Tāvinira’a a te mau peropheta ’e te mau ’āpōsetolo

Tē tāmau noa nei te mau peropheta ’e te mau ’āpōsetolo i te tāvini nā te ao ato’a nei (hi’o PH&PF 107:23). Teie te hō’ē ha’apotora’a nō te tahi o tā rātou mau ’ohipa mai te ’āmuira’a rahi hope’a mai :

Peresideni Dieter F. Uchtdorf, tauturu piti i roto i te Peresidenira’a Mātāmua, i roto i te hō’ē tere fārerei i te ’āva’e mē 2016, ’ua pūpū i te ti’aturira’a i te mau melo i roto i te mau ’oire tei fa’aruru iho nei i te mau tōtōāra’a a te feiā ’ī’ino i Peretāne, Farāni, ’e i Beretita. ’Ua fārerei ’oia i te mau tītīhoria, ’ua haere i te vāhi nō te hiero nō Paris i Farāni (tei fātata i te oti), ’e ’ua ’āmui atu i roto i te fa’ati’ara’ahia te titi mātāmua i te fenua Repupirita Tēhetia. I te ’āva’e tiurai ra ’ua rātere ’oia i Italia, ’ua hōro’a atu i te hō’ē parau moni e 3 mirioni tārā marite nō roto mai i te mau ō a te ’Ēkālesia nō te tauturu i te mau tītīhoria, ’e ’ua haere atu i te mau pūhapa o te mau tītīhoria i te fenua Hēreni. I te ’āva’e setepa ’ua fārerei ’oia i te mau melo nō te mau fenua Rūmānia, Moldova, Torovātia, Norevētia, ’e i Helemani, i reira ’oia i te ha’amo’a-fa’ahou-ra’a i te hiero nō Freiberg Helemani. ’Ua parau ’oia ’ua hōro’a te ’evanelia i te ti’aturi i te mau ta’ata nā te mau vāhi tei reira rātou ’e i rotopū i te mau melo « tē vai ra te hō’ē mana’o o te ’ā’au mau nō te rirora’a ’ei mau taea’e ’e e mau tuahine i roto i te ’Ēkālesia ».

’Ua peresideni ’o Elder M. Russell Ballard nō te pupu nō te Tino ’Ahuru Ma Piti ’āpōsetolo i te ’āmuira’a titi nō Moscou Rūtia i te ’āva’e tiunu ra, mai te tahi atu mau titi tei ’āmui i Saratov ’e i St. Petersbourg, i Rūtia. ’Ua ’āmui ato’a atu ’oia i te mau melo nō Letonia, Etetonia, ’e ’Ūterenia.

I Peretāne i te ’āva’e tiunu ra, ’ua parau ’o Elder Dallin H. Oaks, nō te Pupu nō teTino ’Ahuru ma Piti ’Āpōsetolo i te ’Āpo’ora’a ’Īriti Ture nō te fenua Peretāne ē e fa’ati’a te ti’amāra’a pae fa’aro’o i te mau ’ēkalesia ’ia rave i te maita’i na te ao ato’a nei. ’Ua parau ’oia « hina’aro mātou i te ha’amaita’ira’a nō te ti’amāra’a pae fa’aro’o ’ia porohia i te feiā e fa’aea nei i ni’a i teie paraneta ’e e mea ātea roa mātou i teie fā ».

I te hō’ē ’āmuira’a nō ni’a i te hāmani-’ino-ra’a i te pae fa’aro’o ’e te ti’avarura’a fa’ahepo tei tupu i te parenui nō Windsor i Peretāne i te ’āva’e setepa ra, ’ua parau o Elder Jeffrey R. Holland nō te Pupu nō te Tino ’Ahuru ma Piti ’Āpōsetolo ē e rave rahi mau mea e ha’api’i mai na roto mai i te mau ’itera’a rau o te mau pionie feiā mo’a o te nehenehe e tauturu i te mau tītīhoria nō teie mahana ’ia fa’ateitei i ni’a a’e i tō rātou huru orara’a. « I te mau taime ato’a e nehenehe, e ti’a ia tātou ia fa’a’ōhie ’e ’ia tāmau noa i te ihota’ata hō’ē roa o te tītīhoria ’e ’ia fa’a’itehia te mau ’ā’amu nō tō rātou tau i ma’iri », tāna ïa i parau.

I te fenua Pāniora, ’oia ato’a te mau motu Canari, ’e i te fenua Pōtītī, ’ua ani manihini o Elder David A. Bednar, nō te Pupu nō te Tino ’Ahuru ma Piti ’Āpōsetolo i te mau melo, te mau misiōnare ’e i te feiā fa’atere ’ia fa’aitoito i te mau melo paruparu ’ia ho’i mai nō te fa’aea roa mai i roto i te ’Ēkālesia.

’A fa’ati’ahia ai ’e ’a ha’apāpūhia ai te ’Ēkālesia i te fenua ’Ānāmī i te ’āva’e tiunu ra, ’ua fārerei o Elder Quentin L. Cook ’e o Elder Gary E. Stevenson, rāua nō te Pupu nō te Tino ’Ahuru ma Piti ’Āpōsetolo, i te feiā nō te fa’aterera’a hau ’e ’ua tauaparau nō ni’a i te ’ā’amu ’e te fa’ahotura’a o te ’Ēkālesia. ’Ua tauaparau ato’a rātou e nāhea te ’Ēkālesia ’ia tauturu i te mau ’ōpuara’a turuuta’a ’e te hāmani maita’i ’e ’ia tauturu i te feiā vēvē ’e te feiā rava’i ’ore. ’Ua peresideni ato’a rāua i te mau purera’a i te fenua Guama, Micronesia, ’e i Tāpōnē.

’Oia ato’a i te ’āva’e tiunu, i Brisbane, i te fenua ’Auterāria, ’e te fenua Kūki ’airāni ’ua ha’amaita’ihia na roto i te tere o Elder Neil L. Andersen nō te Pupu nō te Tino ’Ahuru ma Piti ’Āpōsetolo. ’Ua tere ato’a o Elder Andersen i te motu Rarotonga ’e o ’oia te ’āpōsetolo mātāmua tei ta’ahi i ni’a i te motu Mangaia.

I te fenua Colombia, Peru, ’e i te fenua Ētuatōria i te ’āva’e tiunu ra, ’ua fa’anaho fa’ahou o Elder Ronald A. Rasband nō te Pupu nō te Tino ’Ahuru ma Piti ’Āpōsetolo i tāna tārena nō te fārerei i te feiā tei fa’aruru i te hō’ē ’aueuera’a fenua. ’Ua fa’a’ite ’oia i te hō’ē poro’i nō te here a te peresideni Thomas S. Monson ’e ’ua ha’apāpū i te mau melo tei fa’aruru i te ’aueuera’a fenua ē ’aita rātou i mo’ehia.

I Tuatemara i te ’āva’e ’ātete ra, ’ua ’ite o Elder Quentin L. Cook i te hō’ē mara’ara’a tāmau i roto i te ’imira’a i te ’ā’amu ’utuāfare ’e te ’ohipa hiero ’e ’ua parau ē e fa’a’itera’a te reira i te fa’aro’o o te mau melo.

I te fāri’i-manihini-ra’a-hia te ari’i ’e te ari’i vahine nō Tonga i te Pū Ta’ere Porinetia a te ’Ēkālesia i Hawaii, USA i te ’āva’e tiunu ra, ’ua hōro’a o Elder Dale G. Renlund, nō te Pupu nō te Tino ’Ahuru ma Piti ’Āpōsetolo i te mau hi’ora’a nō ni’a i te faufa’a rahi o te aura’a ’utuāfare.

I Louisiana, USA, ’ua haere te peresideni Russell M. Nelson, Peresideni nō te Pupu nō te Tino ’Ahuru ma Piti ’Āpōsetolo ’e o Elder M. Russell Ballard e fārerei i te feiā tei pau i te pape, i reira ’ua tauturu te mau rima tāvini momoni i te tāmāra’a i te mau fare tei ’ino i roto i nā ’āva’e ’ātete ’e setepa. ’Ua ’ite o Elder Ballard ē ’ua hau i te 11 000 ta’ata tauturu nō roto mai i nā 13 tuha’a fenua tei haere mai.

’E i te ’āva’e setepa ra, i roto i te hō’ē purera’a na te ao ato’a nei na te feiā ’āpī pa’ari tei fa’atupuhia i Washington, D.C., USA, ’ua parau o Elder Cook, « ’Eiaha tātou e mata’u noa atu i roto i te hō’ē ao ’ati rahi ’e te hepohepo ». ’Ua a’o ’oia i te feiā ’āpī pa’ari ’ia ha’amau i te mau fā parau ti’a ’e ’ia vai te hō’ē fa’anahora’a nō te fa’aoti i te reira ’e ’eiaha e ha’afaufa’a ’ore i tō rātou iho mau tāleni ’e mau ’ite. ’Ua fa’aitoito ato’a ’oia ia rātou ’ia fa’atano i tā rātou fa’a’ohipara’a i te mau materia ha’apararera’a. « Tē fa’aro’o rahi nei tātou i te parau nō ni’a i tō tātou huru mau i roto i te mau ve’a sōtiare », ’ua parau ’oia « te rirora’a mai te Mesia mau te huru o te reira ïa te fā faufa’a rahi roa a’e ’eiaha rā te riro-noa-ra’a mai te huru ta’ata noa ».

E nehenehe e haere atu e hi’o i te mau ha’amāramaramara’a ’āpī nō te mau tāvinira’a a teie feiā fa’atere o te ’Ēkālesia i ni’a i tā rātou iho ’api Facebook ’e i te prophets.lds.org.