Na Gagadre Vakaidina ni Yalo

Mai vei Carol F. McConkie

Matai ni Daunivakasala ena Mataveiliutaki Raraba ni Goneyalewa

Na veigauna talei ni noda masu sa rawa me gauna savasava vata kei na Tamada, ena yaca ni Luvena, ena kaukauwa ni Yalo Tabu

Ena veisasaga dredre ni bula oqo, eda sega ni biu duadua tu meda rawata na noda cakacaka, meda vala ena noda ivalu, meda sotava na veika dredre se lomatarotaro tikoga. A veivakavulici o Jisu Karisito ena dua na vosa vakatautauvata “ni sa dodonu me daumasu tiko ka kakua ni ceguoca.” A talanoataka kina e dua na turaga ni lewa a sega ni rokova na Kalou ka sega ni via kauwaitaki ira na kawatamata. Dau vakawasoma, e dau lako tiko mai vua e dua na yada, me mai kerea me cudruvi ira na nona meca. Taumada a sega ni via vukei koya o turaga ni lewa. Ia ena vuku ga ni nona kerekere yalodina tikoga na yada, sa nanuma kina o turaga ni lewa, “Ia ni sa mai vakasosataki au na yada oqo, au na cudruvaki koya mada, de vakaceguocataki au ko koya ni sa sega ni mudu ni lako mai.”

Sa qai vakamacalataka o Jisu:

“Ia na Kalou ena sega li ni cudruvaki ira na nona digitaki, era dautagi tikoga vua ena siga kei na bogi … ?

“Au sa kaya vei kemudou ena cudruvaki ira vakusarawa ko koya.”

Sa qai taroga vakaoqo na Turaga: “Ia ni sa lako mai na Luve ni tamata, ena kunea beka na vakabauta e vuravura se segai?”¹

Na masu sa ka bibi sara me vakatorocaketaki kina na vakabauta. Ni sa lako tale mai na Turaga, ena kunea beka o Koya eso era kila me ra na masu ena vakabauta ka ra sa tu vakarau me ra ciqoma na veivakabulai? “Ni na bula ko ira vakayadua ga era sa masuta na yaca i Jiova.”² Eda sa luvena e dua na Tamada Vakalomalagi sa dauloloma, ka da sa rawa ni marautaka na noda veiyaloni vata kei Koya ni da masu “ena yalodina ena yaloda taucoko, ka vakabauta na Karisito”³ ka qai cakacaka ena kena isau eda sa ciqoma ena veivakauqeti ni Yalo Tabu. Ena vakabauta eda sa masu kina, eda vakarorogo ka vakamuria meda vulica rawa meda duabau kei na Tamana kei na Luvena.⁴

Na masu ena vakabauta ena tadolava na sala me ciqomi kina na veivakalougatataki e soli mai lomalagi. E vakavulica na iVakabula:

“Dou kerekere ka na soli vei kemudou, dou vakasaqara ka dou na kunea; dou tukituki ka na dolavi vei kemudou:

“Ni sa rawata ko koya yadua sa kerekere; ka sa kunea ko koya sa vakasaqara ka na dolavi vua sa tukituki.”⁵

Kevaka eda sa namaka tiko mena soli vei keda, e dodonu meda na kerea, vakasaqara, ka tukituki. Ena nona vakasaqara tiko na dina, a wilika kina o Josefa Simici, “Ia kevaka sa lailai na vuku vua e dua vei kemudou me kerea vua na Kalou, o koya sa solia vakalevu kivei ira kecega na tamata, a sa sega ni dauveivakadirideini.”⁶ Me isau ni nona masu ena vakabauta, a tadola mai ko lomalagi. A siro sobu mai na Kalou na Tamana kei na Luvena, o Jisu Karisito ena lagilagi ka vosa vei Josefa Simici, ka solia mai na taucoko ni itabagauna. Kivei keda, na veivakabulai veivakurabuitaki, kaukauwa ni veitaqomaki, kila vakalou, veivosoti veisereki, kei na vakacegu talei sa so vei ira na isaunitaro era lako mai ni da cabora yani e dua na “gagadre vakaidina ni yaloda”⁷ ena vakabauta.

Eda masu vua na Tamada ena yaca i Jisu Karisito, ena kaukauwa ni Yalo Tabu, ka da sa okata kina na lewetolu va-Kalou ni da kerekere tiko.

Eda masu vua na Tamada Vakalomalagi kivei Koya duadua ga baleta ni o Koya sa “bula tiko mai lomalagi na Kalou; io na Kalou sa sega ni yalani na nona gauna, sa bula tu ga me tawamudu … sai Koya sa bulia na lomalagi kei na vuravura kei na veika kece ga sa tu kina.” Ni sa noda Dauveibuli, a solia na ivakaro meda “lomani koya ka qaravi koya duadua ga, ni sa Kalou dina ka Kalou bula.”⁸

Ni ko masu vua na Tamada Vakalomalagi ena vakabauta, “e na vakacegui kemudou ko Koya ena nomudou rarawa, … [ka rawa] me nomudou na nona loloma.”⁹ E wasea o Peresitedi Henry B. Eyring ni masu nei tamana ni sa vakarau mate tiko ena kenisa a vakavulici koya ena veimaliwai titobu vakai koya vua na Kalou kei ira na Luvena:

“Ni sa kaukauwa sara na mosi, keitou a raici koya ni a tekiduru toka ena mataka lailai e yasani nona loga. Sa malumalumu sara me kaba cake ena nona loga. A kaya vei keitou ni a masu tiko me taroga vei Tamana Vakalomalagi na vuna me mai vakararawataki tu kina vakalevu ni dau saga tu o koya me tamata vinaka. A kaya ni a saumi mai ena yalololoma: ‘Na Kalou e gadrevi ira na luvena tagane me ra tamata yaloqaqa.’

“Sa qai yaloqaqa yani ki na nona icavacava, ka nuitaka tiko na Turaga ni sa lomani koya, rogoci koya, ka na laveti koya cake. A vakalougatataki ni sa mai kila e liu ka me kakua ni guilecava ni Kalou oqo sa dauloloma sa voleka sara ni da masu Vua.”¹⁰

Eda masu ena yaca i Jisu Karisito baleta ni da sa vakabulai ga vei Karisito, ka “ni sa sega sara e dua tale na yaca e ruku i lomalagi sa soli kivei ira na tamata, me da bula rawa kina.”¹¹ Eda lako mai vua na Tamada ena yaca tabu i Jisu Karisito¹² baleta ni o Koya sa noda Dauveivakavinakataki vua na Tamada ka dau tutaka na noda inaki ni bula.¹³ A vakararawataki, dave nona dra, ka mate me vakalagilagia na Tamana, kei na Nona vakamamasu ena loloma ena vukuda sa tadolava kina na sala vei keda yadua meda kune vakacegu ena bula oqo kei na bula tawamudu ena bula e tarava. E sega ni vinakata meda vakararawataki tu vakabalavu sara se vosota na veika rarawa e levu sara ki na kena e gadrevi. E gadreva o Koya meda vuki yani Vua ka laiva me vakamamadataka na noda icolacola, me vakabula na yaloda, ka vakasavasavataka na lomada mai na Nona kaukauwa veivakasavasavataki. Eda na sega ni vinakata meda cavuta wale na Yacana ena vosa wale se tokaruataki tiko vakalevu. Na masu ena yalodina e cabori ena yaca savasava i Jisu Karisito sa vakaraitaka tiko ni noda loloma yalodina, vakavinavinaka tawamudu, kei na noda gagadre tudei meda masu me vakataki Koya, cakacaka me vakataki Koya, ka yaco meda vakataki Koya.

Eda masu ena kaukauwa ni Yalo Tabu baleta ni “ko koya sa kerekere ena veivakauqeti ni Yalo Tabu sa muria na loma ni Kalou.”¹⁴ Ni da masu ena vakabauta, sa rawa vua na Yalo Tabu me dusimaka na noda vakanananu me yaco na noda vosa me cakava na loma ni Kalou. “Dou kakua ni kerea na ka mo dou vakayagataka ga ena nomudou gagadre ca, ia mo dou kerekere ena yalodina me kakua ni rawai kemudou na vere, ia mo dou qarava ga na Kalou dina ka Kalou Bula.”¹⁵

“E sega walega ni ka bibi meda na kila na ivakarau ni masu, ia sa ka bibi talega na noda na kila tiko na sala meda ciqoma kina na isau ni noda masu, meda kila, meda yadra tiko, meda na rai rawa tiko vakamatata ka kila vinaka na inaki ni Kalou kei na inaki baleti keda.”¹⁶

E wasea o Peresitedi Eyring: “Sa dau saumi mai na noqu masu. E matata vei au na kena isau ni veika au dau gadreva a dau uabaleti ena gagadre kaukauwa me kilai na ka e vinakata na Kalou. Sa yaco kina na isau ni masu mai vua na Tamada Vakalomalagi dauloloma ena rawa ni tukuni yani ki na vakasama ena domo lailai vinaka ka rawa me toqai ena yalo.”¹⁷

Ni sa curu yani na iVakabula ki na Were o Kecisemani, sa yaluma sara vakalevu na Yalona io ki na mate. Ena Nona rarawa levu, o koya duadua ga ena rawa ni gole kina sai koya na Tamana. A vakamamasu, “Kevaka e rawarawa, me lako tani mada vei au na bilo oqo.” Ia a tomana, “Ia me kakua ga ni vaka na noqu lewa, me vaka ga na nomu lewa.”¹⁸ Dina ga ni sega ni ivalavala ca, sa mai kacivi na iVakabula me mai “[sotava] na ka rarawa, kei na veivakararawataki kei na veivakatovolei kecega,” oka kina na nodra tauvimate kei na malumalumu na Nona tamata. “Ia ena vosota [o Koya] na ka rarawa me colata kina na nodra ivalavala ca na nona tamata, ia ena bokoci na nodra ivalavala ca ena nona isoro.”¹⁹ A masu vakatolu o Koya, “I Tamaqu me yaco ga na nomu lewa.”²⁰ A sega ni kau tani na bilo. Ni sa masu ena yalomalumalumu, yalodina a vaqaqacotaki me toso ki liu ka vakayacora na Nona ilesilesi vakalou me vakarautaka na noda vakabulai me rawa ni da veivutuni, vakadinata, talairawarawa ka meda taura na veivakalougatataki ni veigauna tawamudu.

Na isau ni noda masu eda sa ciqoma ena sega beka ni kena eda a gadreva. Ia ena gauna ni leqa, sa dau yaco na noda masu me yavubula ni loloma kei na loloma veivueti totoka. Ena noda vakamamasu, eda na rairai vaqaqacotaki meda toso ki liu ka vakayacora na veika kece eda sa tabaki kina meda cakava. Kivei ira na Nona Yalododonu era bula tiko ena veigauna dredre, sa kaya kina na Turaga, “Ia mo dou yalo vakacegu … ; raica sa tu ena qeteqete ni ligaqu na nodra bula na tamata kecega, dou tiko lo mo dou kila niu sa Kalou.”²¹

Ni da masu vakatamata yadua, kei na noda matavuvale, ena lotu, e valetabu, se vanua cava ga eda tu kina; se da masu ena yalo raramusumusu kei na yalo bibivoro ka vakasaqara na veivosoti, vuku vakalomalagi, se mo qaqaco mo vosota rawa, eda na masu vakawasoma ena yaloda taucoko, sa soli yani vua na Kalou ena veigauna baleta na noda bula raraba kei na nodra bula raraba na tiko voliti keda. Na gagadre yalodina e cabori ena yalo ni vakavinavinakataka na veivakalougatataki levu kei na vakavinavinakataka na lesoni ni bula oqo e vakatikora ki yaloda na vakabauta tudei na Karisito, e dua na “inuinui rarama, kei na lomana na Kalou kei na tamata kecega.”²²

Na masu sa dua na isolisoli mai vua na Kalou. Meda kakua ni nanuma ni da sa yali se tiko duadua. Au vakadinadinataka na veigauna talei ni noda masu sa rawa me gauna savasava vata kei na Tamada, ena yaca ni Luvena, ena kaukauwa ni Yalo Tabu. Ena yaca tabu i Jisu Karisito, emeni.