Vuli Mai vei Alama kei Amuleki

November 2016

Vuli Mai vei Alama kei Amuleki

Mai vei Peresitedi Dieter F. Uchtdorf

iKarua ni Daunivakasala ena Mataveiliutaki Taumada

Sa noqu inuinui ni o ira era sa lakotani mai na salatu ni bula vakatisaipeli me ra rai ena yalodra, ka vuli mai vei Alama kei Amuleki.

O Alama Lailai

Dua vei ira na tamata guilecavi dredre ena ivolanikalou o Alama Lailai. Dina ga ni luvena e dua na parofita qaqa, e dua na gauna a gole tani mai na salatu ka yaco me dua na “tamata ca ka dauqarava na kalou tani.” Eda rawa ni kaya ena vuku ni ka oqo, a saqati tamana vakalevu ka saga me vakarusa na Lotu. Ena vuku ni nona vosa laulau ka dauveirawai, a tamata qaqa sara.¹

Ia a qai veisau na bula nei Alama ena nona a rairai vua e dua na agilosi ni Turaga ka vosa mai me vaka na domo ni kurukuru. A yaco vei Alama me siga tolu ka bogi tolu, na “yaluma e sega ni tukuni rawa, … sa rarawa vakalevu na yalo[na].” Ni oti oya, a nanuma lesu rawa ka vakararamataka na buto ni nona vakasama—e dua na dina tawamudu, a vakavulica o tamana: ni na yaco mai o Jisu Karisito me mai “bokoca na nodra ivalavala ca na kai vuravura.” Sa balavu mai nona sega ni vakadinata tu kina o Alama na ivakavuvuli oqo, ia oqo sa mai “nanuma rawa na ka oqo,” ka vakararavi ena yalomalua ka vakaidina ki na kaukauwa ni veisorovaki i Karisito.²

Ni sa lasika cake mai o Alama mai na ka oqo, sa yaco me tamata veisau. Tekivu mai na gauna o ya, sa solia kina na nona bula me vakavinakataka na veika ca sa cakava oti. Sa mai dua o koya na ivakaraitaki kaukauwa ni veivutuni, veivosoti, kei na yalodina gugumatua.

Sa laki digitaki kina o Alama me sosomitaki tamana me liutaka na Lotu ni Kalou.

O ira kece na lewenivanua yadua e Nifai era sa rairai kila na italanoa kei Alama. Ena rairai oso na Twitters, Instagrams, kei na Facebooks ni nona gauna ena kena iyaloyalo kei na italanoa. Ena rairai tabaki talega ena veigauna ena waqa ni Zarahemla Weekly ka yaco me ulutaga ni edita, kei na itukutuku digitaki. Me ivakaleka, a rairai tamata rogo sara ena nona gauna.

Ia ni sa raica o Alama ni ra sa guilecava na Kalou o ira na nona tamata ka vakalevulevui ira cake ena dokadoka kei na veicacati, sa lewa me sa vakacegu mai na itutu ni veiliutaki ka vakatabakiduataka na nona bula ki na “cakacaka vakabete levu,”³ me vunautaka na veivutuni vei ira na Nifai.

Taumada, a sotava mai na veika qaqa o Alama—o ya, me yacova ni sa laki gole yani ki na korolevu o Amonaia. Era sa kila vinaka tu mai na lewe ni korolevu o ya ni sa sega tale ni nodra iliuliu vakapolitiki o Alama, ka sa sega ni rokova na nona itutu ni lewa vakabete. Era a vosabeci koya, vakalialiai koya, ka cemuri koya tani mai na nodra korolevu o ya.

Ena yalo luluqa, a sauvuki mai o Alama mai na korolevu o ya o Amonaia,⁴

Ia sa vosa mai vua e dua na agilosi me lesu.

Mo vakasamataka mada: sa tukuni tale vua me lesu kivei ira na tamata era cati koya ka vakacacana na Lotu. E a ilesilesi rerevaki ka rairai rawa ni vakamatei kina. Ia a sega tale ni wawa o Alama. A “lesu kusarawa.”⁵

A lolo tiko mai ena vuqa na siga o Alama ena gauna sa curuma yani kina na korolevu o ya. E kea a kerea kina e dua na tamata a sega tu ni kila “ke rawa beka mo vakania mada na tamata ni Kalou oqo.”⁶

Amuleki

Na yacai koya na tamata oqo o Amuleki.

E lewenivanua vutuniyau o Amuleki, ka kilai levu sara e Amonaia. E dina ga ni ra tamata vakabauta na nona kawa mai liu, ia sa mai luluqa voli na nona vakabauta. E muri a qai vakatusa kina, “Raica au sa kacivi oti vakavuqa kau sega ga ni via rogoca; au sa kila tu na veika oqo, ia au sega ga ni [vakadinata]; au sa ivalavala ca tikoga ka talaidredre vua na Kalou.”⁷

Ia na Kalou sa vakarautaki Amuleki tiko, ni gauna a sotavi Alama kina o Amuleki, a vakacuruma na italai ni Turaga ki nona vale, ka tiko kina e kea o Alama ena vuqa na siga.⁸ Ena gauna o ya, sa dolava kina o Amuleki na yalona ki na itukutuku nei Alama, ka yaco vua e dua na veisau totoka sara. Vakatekivu mai kea, a sega walega ni vakadinata o Amuleki; ia a yaco talega me dua e tutaka qaqa na dina.

Ena gauna sa gole tale kina o Alama vei ira na tamata mai Amonaia me vakavulici ira, sa gole vata kei na ikarua ni ivakadinadina-o Amuleki, e dua ga vei ira e kea.

Na veika a yaco sa mai dua kina na itukutuku kamica ka gaga ena ivolanikalou taucoko. Sa rawa mo wilika ena Alama wase 8–16.

Nikua, au kerea mo ni raica mada e rua na taro oqo:

iMatai: “Na cava au rawa ni vulica mai vei Alama?”

iKarua: “Au sa vakataki Amuleki vakacava?”

Na Cava Au Rawa ni Vulica Mai vei Alama?

Meu na tekivu ena noqu na tarogi kemuni kece na iliuliu e liu, nikua, se ni mataka ni Lotu i Jisu Karisito, “Na cava o rawa ni vulica mai vei Alama?”

E a dua na tamata vakaisolisoli dina ka gugumatua o Alama. E rawarawa beka meda nanuma ni sega ni gadreva o koya me dua e vukei koya. Ia, na cava a cakava o Alama ni sa lesu tale ki Amonaia?

A raici Amuleki o Alama ka kerei koya me veivuke.

Ka mani vukei kina o Alama.

Se cava ga na vuna, eso na gauna e dredre vei keda na iliuliu meda vakasaqara ka kunei ira na noda Amuleki. Eda rairai nanuma ni da rawa ni cakava vakavinaka cake ga vakai keda na cakacaka, se dredre meda vakaogai ira eso tale, se nanuma ni ra na sega ni via vakaitavi o ira eso. Vakavuqa e dau dredre toka meda sureti ira na tamata me ra vakayagataka na taledi e solia vei ira na Kalou ka me ra vakaitavi ena cakacaka levu ni veivakabulai.

Vakasamataka mada na iVakabula—a tekivuna duadua ga na Nona lotu?

E sega.

A sega ni nona itukutuku “Toso e muri. Au na cakava.” Ia a kaya “Ia mo Lako Mai, Mo Muri Au.”⁹ A vakauqeta, sureta, vakasalataka, ka vakabauti iratou na Nona tisaipeli me ratou “cakava na veika dou sa raica niu sa kitaka.”¹⁰ Ena sala oqo, a sega walega ni tara cake o Jisu Karisito na Nona Lotu ia o iratou talega na Nona italai.

Se itutu cava ga o sa qarava tiko ena gauna oqo—se o dua na peresitedi ni kuoramu ni dikoni, peresitedi ni iteki, se dua na Peresitedi ni iWasewase—ke o gadreva mo gugumatua, mo na vakasaqarai ira na nomu Amuleki.

Ena rairai dua beka e yalomalua se sega tu ni kilai ena ivavakoso. E rairai dua beka e sega ni vinakata se sega ni rawa me veiqaravi. O ira na nomu Amuleki era rawa ni tamata gone se qase, tagane se yalewa, sega ni kila vinaka, wawale, se sa luluqa ena Lotu. Ia na ka o sega ni kila ni ra sa nuitaka sara tu ga me ra rogoca mo kaya yani “E gadrevi iko tiko na Turaga! Au gadrevi iko!”

E utodra sara i loma, e vuqa era via qarava na nodra Kalou. Era vinakata me ra iyaya ni cakacaka ni Ligana. Era gadreva me ra vakacuruma na isele takelo ka gumatua me ra vakarautaka na vuravura ena Nona lesu mai na noda iVakabula. Era vinakata me ra tara cake na Nona Lotu. Ia era rivarivabi me ra tekivutaka. Vakavuqa era waraka me ra kerei.

Au sureti kemuni mo ni vakasamataki ira ena nomuni tabana kei na tabanalevu, ena nomuni tabana ni kaulotu kei na iteki, era gadreva tu me ra kacivi ki na cakacaka. Sa cakacakataki ira tiko mai na Turaga—vakarautaki ira, ka vakamalumutaka na yalodra. Mo kunei ira ena rai ni yalomu.

Ni gole yani vei ira. Vakavulici ira. Vakauqeti ira. Tarogi ira.

Wasea vei ira na vosa ni agilosi vei Amuleki—me sobuti ira kei na nodra itikotiko na veivakalougatataki ni Turaga.¹¹ O na rairai kurabui ni ko raica kina e dua na italai qaqa ni Turaga sa mai kunei oqo mai na nona rawa ni vunitaki tu.

Au sa Vakataki Amuleki Vakacava?

Ni so vei keda eda sa vakasaqara tiko e dua na Amuleki, ia eso me ra na taroga oqo “Au sa Vakataki Amuleki Vakacava?”

Rairai sa yaco vei iko, ni toso na yabaki, o sa luluqa mai ena nomu bula vakatisaipeli. E rairai sa torosubu mai na yameyame ni nomu ivakadinadina. E rairai ko sa vakayawaki iko mai na isoqosoqo i Karisito. E rairai o sa rarawa beka se cudru. Me vakataka eso na Lotu i Efeso makawa, ko sa biuta beka na “imatai ni nomu daulomani”¹²—na cecere, ni dina tawamudu ni kosipeli i Jisu Karisito.

Me vakataki Amuleki beka, o sa kila e vu ni yalomu ni sa “kacivi [iko] vakavuqa” na Turaga ia o a “sega ga ni via rogoca.”

Ia, sa raica tu na Turaga vei iko na ka a raica vei Amuleki—na nomu rawa ni dua na italai qaqa ki na dua na cakacaka bibi mo cakava vata kei na dua na ivakadinadina me wasei. Era sa tu na tamata era via rogoca na nomu ivakadinadina. E tiko na veiqaravi e sega tale ni dua me vakatauvatani ni kena o na cakava. Sa nuitaki iko kina na Turaga ena Nona matabete tabu, ka sa tu kina na madigi vakalou ni nodra vakalougatataki ka laveti cake na tamata. Vakarorogo ena yalomu ka muria na veivakauqeti ni Yalotabu.

iLakolako ni Dua na Lewenilotu

E tara na yaloqu na ilakolako ni dua na baraca ka a tarogi koya vakaikoya, “Ni sa kacivi au na Turaga, au na rogo beka?” Au na kaciva mada na baraca totoka oqo o Tevita.

A saumaki mai ki na Lotu o Tevita ena 30 na yabaki sa oti. A laki kaulotu ka oti o ya a laki vuli lawa. Ena gauna sa vuli tiko kina ka cakacaka me bula kina nona matavuvale vou, a rogoca sara e dua na itukutuku me baleta na Lotu ka veilecayaki kina o koya. Na levu ga ni nona wilika na itukutuku vakatani vakaoqo, na levu cake ni nona tikotiko ca. Sa mani yaco me sa laki kerea me sa boko laivi na yacana mai na ivolatukutuku ni Lotu.

Mai na gauna o ya, me vakataki Alama ena nona siga ni veisaqasaqa, a vakayagataka vakalevu o Tevita na nona gauna me veiba vakalotu kei ira na lewe ni Lotu, ka veivosaki ena onolaini, kei na inaki me bolei na nodra vakabauta.

A kenadau sara toka kina o koya.

Dua vei ira na lewenilotu rau a veiba vakalotu au na vakatoka me ko Jekope. E tamata lomavinaka o Jekope ka dau rokovi Tevita, ia e tudei tu nona taqomaka na Lotu.

Ni toso na yabaki, rau sa tekivu veirokorokovi ka veitokani vinaka sara o Tevita kei Jekope. Na ka a sega tiko ni kila o Tevita ni sa masulaki Tevita tiko o Jekope ka vakayacora tu ena yalodina me tini na yabaki vakacaca. A laki biuta sara ga na yacai nona itokani oqo ena valetabu ni Turaga me masulaki ka nuitaka ni na vakamalumalumutaki na yaloi Tevita.

Ni toso na gauna, sa veisau mai vakamalua o Tevita. Sa tekivu me vakasamataka lesu na veika vakayalo a sotava e liu, ka nanuma sara nona a marau voli ena gauna a se lewena tu kina na Lotu.

Me vakataki Alama, a sega sara ni guilecava vakadua o Tevita na dina ni kosipeli a ciqoma tu e liu. Me vakataki Amuleki ga, a vakila o Tevita ni sa dodoliga yani vua na Turaga. Ia ena gauna oqo sa vakaitaukeitaki tu ena dua na kabani ni lawa o Tevita—e dua na cakacaka cecere. Sa mai kilai tu o koya ni dau saqata na Lotu, ka sa dokai koya cake sara ka dredre vua me kere lesu mai ki na Lotu.

Ia, sa tomani tikoga nona vakila ni sa vakauqeti koya tiko na iVakatawa.

A vakadinata vakaidina na ivolanikalou “Ia kevaka sa lailai na vuku vua e dua vei kemudou, me kerea vua na Kalou, o koya sa solia vakalevu kivei ira kecega na tamata, a sa sega ni dauveivakadirideini; ka na soli ga vua.”¹³ A qai masu, “Kemuni na Kalou, au vinakata meu dua tale na Yalododonu Edaidai, ia au gadreva me saumi mai eso na noqu vakatataro.”

Sa qai tekivu me vakarorogo ki na domo malua ni Yalotabu kei na nodra isaunitaro vakauqeti na itokani ka se bera mada ni yaco vua e liu. Veitarataravi ga, sa vuki na nona lomatarotaro me sa vakabauta, me yacova ni sa qai kila, ka vakila tale, e dua na ivakadinadina baleti Jisu Karisito kei na Nona Lotu sa vakalesuimai.

Ena gauna o ya, sa qai kila o koya ni sa dodonu me vorata laivi na nona dokadoka ka cakava na veika e dodonu me cakava me na ciqomi tale kina ena Lotu.

Sa yaco sara, me sudrava yani o Tevita na wai ni papitaiso ka tekivu me wilisiga tiko ki na gauna me sa vakalesui kina vua na nona veivakalougatataki.

Au marau meu kaya eke ena vula ikatakata sa oti, sa mai vakalesui kina vei Tevita na nona veivakalougatataki. Sa mai gugumatua tiko oqo o Tevita ena Lotu ka sa qasenivuli tiko ni Vunau ni Kosipeli ena nona tabanalevu. Sa dau vakayagataka na veimadigi kece me tukuna vei ira na tamata na nona veisau, na nona vakavinakataka na cala a vakavuna, ka vakadinadinataka na kosipeli kei na Lotu i Jisu Karisito.

iTinitini

Kemuni na taciqu lomani, kemuni na noqu itokani lomani, meda vakasaqara mada, kunea, vakauqeta, ka vakararavi vei ira na Amuleki ena noda tabanalevu kei na iteki. Era vuqa tu na Amuleki ena Lotu nikua.

O rairai kila tiko e dua. O rairai dua beka o iko.

Sa rairai vosa malua tiko vei iko na Turaga, vakamasuti iko tiko mo lesu ki na imatai ni nomu daulomani, vakayagataka nomu taledi, bulataka kilikili na matabete, ka veiqaravi ena duavata kei ira na wekamu Yalododonu ena yasai Jisu Karisito ka tara cake na matanitu ni Kalou ena vuravura oqo.

Sa kila tiko na noda iVakabula daulomani na vanua o tiko kina. E kila na yalomu. E vinakata o Koya me vueti iko mai. Ena dodoliga yani o Koya vei iko. Mo dolava ga na yalomu Vua. Sa noqu inuinui ni o ira era sa lakotani mai na salatu ni bula vakatisaipeli—ena vica ga na diqiri—me ra vakasamataka mada na vinaka kei na loloma soliwale ni Kalou, ka me ra rai ena yalodra, vuli mai vei Alama kei Amuleki, ka rogoca na vosa ni iVakabula e veisautaka na bula: “Lako Mai, Mo Muri Au.”

Au sa vakamasuti iko mo rogoca na Nona kaci, ni o na ciqoma vakaidina na tatamusuki kei lomalagi. Ena yaco me sobuti iko kei na nomuni vuvale na veivakalougatataki ni Turaga.¹⁴

Au sa vakadinadinataka oqo kau sa solia vei kemuni na noqu veivakalougatataki vaka-iApositolo ni Turaga ena yaca i Jisu Karisito, emeni.