Parofita kei na iApositolo Dauveiqaravi

Tomani tiko nodra veiqaravi e vuravura raraba na Parofita kei na apositolo (raica V&V 107:23). Oqo e dua na ivakaleka ni itukutuku ni nodra veiqaravi me tekivu mai na koniferedi raraba sa oti:

Peresitedi Dieter F. Uchtdorf, iKarua ni Daunivakasala ena Mataveiliutaki Taumada, ena dua na veisiko ena Me 2016, a solia na vakanuinui vei ira na lewenilotu ena koro lelevu eso era a bololaki vakaca mai Igiladi, Varanise, kei Belgium. A sikovi ira na isenivalu, ni lako ki na Valetabu na Paris France (sa voleka tiko ni tara oti ena gauna oqo), ka vakaitavi ena tauyavu ni imatai ni iteki ena Czech Republic. Ena Julai a lako ki Itali, ka laki solia kina e dua na jeke $3 na milioni na ilavo ni Lotu me veivuke ena nodra vueti na isenivalu, ka sikova na keba eso ni isenivalu e Kirisi. Ena Sepiteba a sikovi ira na lewenilotu e Romania, Moldova, Slovakia, Norway, kei Jamani, ka laki vakatabuya tale kina na Valetabu e Freiberg Jamani. E kaya, na kosipeli e kauta mai na inuinui vei ira na tamata ena veivanua cava ga era tu kina ia vei ira na lewenilotu “sa tiko e dua na yalo vakaveitaicini dina ena loma ni Lotu.”

A vakatulewa ena koniferedi ni iTeki mai Moscow Rusia ena June o Elder M. Russell Ballard ena Kuoramu ni iApositolo Le Tinikarua, ni ra sota tiko na iteki tale eso mai Saratov kei St. Petersburg, Rusia. A sota talega kei ira na lewenilotu e Latvia, Estonia, kei Ukraine.

Ena June mai Igiladi, a tukuna kina vei ira na lewe ni Palimedi mai Peritania o Elder Dallin H. Oaks ena Kuoramu ni iApositolo Le Tinikarua ni galala vakalotu ena rawa kina vei ira na veimatalotu me ra vakayacoka vinaka e vuravura. “Eda vinakata me rawa ni ra kaya na lewe ni vuravura oqo ni nodra na veivakalougatataki ni galala vakalotu, ia ena gauna oqo eda se yawakalia sara toka mai kina,” a kaya o koya.

Ena dua na koniferedi me baleta na veivakacacani ki na lotu kei na veivakasaurarataki ni biuvanua a vakayacori ena Valevakatui mai Windsor e Igiladi ena Sepiteba, a kaya kina o Elder Jeffrey R. Holland ena Kuoramu ni iApositolo Le Tinikarua ni levu tu na ka me vulici mai vei ira na ivuvu ni YDE ka na rawa ni vukei ira na ise ena gauna oqo me ra ulabaleta na ituvaki era sotava. “Ena veigauna kece e rawa kina, sa dodonu me da vukea ka tomana tiko na kedra ivakatakilakila na isenivalu ka tukuna na italanoa eso mai na nodra veigauna sa sivi,” e kaya o koya.

Mai Spain, oka kina na Yatu Canary, vakakina e Portugal, a sureti ira na lewenilotu, daukaulotu, kei ira na iliuliu o Elder David A. Bednar ena Kuoramu ni iApositolo Le Tinikarua me ra vakauqeti ira era luluqa tu vakalotu me ra lesu mai ki na Lotu ka vakaitavi kina vakavinaka.

Ni sa ciqoma o Vietnam na Lotu ena June, erau a sotavi ira na vakailesilesi ni matanitu o Elder Quentin L. Cook kei Elder Gary E. Stevenson, mai na Kuoramu ni Apositolo Le Tinikarua ruarua, ka ra veivosakitaka na itukutuku makawa kei na tarai cake ni Lotu. Era a veivosakitaka tale ga ena sala e dau veivuke kina na Lotu ena veicakacaka raraba ni loloma kei ira na dravudravua kei na vakaleqai. Erau a vakatulewa talega ena veisoqoni mai Guam, Micronesia, kei Japani.

Ena June talega, era a vakalougatataki mai Brisbane, Ositerelia, kei na Yatu Kuka ena veisiko nei Elder Neil L. Andersen ena Kuoramu ni iApositolo Le Tinikarua. A sikova talega o Elder Andersen na yanuyanu o Rarotonga ka yaco me imatai ni iApositolo me butuka na yanuyanu o Mangaia.

Ena June mai Colombia, Peru, kei Ecuador, a veisautaka o Elder Ronald A. Rasband ena Kuoramu ni iApositolo Le Tinikarua nona ituvatuva me sikovi ira era se qai vakacoko tiko mai na dua uneune vakaitamera. A wasea e dua na itukutuku ni loloma mai vei Peresitedi Thomas S. Monson ka vakadeitaka vei ira na lewenilotu bula mai na uneune ni ra sega ni guilecavi.

Ena Okosita mai Guatemala, a raica o Elder Quentin L. Cook na tubu cake ni vakadidike ena ivolanikawa kei na cakacaka ni valetabu ka kaya ni sa ivakaraitaki ni nodra vakabauta na lewenilotu.

Ena June ni rau kidavaki yani ena Polynesian Cultural Center mai Awai, Amerika, na tui kei na ranadi mai Toga, a tukuna kina o Elder Dale G. Renlund ena Kuoramu ni iApositolo Le Tinikarua na bibi ni isema vakamatavuvale.

Erau a veisiko vei ira era vakaleqai ena waluvu mai Louisiana, Amerika, o Peresitedi Russell M. Nelson, na Peresitedi ni Kuoramu ni iApositolo Le Tinikarua, kei Elder M. Russell Ballard ni ra veivuke tiko na Mormon Helping Hands ena kena vakasavasavataki na veitikotiko vakacacani ena Okosita kei na Sepiteba. A kila o Elder Ballard ni sivia na 11,000 na voladia era gole mai na 13 na yasana.

Vakakina ena Sepiteba, ena dua na lotu ni vuravura raraba ni itabagone qase cake a vakayacori e Washington, D.C., Amerika, a kaya kina o Elder Cook, “E sega ni dodonu me da rere ena dua na vuravura rerevaki ka leqaleqa sara mada ga.” E vakasalataki ira na itabagone qasecake me ra vakadavora na takete dodonu ka tuva me ra rawata ka kakua ni beca na nodra dui taledi kei na kaukauwa e tu vei ira. E vakayaloqaqataki ira talega me ra dikeva mada nodra vakayagataka na tabana vakatukutuku ni veimaliwai. “Eda rogoca e levu na ka baleta noda vakaitaukeitaki ena tabana vakaitukutuku veimaliwai,“ e kaya o koya, ia “ni da Vakarisito ena yalodina sa takete bibi cake mai na vakaitaukeitaki.”

Na itukutuku donu vinaka ni nodra veiqaravi na iliuliu ni Lotu oqo e rawa ni laurai ena nodra dui tabana ni Facebook ena prophets.lds.org.