Tucake ena Kaukauwa, Marama e Saioni

Mai vei Bonnie L. Oscarson

Peresitedi Raraba ni Goneyalewa

Me da tamata dau rokova na veiyalayalati sa saumaki mai, eda na gadreva me da vulica na ivunau yaga ni kosipeli ka sega ni yavalati na noda vakadinadinataka na kedra dina.

Sa dua na ka rekitaki me da mai soqoni vata ena Vale ni Koniferedi oqo kei ira na goneyalewa lalai, goneyalewa, kei na marama ena Lotu. Eda kila tale tikoga ni udolu tale na veilawalawa vakaoqo era soqoni e vuravura raraba ka sarava tiko mai na kakaburaki oqo, kau vakavinavinakataka na madigi kei na sala ka rawa kina vei keda me da duavata vaqo ena yalovata kei na inaki ena yakavi oqo.

Ena Okotova ni 2006, a vosa kina o Peresitedi Gordon B. Hinckley ka ulutaga ni nona vosa na “Meda Sa Yadra Mai,Tamata ni Kalou” vakayaca ki na dua na serenilotu a volai ena 1911.¹ E kaci ni cakacaka vei ira na tagane ena Lotu me ra tucake ka vakavinakataki ira cake. Na vosa oqori a voqa mai ki na noqu vakasama niu masulaka meu kila na veika meu wasea vei kemuni.

Kemuni na taciqu, eda bula tiko ena “gauna ni veivakararawataki.”² Na ituvaki ni noda gauna e sega ni dodonu me da kurabuitaka. Era sa tukuni oti tu mai na vica na udolu na yabaki sa oti me ivakasala ka veivakauqeti me da vakarautaki keda. Na ika 8 ni wase ni vola i Momani e tukuna e dua na ivakamacala dodonu vinaka veivakarerei me baleta na noda gauna. Ena wase oqo, e tukuna o Moronai ni sa raica na noda gauna, ka na yaco kina na veivaluvaluti kei na veibolebolei vakaivalu, na tavuki ni vanua, na laba, na butako, kei ira na tamata era tukuna ni sega ni dua na dodonu se na cala ena mata ni Kalou. E vakamacalataki ira na tamata qaciqacia, era dau daramaka na isulu isau lelevu, ka ra dau vakalialia na lotu. E vakaraitaki vua o ira na tamata era sa rawai tu ena veika vakavuravura ka ra vakatara me ra lako siviti ira na “dravudravua, kei ira na luvaiwale, kei na tauvimate kei ira na vakararawataki”³ ka sega ni kauwaitaki ira.

E taroga o Moronai e dua na taro tarabi vei keda—eda bula donumaka na gauna oqo. E kaya o koya, “A cava dou sa madua kina ni taura na yaca i Karisito?”⁴ Na veibeitaki oqo e vakamacalataka vakadodonu sara na ituvaki vakavuravura tubucake tikoga ni vuravura.

Na Josefa Simici—Maciu e tukuna ena veisiga e muri o ira sara mada ga “na tamata digitaki me vaka na veiyalayalati”⁵ era na vakacalai. O ira na tamata ni veiyalayalati eda okati kina na goneyalewa lalai, goneyalewa, kei na marama ena Lotu eda sa papitaiso ka cakava na veiyalayalati kei na Tamada Vakalomalagi. O keda sara mada ga e rawa ni da vakacalai.

Kemuni na taciqu, au sega ni vakabauta ni na vinaka cake na ituvaki me tekivu oqo ka lako yani. Kevaka era ivakaraitaki na veika sa yaco tu nikua, eda gadreva me da tuvakarau ki na cava era tu mai liu. Ena rawarawa ni da laveta na ligada ni da sa soro, ia ni da tamata ni veiyalayalati, eda gadreva me da kakua sara ni soro. Me vaka sa tukuna o Elder Gary E. Stevenson, “Na Tamada Vakalomalagi sa vakaisosomitaka na gauna ni veivakararawataki meda sa na bula tiko ena taucoko ni gauna.”⁶ Au taleitaka na logavinaka ni itukutuku oya.

A tukuna vei keda ena dua na yabaki sa oti o Peresitedi Russell M. Nelson: “Ena tubu me levu cake na kena bololaki na Lotu, na kena ivunau, kei na noda ivakarau ni bula. Ena vuku ni ka oqo, eda gadreva na marama era kila deivaki tu na ivunau i Karisito ka ra na vakayagataka na kila oqori me ra vakavulica ka vukea e dua na itabatamata dau vorata na ivalavala ca. Eda gadreva na marama e rawa ni kidava na veivakacalai ena kena iwalewale kece sara. Eda gadreva na marama era kila na sala me ra rawata kina na kaukauwa e vakarautaka na Kalou me baleti ira era dau rokova nodra veiyalayalati ka ra dau vakaraitaka na veika era vakabauta ena yalodei kei na loloma cecere. Eda gadreva na marama e tu vua na yaloqaqa kei na raiyawa nei Tinada o Ivi.”⁷

E vakadeitaka vei au na itukutuku oqo se cava ga na ituvaki ni noda gauna, e levu tu na vuna me reki ka nanamaki kina na yaloda. Au vakabauta mai vuniyaloqu ni tu e loma vei keda na marama na igu kei na vakabauta ka na vakatara me da sotava na bolebole ni bula tiko ena veisiga e muri oqo. E vola o Sisita Sheri Dew, “Au vakabauta ni gauna eda vulica kina na marama saumaki mai, dau rokova na veiyalayalati me da vakayagataka na taucoko ni noda veivakayarayarataki, ena veisau na matanitu ni Kalou ena mataka ka tarava.”⁸

Ena taura na sasaga vakanamata vakatabakidua me da saumaki ka rokova na veiyalayalati. Me yaco vakakina, eda gadreva me da goneyalewa ka marama dau vulica na ivunau bibi ni kosipeli ka taukena e dua na ivakadinadina sega ni yavalati rawa ni kedra dina. E tolu na tikina au vakabauta ni ra yavu ni ivakadinadina kaukauwa kau nanuma ni yaga me da kila.

iMatai, sa dodonu me da vakadinadinataka ni itakele ni noda vakabauta kei na vakabulai, na Kalou na Tamada Tawamudu kei na Luvena, o Jisu Karisito. O Jisu Karisito na noda iVakabula ka Dauveivueti. Eda gadreva me da vulica ka kila na Nona Veisorovaki kei na ivakarau me da vakayagataka kina e veisiga; na veivutuni e dua vei ira na veivakalougatataki cecere duadua e tu vei keda kece me donu tiko kina noda toso. Eda gadreva me da raici Jisu Karisito me noda idusidusi ka ivakaraitaki ni tamata eda vinakata me da vaka. Eda gadreva me da vakavulica tikoga na noda matavuvale kei na veikalasi me baleta na nona ituvatuva cecere ni veivakabulai na Tamada, ka okati kina na ivunau i Karisito.

iKarua, eda gadreva me da kila na kena gadrevi ena veisiga e muri oqo me vakalesui mai na ivunau, na veisoqosoqo, kei na idola ni lewa. Eda gadreva me dua noda ivakadinadina ni a digitaki vakalou na Parofita o Josefa Simici ka lesi mai vua na Turaga me cakava na veivakalesui mai ka kila ni a tauyavutaki ira na marama ena Lotu me vaka na isoqosoqo a tu ena Lotu i Karisito ena gauna makawa.⁹

Kena ikatolu, eda gadreva me da vulica ka kila na veicakacaka vakalotu kei na veiyalayalati ni valetabu. Na valetabu e toka e dua na kena tikina ena uto ni noda vakabauta bibi duadua, ka kerea na Turaga me da lakova, vakasamataka vakatitobu, vulica, ka kunea yadua na kena ibalebale kei na ivakavakayagataki. Ena yaco me da kila mai na veicakacaka vakalotu ni valetabu, ena vakaraitaki mai kina ena noda bula na kaukauwa vakalou¹⁰ ia oqori baleta na cakacaka vakalotu ni valetabu, eda na rawa ni vakaiyaragitaki ena kaukauwa ni Kalou ka na tiko kei keda na Yacana, ka wavoliti keda Nona lagilagi, ka ra na qaravi keda na Nona agilosi.¹¹ Au taroga kevaka eda sa rawata tiko eso mai na mana ni veiyalayala oya.

Kemuni na taciqu, o koya na gone duadua ena ivavakoso oqo e rawa ni tubu cake ena vakabauta ka vakaitavi vakabibi ena tarai cake ni matanitu ni Kalou. Era na tekivu rawata na gone na nodra ivakadinadina ena nodra wilika se rogoca na ivolanikalou, masu e veisiga, ka vakaivotavota ena sakaramede ena kena ivakarau e vakaibalebale vakalevu. Na gonelalai taucoko kei na goneyalewa e rawa ni ra vakayaloqaqataka na lotu vakamatavuvale ka vakaitavi sara kina vakavinaka. E rawa ni o kena imatai mo tekiduru ni soqoni vata na nomu matavuvale ena masu vakamatavuvale. Kevaka mada ga e sega soti ni vinaka sara nomu itikotiko, na nomu ivakaraitaki ni bulataka ena yalodina na kosipeli e rawa ni vakayarayarataka na nodra bula na nomu matavuvale kei na itokani.

Na goneyalewa ena Lotu era na gadreva me ra raici ira ni ra tiki yaga sara ni cakacaka ni veivakabulai e liutaka na matabete ka ra sega ni sarasara se veitokoni walega. E tu na nomuni ilesilesi ka ko ni sa vakatikori kina mai vei ira era taura tu na idola ni cakacaka ni matabete mo ni veiliutaki ka tu vei kemuni na mana kei na veivakadonui ni cakacaka oqo. Ni o ni vakalevulevuya na nomuni ilesilesi ena mataveiliutaki ni kalasi ka vakavakarau vakayalo, veiwasei vata, dolele yani mo veiqaravi vei ira na lewe ni nomu kalasi, ka veivakavulici vakai kemuni ena kosipeli, o ni sa tu kina ena nomuni itutu ena cakacaka oqo ka o ni na vakalougatataki o iko kei ira nomu itokani.

Na marama kece ena gadreva me ra raici ira ni ra tiki yaga sara ni cakacaka ni matabete. O ira na marama ena Lotu oqo era peresitedi, daunivakasala, qasenivuli, lewe ni matabose, marama, ka tina, ena sega ni cakacaka na matanitu ni Kalou vakavo kevaka eda tucake ka qarava ena vakabauta na noda itavi. So na gauna eda gadreva ga me rabailevu cake noda rai ena veika e rawa ni yaco.

Au sotava ena dua na gauna wale toka oqo e dua na marama mai Mexico ka kila na ibalebale ni vakalevulevuya nona ilesilesi ena vakabauta. A kacivi o Marfissa Maldonado ena tolu na yabaki sa oti me vakavulica e dua na kalasi ni Wilivola ni Sigatabu ni itabagone. A 7 tiko na lewenikalasi ena gauna a kacivi kina, ia ena gauna oqo sa 20 era dau lako mai e veisigatabu. Au tarogi koya ena kurabui, na cava e cakava me yaco kina na tubu levu ni iwiliwili oya. A kaya ena yalomalumalumu, “Isa, e sega ni o au ga. Era veivuke kece na lewenikalasi.” Era raica vata na yacadra na luluqa vakalotu ena ivolaniyaca ka tekivu me ra lako vata yani ka sureti ira me ra lesu tale mai ki lotu. Sa dua talega na papitaiso ena vuku ni nodra sasaga.

A qai vakaduria o Sisita Maldonado e dua na mata ena tabana vakaitukutuku ni veimaliwai me baleti ira ga na nona kalasi ka vakatokai “I Am a Child of God,” ka dau kabira kina na vakasama veivakauqeti eso kei na ivolanikalou ena vica na gauna ena dua na macawa. Sa dau vakauta vei ira nona gonevuli na itavilesi ka veivakayaloqaqataki. E vakila o koya ni bibi me dau veitaratara ena ivakarau era matau vinaka kina, ka sa yaga tiko. A tukuna ga vei au, “Au lomani ira na noqu gonevuli.” Au rawa ni vakila na loloma oya ni tukuna vei au na nodra sasaga, ka vakananumi vei au mai na nona ivakaraitaki na veika e rawa ni rawata ena cakacaka oqo e dua na tamata vakabauta ka cakacakataka ena veivuke ni Turaga.

Era dau sotava na noda itabagone na veitaro dredre e veisiga, ka vuqa vei keda era tu na nona daulomani e dredre tu nodra kunea na isaunitaro. Na itukutuku vinaka sai koya ni ra tu na isau ni veitaro e dau tarogi. Rogoca na itukutuku eso mai vei ira na noda iliuliu ena dua na gauna walega oqo. Eda sa vakauqeti me da vulica ka kila na ituvatuva ni marau nei Tamada Vakalomalagi. Sa vakananumi tale vei keda na ivakavuvuli eso ena ivakaro ni matavuvale.¹² Eda sa vakayaloqaqataki me da vakavulica ka vakayagataka me ivakarau me da tokadei kina ena sala qiqo ka rabailailai.

Rauta ni dua na yabaki sa oti, au a gade vua e dua na tina era se lalai sara na luvena ka nanuma me sa cakava rawa eso na ka ena gauna oqo me taqomaki ira kina na luvena mai na veivakayarayarataki ca ena tadravi ira tu ena initaneti vakakina mai koronivuli. Dau digitaka e dua na ulutaga e veimacawa, vakavuqa e dua ka dau vakavurea vakalevu na veivosaki ena initaneti, ka vakavurea na veivosaki vakaibalebale ena loma ni macawa me rawa ni ra taroga kina na luvena na taro, ka vakadeitaka o koya me ra raica na rai dodonu ka savasava ena veileqa dredre eso. Sa cakava tiko o koya na nona itikotiko me vanua taqomaki vinaka ni vakatataro kei na veivosaki vakaibalebale vakosipeli.

Au leqataka de da bula tiko ena dua na drakinibula dau levei kina na veivakacudrui ka so na gauna eda levea sara ga vakadua na vakavuvulitaki ni ivakavuvuli dodonu. Eda sega ni vakavulica vei ira na noda goneyalewa ni sa ka bibi sara na vakavakarau ki na bula vakatina baleta ni da sega ni vinakata me da vakacudruya e dua e sega tu ni vakawati, o ira era sega ni rawa ni vakaluveni, se me tukuni ni da sa yalana tiko na digidigi ni veigauna mai muri. Ena dua tale na yasana, eda na sega talega ni tukuna vakavinaka na bibi ni vuli baleta ni da sega ni via tukuna na itukutuku ni bibi cake o koya mai na vakamau. Eda levea me tukuni ni tukuna na Tamada Vakalomalagi ni vakamau e baleti rau na tagane kei na yalewa baleta ni da sega ni vinakata me da vakacudrui ira era veivinakati tiko vakatagane se yalewa vata. Ka rawa ni da dau logaloga ca ni veitalanoataka na veika baleta na yalewa kei na tagane se na ivakarau savasava ni veiyacovi.

Dina sara kemuni na taciqu, e dodonu me da dauveinanumi, ia me da vakayagataka talega noda vakasama kei na noda kila na ituvatuva ni veivakabulai me da doudou ka vakadodonu ni da vakavulici ira na luveda kei na itabagone ena ivakavuvuli yaga ni kosipeli e dodonu me ra kila me ra sokota kina na vuravura era bula kina. Kevaka eda sega ni vakavulica vei ira na luveda na ivunau dina—ka vakavulica vakamatata—ena vakavulica vei ira o vuravura na lasu nei Setani.

Au lomana na kosipeli i Jisu Karisito, ka tawamudu na noqu vakavinavinaka ena vuku ni veidusimaki, kaukauwa, kei na veivuke e veisiga yadua au dau ciqoma niu luvena yalewa ni veiyalayalati na Kalou. Au vakadinadinataka ni sa vakalougatataki keda na Kalou, ni da marama bula ena gauna ni veivakararawataki oqo, ena kaukauwa, isolisoli, kei na igu kece sara e gadrevi me rawa ni vakarautaki kina na vuravura me baleta na iKarua ni Lako Mai ni Turaga o Jisu Karisito. Au masuta me rawa ni da raica kece na noda vunilagi ka tucake me yaco me marama ni vakabauta kei na yaloqaqa e gadreva vei keda na Tamada Vakalomalagi. Ena yaca i Jisu Karisito, emeni.