tatou alatoto. O i tatou o Ona atalii ma afafine ma o Ona tofi. Tia’i ese soo se savali, talitonuga, po o mausa taufaasese, lea e mafua ai ona e faapupuu i tulimanu o lou olaga. Aua ne’i faatagaina i latou e gali i ou mulivae ma e lagona ai le fefe po o le tiga. Ola e tusa ma lou taua e faavavau. O oe e tautupu.