Sa Rawa ni Vukei Keda na Sakaramede Meda Vakatabui

Mai vei Elder Peter F. Meurs

Ena Vitusagavulu

Navuca e lima na sala me vakalevutaki kina na revurevu kei na kaukauwa ni noda vakaitavi wasoma ena cakacaka vakalotu tabu ni sakaramede.

Dua na vakanananu makawa vei au oya na kena dau vakayacori na soqoni ni sakaramede ena neitou itikotiko e Warrnambool, Ositerelia. Rauta ni 10 ki na 15 na tamata era tiko ena neitou tabana, ia o tamaqu, e dua vei iratou na tolu na matabete, a dau nona na madigi me vakalougatataka na sakaramede. Au nanuma na veika au a vakila ena nona wilika vakamatau ena yalomalua na masu ni sakaramede. E tata na domona ena so na gauna ni vakila na Yalotabu. So na gauna ena cegu o koya me qarauna na nona imoimoi ni bera ni vakacavara na masu.

Niu se yabaki lima, au a sega ni kila deivaki na ibalebale taucoko ni veika a tukuni se vakayacori tiko; ia, au sa kila ni a vakayacori voli e dua na ka vakasakiti. Au a rawa ni vakila na veivakayarayarataki maravu ka veivakadeitaki ni Yalo Tabu ni raitayaloyalotaka o tamaqu na loloma ni iVakabula me baleti keitou.

A vakatavulica na iVakabula: “Mo dou kitaka na ka oqo vei ira sa veivutuni ka papitaisotaki ena yacaqu; dou na kitaka oqo mo dou vakananuma kina na noqu dra, kau sa liviraka ena vukumudou, ka vakadinadinataka kina vei Tamaqu ni dou na dau nanumi au tikoga. Ia kevaka dou sa dau nanumi au tikoga, ena tiko ga kei kemudou na noqu Yalo Tabu” (3 Nifai 18:11).

Au sureti keda taucoko meda navuca e lima na sala me vakalevutaki kina na revurevu kei na kaukauwa ni noda vakaitavi wasoma ena cakacaka vakalotu tabu ni sakaramede, e dua na cakacaka vakalotu e rawa ni vukei keda meda vakatabui.

1. Vakavakarau Rawa Taumada

Sa rawa ni tekivu na noda vakavakarau ki na sakaramede ni bera tu me tekivu na soqoni ni sakaramede. Ena rairai gauna vinaka na Vakarauwai me raitayaloyalotaki kina na noda toso ki liu kei na vakavakarau vakayalo.

Na bula vakayago sa dua na isolisoli veiganiti ena noda ilakolako meda vakataka na Tamada Vakalomalagi. Sa ganita me na okati kina na veivakatovolei kei na bolebole e so e vakarautaka na veimadigi kivei keda meda veisau ka tubu. A vakatavulica na Tui o Penijamini ni “sa veimecaki na itovo vakayago kei na Kalou, … ka na vaka tu kina me tawamudu, kevaka eda sa sega ni vakarorogo ki na domo ni Yalo Tabu, meda biuta tani na itovo vakayago ka yaco meda tamata yalosavasava ena vuku ni isoro i Karisito na Turaga” (Mosaia 3:19). Na vakaitavi ena cakacaka vakalotu ni sakaramede e vakarautaka na madigi meda solia vakataucoko na lomada kei na yaloda vua na Kalou.

Ena noda vakavakarau, sa raramusumusu na lomada ni da dolea na vakavinavinaka ena Veisorovaki ni iVakabula, veivutunitaka na noda cakacala kei na malumalumu, ka kerea na veivuke ni Tamada ena noda ilakolako voli meda vakataki Koya cake. Sa da qai rawa ni rai ki liu ki na madigi e vakarautaka na sakaramede meda vakananuma kina na Nona solibula ka vakavouia na noda veidinadinati ki na veiyalayalati taucoko eda sa cakava.

2. Yaco Totolo Yani

Sa rawa ni vakamatatataki na veika eda sotakaya ena sakaramede ni da yaco yani ni se bera na soqoni ka vakasama tu vagumatua ni vakatagitaki voli na idola ni sereivakatagi.

Yaco totolo yani ki na soqoni ni sakaramede

A vakatavulica o Peresitedi Boyd K. Packer: “Na idola ni ivakatagi, ni vakatagitaki ena veidokai, e sa kakana ki na yalo. E sureta na veivakauqeti.”¹ “Oqo e sega ni gauna,” e vakamacalataka o Peresitedi Russell M. Nelson, “ni veivosaki se vakau itukutuku ia sa gauna ni vakanomodi ena masumasu ni ra vakarautaka vakayalo na iliuliu kei na lewenilotu na sakaramede.”²

3. Lagasere ka Vuli mai na Vosa Eso ena Sere ni Sakaramede

Na sere ni sakaramede e sa tiki bibi vakaidina ni noda qarava na sakaramede. Na sereivakatagi e laveta cake na noda vakasama kei na vakanananu. Sa veilaveti vakalevu sara na sere ni sakaramede ni da raica matua na veivosa kei na ivunau kaukauwa e vakatavulica. Eda vuli vakalevu mai na vosa e so vaka na “Mavoa vakaca meu bula ga,”³ “Me dau nanumi karoni na lomada savasava,”⁴ kei na “Lewa, dodonu, loloma na bula vaKalou!”⁵

Ni da lagata na sere ena vakavakarautaki ni kena vakayagataki na ivakatakarakara e so, sa rawa ni yaco na veivosa me tiki ni noda veiyalayalati dinamati. Navuca, me ivakaraitaki, “Keimami lomani Kemuni; sa sinai na loma keimami. Ena muri na nomuni sala.”⁶

4. Vakaitavi Vakayalo ena Masu ni Sakaramede (Raica na Moronai 4–5)

Ni sega ni rogoci vakavinaka na veivosa momona ni masu ni sakaramede, sa rawa ni da vulica ka vakila e levu cake na ka ni da vakaitavi vakayalo ena navuci ni veidinadinati kei na veivakalougatataki veisemati era okati ena masu vakatabui oqo.

Na madrai kei na wai sa vakalougatataki ka vakatabui ki na noda bula. E rau vakananumi keda ena solibula ni iVakabula ka sa rawa ni vukei keda o Koya meda vakatabui.

Na masu e vakamacalataka ni da kania na madrai me ivakananumi ni yago ni Luvena, ka solia o Koya me keda ivoli meda vakadonui taucoko kina ena tucake tale, ka da gunuva na wai me ivakananumi ni dra ni Luvena, ka solia wale o Koya me rawa ni da na vueti kevaka eda sa veivutuni.

Na masu e vakatakila na veiyalayalati ena malanivosa “ni ra sa yalataka” (Moronai 4:3). Na malanivosa oqo e tiko kina na kaukauwa veiganiti levu me baleti keda. Eda sa yalataka li meda veiqaravi ka vakaitavi? Eda sa yalataka li meda veisau? Eda sa yalataka li meda vakavinakataka na noda malumalumu? Eda sa yalataka li meda sudra yani ka vakalougatataki ira na tani? Eda sa lomasoli li meda vakararavi vua na iVakabula?

Me vaka e tukuni ena yalayala ka da vakayagataka, eda sa vakadeitaka ki lomada ni da sa lomasoli meda:

Taura kivei keda na yaca i Jisu Karisito.
Sasagataka mo muria na Nona ivunau taucoko.
Dau nanumi Koya.

E tini na masu ena dua na veisureti kei na yalayala totoka vakaoti: “Ka me tiko ga kei ira na nona Yalotabu ka sega ni mudu” (Moronai 4:3).

Vola o Paula, “Ia na vua ni Yalo Tabu na loloma, na reki, na vakacegu, na vosota vakadede, na yalomalua, na yalololoma, na vakabauta, na yalomalumalumu, [kei na] ivalavala malua” (Kalatia 5:22–23). Na veivakalougatataki kei na isolisoli totoka e so sa vakarautaki tu vei keda ni da maroroya na noda veiyalayalati.

5. Tugana ka Nanumi Koya ni Veisoliyaki na iVakatakarakara ni Sakaramede

Sa rawa ni yaco me ka vakatabui vei keda na veigauna rokovi era veisoliyaka kina na sakaramede na matabete.

Ni sa veisoliyaki na madrai, sa rawa ni da raitayaloyalotaka ni mai na ivakaraitaki taucoko ni loloma me baleti keda, na iVakabula a “soli koya me mate, me sereka kina na ivesu ni mate sa vesuki ira tu na nona tamata” (Alama 7:12).

Sa rawa ni da nanuma na veivakalougatataki lagilagi ni Tucaketale ki na “tamata kecega, … na bobula kei na itaukei, na tagane kei na yalewa, ko ira sa ivalavala ca kei ira na yalododonu; ia ena sega ni yali e dua na drauniuludra; ia ena cokotivata tale na yagodra ki na kena itutu dina me vaka eliu” (Alama 11:44).

Ni sa veisoliyaki na wai, sa rawa ni da nanuma na vakatakekere ni iVakabula:

“Raica, koi au na Kalou, au sa vosota oti na veika oqo, mera bula kina ko ira era sa veivutuni; …

“Raica, koi au na Kalou sa kaukauwa sara, au sa sautaninini ena mosi ni veivakararawataki koya, au a bunotaka na dra ka sa yaluma sara kina na yagoqu kei na yaloqu—io au a sa kerea me kau tani vei au na bilo ni cudru” (V&V 19:16, 18).

Eda nanuma ni o Koya a “mai bula vakatamata me kila kina na [noda] malumalumu na nona tamata, ka vakabulai [keda] ena nona yalololoma” (Alama 7:12).

Ni da navuca na veika eda sotakaya ena sakaramede, eda na rairai tarogi keda:

Na cava au na cakava ena macawa oqo meu vakarau vakavinaka cake kina ki na sakaramede?
E rawa li niu cau vakalevu ki na veidokai kei na vakatakila e rawa ni veitomani ena itekivu ni soqoni ni sakaramede?
Na ivunau cava a vakatavulici ena sere ni sakaramede?
Na cava au a rogoca ka vakila niu vakarorogo voli ki na masu ni sakaramede?
Na cava au a vakasamataka tu ni a veisoliyaki na sakaramede?

A vakatavulica o Elder David A. Bednar: “Na cakacaka vakalotu ni sakaramede sa veisureti vakalou ena tukuni tikoga meda veivutuni vakaidina ka meda vakavoui vakayalo. Na noda kania na sakaramede, ena kena ituvaki, e sega ni bokoca na ivalavala ca. Ia ni vakavakarau na lomada ka vakaitavi ena cakacaka tabu vakalotu oqo ena yalo raramusumusu kei na yalo lokumi, sa qai yaco na yalayala me tiko ga kei keda na Yalo ni Turaga. Ia ena kaukauwa veivakasavasavataki ni Yalo Tabu me noda itokani wasoma, sa rawa tikoga kina ni maroroi na vakabokoci ni noda ivalavala ca.”⁷

Au vakadinadinataka na veivakalougatataki vakaoba sa vakarautaki tu vei keda ni da vakalevutaka na noda vakavakarau me baleta na qaravitavi vakayalo ena cakacaka vakalotu ni sakaramede. Au kuria na noqu ivakadinadina ni ra sa vakarautaki tu na veivakalougatataki oqo kivei keda me baleta na loloma ni Tamada mai Lomalagi kei na solibula sorovaki vakalou ni Luvena Daulomani, o Jisu Karisito. Ena Yacana tabu, o Jisu Karisito, emeni.