Te hiaʼai mau o te ’ā’au

Nā Carol F. McConkie

Tauturu mātāmua i roto i te peresidenira’a rahi o te Feiā ’Āpī Tamāhine

Nā roto i te mana o te Vārua Maitaʼi, e nehenehe te mau taime pure faufaʼa rahi ato’a e riro ’ei taime moʼa i pīha’i iho i tō tātou Metua, nā roto i te iʼoa o te Tamaiti.

I roto i te mau ʼaroraʼa o te orara’a tāhuti nei, e’ita roa tātou e vaiihohia ʼo tātou anaʼe nō te rave i tā tātou ʼohipa, nō te ʼaro i tā tātou mau ʼaroraʼa, nō te faʼaruru atu i te tāmataraʼa ʼaore rā te mau uiraʼa tei ʼore i pāhonohia mai. Ua haʼapiʼi Iesu Mesia i te hōʼē parabole ē « ’ia tāmau māite te taʼata i te pure ʼeiaha e fiu. » ’Ua parau ʼoia nō te hōʼē haʼavā tei ʼore i mataʼu i te Atua ʼe tei ʼore hoʼi i haʼapaʼo i te taʼata. I te mau mahana atoʼa, e haere te hōʼē vahine ʼivi i mua iāna, nō te aniraʼa ē ’ia faʼatiʼahia ʼoia i tāna ’enemi. ʼAita rā te haʼavā i faʼatiʼa vave mai. ʼEi hopeʼa rā nō tāna aniraʼa tāmau ʼe te onoono, ’ua manaʼo ihora te haʼavā i te hopeʼaraʼa, « Nō te mea rā tē mārō mai nei teie nei vahine ʼivi iāʼu, e faʼatiʼa atu ā vau i tāna parau, ʼo te maniania vau iāna i te haere-pinepine-raʼa mai. »

I muri iho ’ua haʼamāramarama Iesu :

« ʼE e ʼore ānei te Atua e faʼatiʼa mai tōna ra taʼata māʼitihia, ʼo tei tiʼaoro atu iāna i te ruʼi ʼe te ao ?

« E faʼaʼite atu vau ia ʼoutou, e faʼatiʼa mai ïa ʼoia ia rātou e ʼore roa e māhia. »

ʼE ’ua ui te Fatu i muri i teie uiraʼa : « ’Ia tae mai rā te Tamaiti a te taʼata nei, tē vai ra ānei te faʼaroʼo i te fenua nei ? »¹

E mea faufa’a te pure nō te fa’atupu i te fa’aro’o. ’Ia ho’i fa’ahou mai te Fatu, e ’ite ānei ’oia i te ta’ata tei ’ite e nāhea i te pure ma te fa’aro’o ’e tei fa’aineinehia nō te fāri’i i te fa’aorara’a ? « ʼO te tiʼaoro atoʼa hoʼi i te iʼoa o Iehova ra, e hope roa ïa i te ora ».² E mau tamariʼi tātou nā te hōʼē Metua here i te Ao ra, ʼe e nehenehe tā tātou e fānaʼo i te auhō’ēra’a tātou iho ’e ’oia ’ia pure anaʼe tātou « ma te ʼāʼau hinaʼaro mau, ma te manaʼo pāpū, ʼe ma te faʼaroʼo i te Mesia »³ ʼe ’ia rave anaʼe tātou mai te au i te mau pāhonoraʼa tā tātou e fariʼi nā roto i te mau ’ōmuhumuhuraʼa a te Vārua Maitaʼi. E pure, e faʼaroʼo ʼe e haʼapaʼo tātou ma te faʼaroʼo ’ia ha’api’i mai ho’i tātou ’ia riro hō’ē ’e te Metua ’e ’e te Tamaiti.⁴

E ha’amatara te pure fa’aro’o i te ’ē’a nō te fāri’ira’a i te mau ha’amaita’ira’a hanahana tei hāponohia mai te ra’i mai. ’Ua ha’api’i te Fa’aora :

« E ani, e hōro’ahia mai tā ’outou ; e ’imi, e ’itea ïa ’outou ; e pātōtō atu, e ’īritihia mai te ’ōpani ia ’outou :

« ’O te feiā ato’a ho’i i ani ra, te noa’a ra ïa ; ’e ’o tei ’imi ra, tē ’ite ra ïa ; ’e ’o tei pātōtō ra, te ’īritihia ra ïa te ’ōpani iāna ».⁵

Mai te mea tē tīaʼi nei tātou i te fariʼi, e tiʼa ïa ia tātou ’ia ani, ’ia ʼimi, ʼe ’ia pātōtō. I roto i tāna ’imira’a i te parau mau, ’ua tai’o Iosepha Semita i roto i te mau pāpa’ira’a mo’a : « Tē ’ere ra rā te hō’ē o ’outou i te ’ite, e ani ’oia i te Atua ra, ’o tei hōro’a hua mai i te maita’i i te ta’ata ato’a ra, ma te pāto’i ’ore ; ’e e hōro’ahia mai tāna ».⁶ ’Ei pāhonora’a i tāna pure fa’aro’o, ’ua vētea mai te ra’i. ’Ua pou mai te Atua te Metua ʼe Tāna Tamaiti, ʼo Iesu Mesia, ma te hanahana ʼe ’ua paraparau ia Iosepha Semita, ’ei ʼōmuaraʼa i te tau tuʼuraʼa ʼevānelia nō te ’īraʼa o te mau tau. Nō tātou nei, ’ua riro te faʼaoraraʼa temeio, te pārururaʼa pūai, te ʼiteraʼa nō te raʼi mai, te faʼaʼoreraʼa hara faʼatiʼamā, ʼe te hau faufaʼa rahi ʼei mau pāhonoraʼa ’ia pūpū tātou ma te fa’aro’o i te « hiaʼai mau o te ʼāʼau ».⁷

E pure tātou i tō tātou Metua, i te iʼoa o Iesu Mesia, nā roto i te mana o te Vārua Maitaʼi, ’e nō reira, to’otoru melo o te Atuara’a tā tātou e tītau i roto i tā tātou mau aniraʼa.

E pure tātou i tō tātou Metua i te Ao ra ʼe Iāna anaʼe nō te mea ʼo ’oia « te Atua i ni’a i te ra’i ra, e huru mure ʼore tōna, ʼo tē vai nei mai tahito mai ā ē a muri noa atu… ’o tei fa’atumu i te ra’i ʼe te fenua hoʼi, ʼe te mau mea atoʼa ho’i ʼo tē vai nei i roto i taua nā vahi ra ». ʼEi Taʼata tei hāmani ia tātou, ’ua hōroʼa mai ʼoia i te mau faʼaueraʼa ʼe « ’ia here ʼe ’ia tāvini tātou Iāna, i te Atua ora ʼe te parau mau anaʼe ra, ʼe ʼo ʼOia anaʼe tā [tātou] ʼe haʼamori ra ».⁸

’Ia pure anaʼe tātou i te Metua i te Ao ra ma te faʼaroʼo, « e faʼaherehere mai ʼoia ia ʼoutou i tō ʼoutou mau ʼati… ʼe ’ia faʼa’īhia [ʼoutou] i tōna ra aroha ».⁹ ’Ua faʼaʼite mai te peresideni Henry B. Eyring ē ’ua haʼapiʼi mai ʼoia nā roto i te mau pure a tōna metua tāne i roto i te ʼaroraʼa i te maʼi mariri ’aitaʼata, i te auraʼa hōhonu i rotopū i te Atua ʼe tāna mau tamari’i :

« ’A pūai mai ai te māuiui, ’ua ’ite mātou iāna i te po’ipo’i i te tūturira’a i pīha’iho i tōna ro’i. ’Ua paruparu roa ’oia nō te ho’i i ni’a i tōna ro’i. Parau mai nei ’oia ē, i pure na ’oia nō te ani i tōna Metua i te Ao ra ē, nō te aha ’oia e māuiui rahi nei, i tāmata noa na ho’i ’oia ’ia riro ’ei mea maita’i. ’Ua parau ʼoia ē ’ua tae mai te hōʼē pāhonoraʼa mārū iāna : ‘Tē hinaʼaro nei te Atua i te mau tamāroa itoito.’

« ’E ’ua tāpe’a ’oia ē tae roa i te hope’a ; ma te ti’aturi ē, ’ua here te Atua iāna, tē fa’aro’o ra ho’i iāna ’e e fa’ateiteihia ho’i ’oia. ’Ua ha’amaita’ihia ’oia i te ’ite-’oi’oi-ra’a ’e i te ’orera’a e ha’amo’e ē, maoro noa tātou i te purera’a atu, tei ’ō nei tō tātou Atua here ».¹⁰

E pure tātou nā roto i te iʼoa o Iesu Mesia nō te mea tei roto i te Mesia ra tō tātou ora, ʼe « ʼaita atu hoʼi ʼe iʼoa i faʼaʼitehia mai i te taʼata i raro aʼe i teie nei raʼi, e ora ai tātou ».¹¹ E haere tātou i te Metua ra nā roto i te iʼoa moʼa o Iesu Mesia¹² nō te mea ʼo ʼoia tō tātou ārai i mua i te Metua ʼe e pāruru ʼoia i tō tātou parau.¹³ ’Ua māuiui ’oia, ’ua tahe tōna tōtō, ʼe ’ua pohe ʼoia no te faʼahanahana i tōna Metua, ʼe ’ua ʼīriti tāna tāparura’a aroha nō tātou i te ’ēʼa nō tātou tātaʼitahi ’ia noaʼa te hau i roto i teie nei oraraʼa ʼe te ora mure ʼore i roto i te ao a muri. ʼAita ʼoia e hinaʼaro ē ’ia māuiui ā tātou ʼaore rā ’ia faʼaʼoromaʼi māite i te tahi atu ā mau tāmataraʼa hau atu i teī hinaʼarohia. ’Ua hina’aro mau ’oia ’ia fāriu tātou iāna ra ʼe ’ia faʼatiʼa tātou iāna ’ia haʼamāmā i tā tātou mau hōpoiʼa, ’ia faʼaora i tō tātou mau ʼāʼau, ʼe ’ia tāmā i tō tātou mau vārua nā roto i tōna mana tāmā. E’ita roa tātou e hinaʼaro ’ia faʼahiti faufaʼa ’ore noa i tōna ra iʼoa nā roto i te mau parau teī tāmau-ʼāʼau-hia. Te mau pure mau tei pūpūhia nā roto i te iʼoa moʼa o Iesu Mesia e faʼaʼiteraʼa ïa nō tō tātou here pāpū, tō tātou māuruuru mure ʼore, ʼe tō tātou hinaʼaro tāmau ’ia pure mai iāna i pure, ’ia rave mai tāna i rave, ʼe ’ia riro mai iāna ra te huru.

E pure tātou nā roto i te mana o te Vārua Maitaʼi nō te mea « ʼo te ani mai nā roto i te Vārua ra e ani ra ïa mai te au i te hinaʼaro o te Atua ».¹⁴ ’Ia pure anaʼe tātou ma te faʼaroʼo, e nehenehe tā te Vārua Maitaʼi e arataʼi i tō tātou mau manaʼo ’ia tuea tā tātou mau parau i te hinaʼaro o te Atua. « ʼEiaha e ani ’ia pau i te puhurahia e ʼoutou i tō ʼoutou hinaʼaro tiʼa ʼore ra, e ani rā ma te manaʼo ʼāueue ʼore, ʼeiaha ʼoutou e hōroʼa ia ʼoutou iho i te rave i te parau ʼino ra, ’ia tavini rā i te Atua mau ʼe te ora ra ».¹⁵

« E ʼere i te mea faufaʼa rahi noa ’ia ʼite tātou e nāhea ’ia pure, e mea faufaʼa rahi atoʼa rā ē ’ia ʼite tātou nāhea ’ia fāriʼi i te pāhonoraʼa i tā tātou pure, ’ia ʼite, ’ia vai ara, ’ia nehenehe ’ia hiʼo māramarama maitaʼi ʼe ’ia ʼite ma te manaʼo pāpū i te hinaʼaro ʼe te ʼopuaraʼa a te Atua nō tātou ».¹⁶

’Ua faʼaʼite mai te peresideni Eyring : « ’Ua pāhonohia tā’u mau pure. E mea ta’a maita’i teie mau pāhonora’a i te taime te mea tā’u i hina’aro ’ua fa’amāmūhia nā roto i te hō’ē tītaura’a pūai ’ia ’ite i te hina’aro o te Atua. I reira te pāhonoraʼa a te hō’ē Metua here i te Ao ra e parau mai ai i te ferurira’a nā roto i te hō’ē reo iti marū ʼe e pāpa’ihia ai i ni’a i te ’ā’au. »¹⁷

ʼA tomo ai te Faʼaora i roto i te ’ō nō Getesemane, ’ua māuiui rahi pohe tōna ra vārua. I roto i tōna māuiui, te taʼata anaʼe tāna e nehenehe e fāriu atu, ʼo tōna ïa Metua. ’Ua tāparu ʼoia : « ’Ia tiʼa ra, e hōpoi ’ē atu i teie nei ʼāuʼa ». ’Ua parau faʼahou rā ʼoia ē : « ’Ia tupu rā tō ʼoe hinaʼaro, ʼeiaha tōʼu ».¹⁸ Noa atu ē ʼaita tāna e hara, ’ua piʼihia te Faʼaora ’ia « [faʼaʼoromaʼi] i te māuiui ʼe te ʼati ʼe te mau huru faʼahemaraʼa atoʼa ra », ’e tae noa atu i te mau maʼi ʼe te mau paruparu o tōna mau taʼata. « ’Ua faʼaʼoromaʼi ʼoia i te mamae tino nei, ’ia rave ʼoia i te mau hara a tōna ra mau taʼata i niʼa iāna iho, ’ia parai ʼoia i tā rātou mau hapa mai te au i te mana o tōna faʼaora ».¹⁹ ’Ua pure ʼoia e toru taime : « E taʼu Metua ē, ’ia tupu rā tō ʼoe hinaʼaro ».²⁰ ʼAita te ʼāuʼa i hōpoi-’ē-hia atu. Nā roto i te pure ha’ehaʼa ʼe te faʼaroʼo, ’ua noa’a tōna pūai nō te haere i mua ʼe nō te rave faʼaoti i tāna misiōni hanahana ’ei faʼaineinera’a i tō tātou fa’aorara’a, ’ia ti’a ia tātou ’ia tātarahapa, ’ia tiʼaturi, ’ia haʼapaʼo ’e ’ia fāriʼi i te mau haʼamaitaʼiraʼa nō te ora mure ʼore.

E ʼere paha te mau pāhonoraʼa tā tātou e fāriʼi i te mea tā tātou i hinaʼaro. I roto rā i te mau tau ’ārepurepu, e riro ïa tā tātou mau pure ʼei rēni ora nō te here ʼe te aroha rahi. I roto i tā tātou tāparuraʼa, e haʼapūaihia paha tātou ’ia haere i mua ʼe ’ia rave faʼaoti i te mea tei faʼataʼahia ia tātou ’ia rave. I tāna Feiā Moʼa i roto i te mau tau ʼati, ’ua parau te Fatu, « ’Ia tuʼu atu ’ia tāmāhanahanahia tō ʼoutou mau ʼāʼau… tei roto i tōʼu pu’e rima te mau taʼata atoʼa ; ʼa faʼaea noa na ma te hau ʼe ʼa ʼite ē ʼo vau nei te Atua. »²¹

E pure tātou i te vāhi moʼemoʼe, ’e tō tātou ʼutuāfare, i te fare pureraʼa, i te hiero, ’e te vāhi ato’a i reira tātou ; e pure tātou ma te ʼāʼau tātarahapa ʼe te vārua marū i te ʼimira’a i te fa’a’orera’a hara, te paʼari o te raʼi ʼaore rā te tahi noa pūai nō te faʼaʼoromaʼi, ’ia pure noa rā tātou ma te ’ā’au ato’a, ma te fāriu tāmau i ni’a i te Atua nō tō tātou maitaʼi ʼe te maitaʼi o te taʼata nā pīha’i iho ia tātou. E niʼiniʼi mai te mau hiaʼai mau i pūpūhia, nā roto i te vārua māuruuru i te mau haʼamaitaʼiraʼa rahi ʼe te māuruuru nō te mau haʼapiʼiraʼa o te oraraʼa, i te faʼaroʼo tāmau i te Mesia, « te tīaʼi pāpū roa » ’e « te here i te Atua ʼe te taʼata atoʼa », i roto i tō tātou ʼāʼau.²²

E hōro’a te pure nō ’ō mai i te Atua. ʼEiaha tātou e manaʼo ē tē ora nei tātou ʼo tātou anaʼe. Tē fa’a’ite pāpū nei au ē, nā roto i te mana o te Vārua Maitaʼi, e nehenehe te mau taime pure faufaʼa rahi ato’a e riro ’ei taime moʼa i pīha’i iho i tō tātou Metua, nā roto i te iʼoa o te Tamaiti. Nā roto i te i’oa mo’a o Iesu Mesia ra, ’āmene.