Wasei ni Kosipeli Vakalesuimai

Mai vei Elder Dallin H. Oaks

Ena Kuoramu ni iApositolo Le Tinikarua

Na ka eda vakatoka me “cakacaka vakaulotu ni lewenilotu” e sega ni mai parokaramu ia sa dua na ivalavala ni loloma kei na dolele mera vukei kina o ira na wavoliti keda tu.

I.

Ni vakarau mai cava na Nona ilesilesi e vuravura a vakaroti ira na Nona tisaipeli na iVakabula, o Jisu Karisito: “O koya mo dou qai lako ka vakalotutaki ira na lewe ni veivanua kecega” (Maciu 28:19) kei na “Dou lako yani ki vuravura taucoko ka vunautaka na itukutuku vinaka kivei ira na tamata kecega” (Marika 16:15). Sa ra vakaroti taucoko na lotu va-Karisito mera wasea na kosipeli kivei ira na tamata kecega. E vuqa era vakatoka oqo “na ilesilesi levu.”

Sa vakatavulici keda na iVakabula meda veilomani

Me vaka e vakamacalataka o Elder Neil L. Andersen sa ra umani vakaidina sara na Yalododonu Edaidai ena itavi levu oqo. Sa dodonu me vakakina baleta ni da kila ni sa lomani ira kece na Luvena na Kalou ka sa vakalesuya mai o Koya ena veisiga e muri oqo na ikuri ni kilaka kei na kaukauwa bibi mera vakalougatataki taucoko kina. A vakatavulici keda na iVakabula meda lomani ira taucoko na tacida kei na ganeda, ka da doka na ivakavuvuli oya ena wasei ni vakadinadina kei na itukutuku ni kosipeli vakalesui mai “ki na veimatanitu, veimataqali, duivosavosa, kei ira na tamata kecega” (V&V 112:1). Oqo sa tiki bibi ni nodra vakatakilai na Yalododonu Edaidai. Eda raica oqo me dua na madigi rekitaki. Na cava e rawa ni vakavu reki cake mai na wasei ni dina tawamudu e so vata kei ira na luve ni Kalou?

Sa vuqa tu na ivurevure nikua me wasei kina na kosipeli ka a sega tu ni rawa ena veitabagauna eliu. Sa tiko vei keda na retio yaloyalo, na initaneti, kei na sala ni vakauitukutuku e so. Sa vuqa tu na noda itukutuku vakamareqeti me vakatakilai kina na kosipeli vakalesui mai. Sa vakatakilai levu tu na Lotu ena vuqa na matanitu. Sa ka levu na noda iwiliwili vakadaukaulotu. Ia eda sa vakayagataka tiko li vakamaqosa na veivurevure taucoko oqo? Au vakabauta ni levu vei keda ena kaya sega. Eda gadreva me vakavotukana vakalevu cake na noda itavi digitaki vakalou ena wasei ni kosipeli vakalesui mai ki vuravura taucoko.

E vuqa tu na vakasama vinaka ni kena wasei na kosipeli ka na cakacaka ena veiiteki yadua se vanua. Ia, baleta ni da sa Lotu roboti vuravura raraba, au gadreva meu vosa ena vakasama e so ka na cakacaka ena veivanua kecega, mai na tabanilotu vou duadua ki na kena sa tiko makawa, mai na veitovo tudei sa tautauri oqo ki na kosipeli i Jisu Karisito ki na veitovo tudei ni vanua era sa veivakacacani voli vakalevu ki na lotu. Au via vosa ena vakasama e so o rawa ni vakayagataka kivei ira era sa vakadeitaki ira mera vakabauti Jisu Karisito vakakina o ira era se bera vakadua ni rogoca na Yacana, vata kei ira era sa mamau tu ena bula era bulataka tiko oqo vakakina kei ira era sasaga vakaukauwa voli mera vakavinakataki ira.

Na cava au rawa ni kaya me na veivuke ena nomu wasea na kosipeli, se vakacava na nomu ituvaki? Eda sa gadreva na veivuke ni lewenilotu taucoko, ka rawa ni veivuke na lewenilotu kecega, me vaka e sa vuqa na itavi me qaravi ni da wasea na kosipeli vakalesui mai ki na veimatanitu, veimataqali, duivosavosa, kei ira na tamata kecega.

E vakauqeti ira na lewenilotu kei na daukaulotu o Peresitedi Monson mera cakacaka vata

Eda kila taucoko ni vakaitavi ni lewenilotu ena cakacaka ni kaulotu e sa ka momona ki na rawati ni saumaki kei na veivakadeitaki. Sa kaya o Peresitedi Thomas S. Monson: “Oqo na gauna mera duavata kina na lewenilotu kei na daukaulotu … [ka] cakacaka ena were ni vaini ni Turaga mera kau yalo mai ki Vua. Sa vakarautaka tu o Koya na veika meda wasea kina na kosipeli ena sala e vuqa, ka na vukei keda o Koya ena noda cakacaka kevaka eda na cakacakataka na vakabauta meda vakataucokotaka na Nona cakacaka.”¹

E sega ni dua ga na idola na cakacaka vakaulotu

Na wasei ni kosipeli vakalesui mai sa noda itavi ka madigi va-Karisito ni bula taucoko. E vakananumi keda o Elder Quentin L. Cook, “Na cakacaka vakaulotu e sega ni dua ga vei ira na 88 na ki ena piano ka dau vakatagitaki vagauna; e sa itabataba bibi ena dua na rorogo malaude ka dodonu me vakatagitaki tu ga ena noda bula taucoko kevaka meda na malaude voli ena noda veidinadinati ki na veika va-Karisito kei na kosipeli i Jisu Karisito.”²

II.

E tiko e tolu na ka e rawa ni cakava na lewenilotu yadua me veivuke kina ena wasei ni kosipeli, veitalia na ituvaki era bula ka cakacaka kina. Sa dodonu meda cakava taucoko oqo.

Matai, sa rawa ni da masuta taucoko na gagadre me veivuke ena tiki ni cakacaka bibi oqo ni veivakabulai. Na sasaga taucoko e tekivu ena gagadre.

Karua, sa rawa ni da muria na ivunau. O ira na lewenilotu yalodina ka talairawarawa sa ra ivakadinadina bula ni veika dina kei na yaga ni kosipeli vakalesui mai. Vakabibi sara, ena dau tiko ga vata kei ira na lewenilotu yalodina na Nona Yalotabu me tuberi ira ni ra qara mera vakaitavi ena cakacaka levu ni kena wasei na kosipeli vakalesui mai i Jisu Karisito.

Katolu, sa rawa ni da masuta na veivakauqeti ena ka eda rawa ni cakava ena noda ituvaki yadua ni wasea na kosipeli kivei ira na tani. Oqo e duidui mai na nodra masulaki na daukaulotu se masuti ni veika e ra rawa ni cakava na tani . Sa dodonu meda masulaka na ka eda rawa ni cakava vakaikeda. Ni da masu, sa dodonu meda nanuma ni mataqali masu vakaoqo ni veivakauqeti ena saumi kevaka e tokoni ena veidinadinati—na ka era vakatoka na ivolanikalou na “yalo dina” se “inaki taucoko ni lomada.” Masu ena yalodina mo cakacakataka na veivakauqeti o ciqoma, ka yalataka voli vua na Turaga ni kevaka ena vakauqeti iko o Koya mo vosa kivua e dua me baleta na kosipeli, o na cakava vakakina.

Eda sa gadreva na veituberi ni Turaga baleta ena dua ga na gauna e so era—ka so e sega—ni ra vakarau tu ki na ikuri ni dina e so ni kosipeli vakalesui mai. E sega ni dodonu meda vakatulewataka o cei sa vakarau tu kei cei e se bera. Sa kila tu na Turaga na lomadra taucoko na Luvena, kevaka eda masuta na veivakauqeti, ena vukei keda o Koya ni kunei ira na tamata e kila o Koya era sa “vakarau tu mera rogoca na vosa” (Alama 32:6).

Vaka e dua na iApositolo ni Turaga, au vakamasuta na lewe ni Lotu kei na matavuvale kece mera masuta na Turaga me veivuke ena nodra kunei na tamata era sa vakarau tu ni ciqoma na itukutuku ni kosipeli vakalesui mai i Jisu Karisito. Sa solia na ivakasala bibi oqo o Elder M. Russell Ballard, kau sa tokona: “Vakararavi vua na Turaga. Sa ikoya na iVakatawa Vinaka. Sa kilai ira na Nona sipi o Koya. … Kevaka eda sa sega ni vakaitavi, e vuqa ena calata na madigi mera rogoca na itukutuku ni Veivakalesuimai. … Sa rawarawa tu na kedra ivakavuvuli—masumasu, vakaiiko ka vakamatavuvale, me baleta na madigi e so ni kaulotu.”³ Ni da vakatakila na noda vakabauta na veimadigi oqo ena basika ka na sega na “sausaumi e bucini se … tuvanaki taumada. Era na yaco vakarawarawa me vaka na vatuka ni noda loloma kivei ira na tacida kei na ganeda.”⁴

Au kila ni sa dina oqo. Au kuria na noqu yalayala ni mai na vakabauti ni veivuke ni Turaga, eda na tuberi, vakauqeti, ka kune reki ena cakacaka bibi ni loloma tawamudu oqo. Eda na kila deivaki ni rawaka ena wasei ni kosipeli sai koya na nodra sureti voli na tamata ena loloma kei na kauwai dina mera vukei, se vakacava na nodra ulubale.

III.

Oqo e vica tale na ka eda rawa ni cakava meda wasea kina vakamomona na kosipeli:

Sa gadrevi meda nanuma ni “tamata era vuli ni ra sa vakarau tu mera vuli, sega ni noda sa vakarau tu meda vakatavulici ira.”⁵ Na ka eda maleleta, vaka na ikuri bibi ni ivakavuvuli vakaivunau ena Lotu vakalesui mai, e sega soti ni dau veika era maleleta tu na tani. E so tale era vinakata ga na vatuka e so ni vunau, sega ni vunau. Ni ra sarava se vakadinadinataka na revurevu ni kosipeli vakalesui mai ena noda bula, era vakila na Yalotabu ka tekivu mera maleleta na ivunau. Era na rairai malele talega ni ra qara voli na bula vakacegu levu cake, ni volekata na Kalou, se na kilai vinaka cake ni inaki ni bula.⁶ Ia, meda sa qara vakayalo vakamatau kei na masumasu na iwalewale me qaqai kina na malele ni dua tale me vuli vakalevu cake. Oqo ena vakatau ena veika e so, vaka na ituvaki taumada ni dua tale na tamata kei na noda veimaliwai vata kei koya. Oqo e sa ulutaga vinaka me veivosakitaki ena matabose, kuoramu, kei na Veisoqosoqo ni Veivukei.
Ni da vosa vei ira tale e so, sa dodonu meda nanuma ni dua na veisureti me vulici vakalevu kina o Jisu Karisito kei na Nona kosipeli oya sa veisureti me vulici kina vakalevu na noda Lotu.⁷ Eda vinakata na tamata mera saumaki ki na kosipeli. Na veika e vakilai ena noda Lotu e salamuria na saumaki kivei Jisu Karisito; era sega ni vakayacori vakailiu. E vuqa ka ra yamekemeke voli me baleta na lotu sa tu talega na nodra loloma kivua na iVakabula. Cakava taumada na ka me liu.
Ni da qara meda vakatakilai ira na tamata ki na kosipeli vakalesui mai, sa dodonu meda cakava oqo ena sala e so ka dei tu ena kauwai loloma me baleta na tamata yadua. E yaco oqo ni da tovolea voli meda vukei ira tale e so ena veileqa era sa vakaraitaka se gauna eda cakacaka vata kina kei ira ena veitaviqaravi vakaitikotiko, vaka na nodra vakacegui na bulararawa, qaravi ni vakaloloma kei na vakaleqai, se na vakamatatataki ni nodra ivakarau ni bula tale e so.
E sega ni dodonu me yalani na noda sasaga ni wasea na kosipeli kivei ira na noda itokani kei na veimaliwai. Donuya na Olympic eda a vulica me baleta e dua na draiva ni tekisi YDE e Rio de Janeiro ka kauta voli na ilavelave e so ni iVola i Momani ena vitu na vosa duidui ka solia e dua kivua ga ena ciqoma. E a vakatokai koya me “draiva ni tekisi daukaulotu.” Kaya o koya, “Na veisaqata e Rio de Janeiro … sa [noqu] yalava ni kaulotu.”⁸

O Clayton M. Christensen, ka sa veivakauqeti na nona gauna vakadaukaulotu lewenilotu, a kaya “sivia na ruasagavulu na yabaki, keitou sa dikeva rawa ni sa sega tu na isema kaukauwa ni kena vakabibitaki na veimaliwai ki na rua na tamata ena nona maleleta e dua me vulica na kosipeli mai vua e dua tale.”⁹
Sa rawa ni ra tuva na matabisopi ena tabanalevu e dua na soqoni ni sakaramede mera vakamasuti kina na lewenilotu mera kauta mai e so na tamata malele. Era na tawavakasuka na lewe ni tabanalevu mera kauta mai na nodra veikilai ki na soqoni vakaoya baleta ni ra sa vakadeitaka tu na usutu ni soqoni sa na tuvalaki vakamatau tu me vakauqeta na malele ka matataka vakavinaka na Lotu.
Sa vuqa tale tu na madigi mera wasei kina na kosipeli. Me ivakaraitaki, ena vulaikatakata ga oqo au a ciqoma kina e dua na ivola marautaki mai na dua na lewenilotu vou ka a vulica na kosipeli vakalesui mai ni a qiri koya e dua na itokani vakavuli makawa me qaqa na mate e a lako curuma voli. Vola o koya: “Au a marau vakaidina ena iwalewale e a vakatakilai koya kina vei au. Ni oti [e] vica na vula ni vuli voli mai vei rau na daukaulotu, au sa papitaiso sara. E sa vinaka cake na noqu bula mai na gauna oya.”¹⁰ Eda kila taucoko tu e vuqa ka na vinaka cake na nodra bula mai na kosipeli vakalesui mai. Eda sa sudra li tiko yani kivei ira?
Na nodra malele kei na kilaka na noda lewenilotu gone ena sala ni vakauitukutuku e sa solia vei ira na madigi matalia mera sudra yani kina kivei ira tale na maleleta na kosipeli. Ni vakamacalataki na rairai ni iVakabula kivei ira na Nifai, e vola o Momani, “A sa vakatavulici ira ka vakalougatataki ira na gone … , a sa sereka na wa ni yamedra … me ra tukuna” (3 Nifai 26:14). Au kila nikua eda na rawa ni kaya “sereka na nodra [iqaqalo ni tex] me ra tukuna.” Ni sorova, na itabagone!

Na wasei ni kosipeli e sega ni icolacola ia e ka rekitaki. Na ka eda vakatoka me “cakacaka vakaulotu ni lewenilotu” e sega ni mai parokaramu ia sa dua na ivalavala ni loloma kei na dolele mera vukei kina o ira na wavoliti keda tu. E sa dua talega na madigi me vakadinadinataki kina na veika eda vakila tu me baleta na kosipeli vakalesui mai ni noda iVakabula. Me vaka e sa vakatavulica o Elder Ballard, “Na ivakadinadina vakamareqeti levu duadua ni noda saumaki kei na veika eda vakila tu me baleta na kosipeli ena noda bula oya na noda lomasoli meda wasea kivei ira tale e so.”¹¹

Au vakadinadinataki Jisu Karisito, ka sa Rarama ka Vu ni Bula kei vuravura (raica na 3 Nifai 11:11). Na Nona kosipeli vakalesui mai sa vakararamataka na noda sala ena bula vakayago oqo. Sa vakadeitaka na bula ni oti na mate na Nona Veisorovaki kei na kaukauwa me sasagataki kina na bula tawacava. Sa solia vei keda na Nona Veisorovaki na madigi meda vosoti kina mai na noda ivalavala ca ka, mai na yavu ni veivakabulai lagilagi ni Kalou, meda rawata na bula tawamudu, “na isolisoli uasivi duadua ni Kalou” (V&V 14:7). Ena yaca i Jisu Karisito, emeni.