Te ha’avā parau ti’a
Nā Elder Lynn G. Robbins
Nō te peresidenira’a o te Hitu ’Ahuru
Hō’ē noa rāve’a e ha’avā ai i te ha’avāra’a parau ti’a, mai ia Iesu Mesia, ’oia ho’i, te rirora’a mai iāna te huru.
I roto i tōna orara’a tāhuti nei, ’ua riro Iesu Mesia ’ei ha’avā here ta’ata ’e te pa’ari ta’a ’ē ’e te fa’a’oroma’i. I roto i te mau pāpa’ira’a mo’a, tē parauhia ra ’oia ’ei « ha’avā parau ti’a » (2 Timoteo 4:8 ; Mose 6:57), ’e teie tāna parau a’o ia tātou, ’oia ho’i, ’ia « ha’avā i te ha’avāra’a parau ti’a » (hi’o ’Īritira’a a Iosepha Semita, Mataio 7:1-2 [i roto Mataio 7:1, nota raro a]) ’e ’ia « fa’atae i tō ’oe ti’aturira’a i te reira Vārua ’o te fa’aarata’i atu ’ia rave i te ’ohipa maita’i… ’ia ha’avā mai te parau ti’a ra » (PH&PF 11:12).
Nā teie parau a’o i te Tino ’Ahuru Ma Piti ’āti Nephi ra e tauturu ia tātou ’ia ha’avā atu mai tā te Fatu : « E riro ’outou ’ei ha’avā i teie nei feiā, i te au i te [ha’avāra’a] tā’u e hōro’a atu ia ’outou, [’o te ti’a ho’i]. Nō reira, e aha tō ’outou huru e au ai ? ’Āmene e parau atu vau ia ’outou, mai tō’u nei ïa » (3 Nephi 27:27 ; reta tei fa’ahuru-’ē-hia). E mo’ehia ia tātou i te tahi taime ē, i te hōro’ara’a ’oia i teie parau a’o ’ia riro mai iāna te huru, tē paraparau ra ’oia e nāhea i te ha’avā ma te parau ti’a.
Ha’avāra’a parau ti’a ’ore
Hō’ē hi’ora’a ha’amā maita’i nō te ha’avāra’a parau ti’a ’ore, tei roto ïa i te parabole nō te māmoe mo’e, i te taime ’a ha’avā hape ai te mau pharisea ’e te mau pāpa’i parau i te Fa’aora ’e te feiā e tāmā’a ra ’e ana, ’a nā ’ō ai : « Tē ’ite nei teie nei ta’ata i te feiā rave hara, ’e tē ’amu ato’a nei i tā rātou ’amura’a » (Luka 15:2)—’aita rā ho’i rātou i ’ite ē, e ta’ata hara ana’e rātou. Nō tō rātou ’ā’au fa’ahapa, ’aita te mau pāpa’i parau ’e te mau pharisea i ’ite noa atu i te ’oa’oa nō te fa’aorara’a i te māmoe mo’e.
Nā te mau « pāpa’i parau ’e te mau pharisea » ato’a i huri mai « i te hō’ē vahine i ro’ohia [i roto i te fa’aturi] » (Ioane 8:3) i mua i te Fa’aora ra e hi’o ē, e ha’avā ānei ’oia iāna mai te au i te ture a Mose (hi’o te ’īrava 5). ’Ua ’ite ’outou i te hope’a o te ’ā’amu, nāhea ’oia i te fa’aha’eha’ara’a ia rātou i tā rātou ha’avāra’a parau ti’a ’ore ’e nāhea rātou i te « fa’ahapara’ahia ho’i e tō rātou iho ’ā’au » ’e ’ua reva « tāta’itahi noa atu ra » (’īrava 9 ; reta tei fa’ahuru-’ē-hia). ’Ua parau atura ’oia i te vahine ra : « E’ita ato’a vau e fa’autu’a ia ’oe : ’a haere, ’eiaha rā ’ia hara fa’ahou. ’E ’ua fa’ahanahana ihora te vahine i te Atua mai taua hora ra ’e ’ua ti’aturi i tōna i’oa » (’Īritira’a a Iosepha Semita, Ioane 8:11 [i roto Ioane 8:11, nota raro c]).
Mai te huru e peu iho ā nā te ta’ata tino nei ’e te vahine tino nei ’ia fa’ahapa ia vetahi ’ē ’e ’ia ha’avā parau ti’a ’ore atu ’aore rā, mai tei au i tei ti’a nōna iho. ’Ua tupu ato’a te reira nō Iakobo ’e Ioane, piti ’āpōsetolo a te Fa’aora. ’Ua riri roa rāua nō te ’orera’a te ta’ata nō te hō’ē ’oire iti nō Samaria i fa’atura i te Fa’aora (hi o Luka 9:51-54) :
« ’Ite a’era [rāua]… i te reira, ’ua nā ’ō maira rāua, E te Fatu, e ti’a ānei ia ’oe ’ia parau māua i te auahi ’ia ma’iri mai nō ni’a i te ra’i, ’ia pau atu rātou, mai tā Elia ra ?
« ’Ua fāriu atura rā ’oia, ’avau atura ia rāua, nā ’ō atura, ’Aore ’ōrua i ’ite i te huru o tō ’ōrua ’ā’au.
« ’Aore ho’i te Tamaiti a te ta’ata nei i haere mai e taparahi i te ta’ata, i haere mai rā e fa’aora » (mau ’īrava 54-56).
I teie mahana, e ti’a i te mau « ha’avā nō te pā’āto’ara’a » (PH&PF 107:74), tā tātou mau ’episekōpo ’e te mau peresideni ’āma’a, ’ia ’ape i terā huru ’umera’a e fa’ahapa, mai ia Iakobo rāua Ioane i terā taime. E pāhono te ha’avā parau ti’a i te mau fā’ira’a hara ma te aumihi ’e te hāro’aro’a. ’Ei hi’ora’a, ’ia matara mai te hō’ē taure’are’a mai roto mai i te piha tōro’a o te ’episekōpo, e ti’a iāna ’ia putapūhia i te here o te Fa’aora nā roto i te ’episekōpo, ’e ’ia vai ’oia i roto i te ’oa’oa ’e te mana fa’aora o te Tāra’ehara—’eiaha roa atu ïa te ha’amā ’e te hi’o-’ē-ra’a. Hape atu ai te ’episekōpo i te fa’aātea rahi atu ā i te māmoe mo’e i roto i te medebara (hi’o Luka 15:4).
Te fa’atītī’aifarora’a
Teie rā, ’aita te aumihi e fa’a’ore nei i te tītaura’a ’ia fa’atītī’aifaro. Te ta’o [farāni nō te] fa’atītī’aifarora’a [discipline] nō roto mai ïa i te ta’o latino discere, « ha’api’i », ’aore rā te ta’o discipulus, « te pīahi », ’e nō reira te pipi [disciple], e pīahi ïa ’e e ta’ata ’āpe’e ho’i.1 Te fa’atītī’aifarora’a mai tā te Fatu, ’o te ha’api’ira’a ïa ma te here ’e te fa’a’oroma’i. I roto i te mau pāpa’ira’a mo’a ’ua fa’a’ohipa pinepine te Fatu i te ta’o tā’iri ’ia parau ’oia nō te fa’atītī’aifarora’a (hi’o ’ei hi’ora’a, Mosia 23:21 ; PH&PF 95:1). Te ta’o [farāni nō] tā’iri [châtier] nō roto mai ïa i te ta’o latino castus, ’oia ho’i « vi’ivi’i ’ore ’aore rā mā », te aura’a ra, e tā’iri, e « tāmā » ïa.2
I roto i te ao, nā te ha’avā o te fenua e fa’ahapa i te hō’ē ta’ata ’e e tāpe’a iāna i roto i te fare ’auri. ’Ei hi’ora’a ’ē, tē ha’api’i mai nei te Buka a Moromona ē, ’ia onoono tātou i te rave i te hara, ’o tātou iho ā te ha’avā (Alama 41:7) e tu’u ia tātou i roto i te fare ’auri pae vārua. ’Ohipa ’ē roa i’ō nei, tei te ha’avā nō te pā’āto’ara’a te mau tāviri e matara ai te ’ūputa o te fare ’auri ; « nō te mea nā roto i te tā’irira’a e fa’aineine ai au i te rāve’a nō te fa’aorara’a ia rātou i roto i te mau mea ato’a ’ia ora atu i te fa’ahemara’a » (PH&PF 95:1 ; reta tei fa’ahuru-’ē-hia). Te ’ohipa ha’avāra’a a te ha’avā parau ti’a, nō te aroha ïa, te here ’e te fa’aorara’a, ’eiaha rā nō te fa’ahapara’a.
’Ua fa’atītī’aifarohia te taure’are’a Iosepha Semita i roto e maha matahiti hi’opo’ara’a hou ’a fāri’i ai i te mau ’api ’auro, « nō te mea ’aita ’oe i ha’apa’o i te mau fa’auera’a a te Fatu ».3 I muri mai, i te mo’era’a ia Iosepha nā ’api 116, ’ua fa’atītī’aifaro-fa’ahou-hia ’oia. Noa atu tōna mana’o tātarahapa rahi mau, ’ua ’īriti te Fatu i tāna mau faufa’a nō te hō’ē taime poto, nō te mea « ’o tā’u i here ra e tā’iri ato’a ho’i au ’ia ti’a ’ia fa’a’orehia tā rātou mau hara » (PH&PF 95:1).
Tē parau ra Iosepha : « ’Ua ’oa’oa te melahi ’a fa’aho’i mai ai ’oia i te Urima ’e te Tumima iā’u ’e ’ua parau ’oia ē, ’ua māuruuru te Atua nō tō’u ha’apa’o-maita’i-ra’a ’e tō’u ha’eha’a, ’ua here ’oia iā’u nō tō’u tātarahapara’a ’e tō’u itoito i te pure ».4 Nō te hina’aro o te Fatu e ha’api’i ia Ioseha i te ha’api’ira’a taui ’ā’au, ’ua tītau ’oia iāna i te fa’atūsiara’a putapū ’ā’au—e tuha’a faufa’a ho’i te fa’atūsiara’a nō te fa’atītī’aifarora’a.
Te fa’atūsiara’a
« I te tau tahito ra, ’ua riro te fa’atūsiara’a i te fa’arirora’a i te hō’ē mea, ’aita ana’e te hō’ē ta’ata ’ei mea mo’a »,5 e aura’a tū’ati’ati te reira i te ta’o tā’iri—’oia ho’i « e tāmā ». Nā reira ato’a, i ’Īserā’ela tahito ra, e tae mai te fa’aorera’a o te hara ’e te hapa nā roto i te pūpūra’a ō, ’aore rā te hō’ē tūsia.6 ’Aita te tūsia i « fa’a’ite ātea [noa] i taua tūsia rahi ’e te hope’a ra » (Alma 34:14), ’ua tauturu ato’a rā ’ia fa’atupu i te mana’o māuruuru rahi a’e nō te tāra’ehara a te Fa’aora. Te hina’aro ’ore e fa’atūsia i roto i tā tātou tātarahapara’a, e fa’ao’ō’ora’a ïa ’e e fa’a’inora’a ho’i i te fa’atūsiara’a rahi a’e a te Mesia nō taua hara nei, ’o tē ha’afaufa’a ’ore nei i tōna mamae—e tāpa’o ’eta’eta ho’i nō te māuruuru ’ore.
I te tahi pae, nā roto i te rāve’a huru ’ē nō te fa’atūsiara’a, e ’āpī maoti tātou i te hō’ē faufa’a mure ’ore—tōna aroha ’e tāna fa’a’orera’a hara ē i te hope’a, « te mau mea atoa a [te] Metua ra » (PH&PF 84:38).7 ’Ei tuha’a nō te ’ohipa tau maoro nō te tātarahapara’a, e ’ohipa ato’a te fa’atūsiara’a ’ei rā’au fa’aora nō te tauturu i te monora’a « te māuiui i roto i te ’ā’au » (Alama 42:18) i te « hau [o te] ’ā’au » (Mosia 4:3). ’Aita ana’e e fa’atūsiara’a, e ’ite mai te ta’ata ē, e mea pa’ari ’ia fa’aore ’ōna iho i tāna hapa, nō te māna’ona’o-noa-ra’a i teie mea i tāpe’ahia.7
Te metua ’ei ha’avā parau ti’a
Ma’a ta’ata noa i roto ia tātou e pi’ihia ’ia riro ’ei mau ha’avā nō te pā’āto’ara’a, noa atu rā, e tano te mau parau tumu nō te ha’avāra’a parau ti’a ia tātou pā’āto’a, i te mau metua iho ā rā, pauroa te mahana e rāve’a tā rātou nō te fa’a’ohipa i te reira ’e tā rātou mau tamari’i. Ha’api’i maita’i i te hō’ē tamari’i, ’o te iho mau ïa o te ti’ara’a metua maita’i, ’e fa’atītī’aifaro nā roto i te here, ’o te iho mau ïa nō te rirora’a ’ei ha’avā parau ti’a.
’Ua ha’api’i te peresideni Joseph F. Smith : « Mai te peu e ’iriā mai te mau tamari’i ’e e mea fifi ’ia fa’atere ia rātou, ’a fa’a’oroma’i tae roa atu i te taime e manuia ai ’outou nā roto i te here… ’e i reira ’outou e tarai ai i tō rātou nātura ia au i tō ’outou hina’aro. »8
Te pa’ari te ’apohia mai i te hi’ora’a ē, ’ia ha’api’i te mau peropheta i te fa’atītī’aifarora’a, e paraparau rātou nō te mau huru o te Mesia. Tē hōro’a nei Te Parau Ha’api’ira’a ’e te mau Parau Fafau i teie parau a’o mātau maita’i nō ni’a i te fa’atītī’aifarora’a :
« E ’ore roa e nehenehe ’e e ’ore roa ho’i e ti’a ’ia ha’amauhia te hō’ē mana ’e ’aore rā te hō’ē vāhi iti a’e nō te tura nā roto i te autahu’ara’a, maori rā nā roto i te tāparura’a, nā roto i te fa’a’oroma’i-noa-ra’a, nā roto i te marū ’e te ha’eha’a, ’e nā roto i te here mau ra ;
« Nā roto i te aroha, ’e te ’ite ateate ra, ’o te fa’arahi roa i te vārua ma te fa’ahua ’ore, ’e ma te ha’avare ’ore i roto i tōna ’ā’au—
« Ma te fa’ahapara’a atu i te tahi mau taime nā roto i te parau pāpū roa, ’ia fa’auruhia ra e te Vārua Maita’i ; ’e i reira e fa’a’ite mai ai i te rahira’a nō te here » (PH&PF 121:41-43).
Tē ha’api’i nei teie ’īrava ’ia fa’ahapa « ’ia fa’auruhia… e te Vārua Maita’i », ’eiaha rā ’ia fa’auruhia e te riri. ’Aita te Vārua Maita’i e tū’ati i te riri, inaha « ’o tei roto iāna te vārua mārō ra, e ’ere ’oia i tā’u, nō te diabolo rā, ’o te metua ’oia nō te mārō, ’e ’ua fa’aitoito ’oia i te ’ā’au nō te ta’ata e mārō ai te tahi i te tahi ma te riri » (3 Nephi 11:29). ’Ua ha’api’i te peresideni George Albert Smith ē : « ’Aita te mau mea au ’ore i parauhia i raro a’e i te fa’aurura’a a te Fatu. Te Vārua o te Fatu e vārua hāmani maita’i ïa ; e vārua fa’a’oroma’i ; e vārua aroha ’e te here ’e te fa’a’oroma’i maoro…
« Mai te mea rā ē, e vārua ’imi hape tō tātou… nā roto i te tahi rāve’a ha’amou, e ’ere roa atu ïa te reira nō roto mai i te Vārua o tō tātou Metua i te Ao ra, e mea ’ino ïa i te mau taime ato’a…
Te hāmani maita’i, ’o te mana ïa tā te Atua i hōro’a mai ia tātou nei nō te ’īriti i te mau māfatu ’eta’eta ’e nō te fa’aha’eha’a i te mau vārua ’eta’eta ».9
Te ihota’ata mau o tā tātou mau tamari’i
I te haerera’a te Fa’aora i rotopū i te mau ’āti Nephi, e ’ohipa fa’ahiahia tāna i rave ’e te mau tamari’i.
« ’E ’ua ha’api’i mai ’oia i te mau tamari’i a te tia’a ta’ata… ’e ’ua matara tō rātou ’arero iāna, ’e nā rātou i fa’a’ite i te mau mea rarahi ’e te māere i tā ratou mau metua ra […]
« ’E nā rātou i hi’o ’e i fa’aro’o ho’i i tāna mau tamari’i ra ; ’oia mau, ’ua parau tō te mau ’aiū ra vaha, ’e nā rātou i fa’a’ite i te mau mea māere » (3 Nephi 26:14, 16).
Penei a’e hau atu i te paraura’a te vaha o te mau ’aiū, ’ua fa’a’ara’ara te Fatu i te mata, ’e te tari’a ’ua fa’afatafata ho’i, o tō rātou mau metua hitimahuta ra. ’Ua hō-mai-hia i teie nau metua te hōro’a ta’a ’ē ’ia ’ite poto i roto i te mure ’ore ’e ’ia ta’a i te ihota’ata mau ’e te ti’ara’a hou i te tāhuti o tā rātou mau tamari’i. E’ita ānei te reira e taui roa i te huru te mau metua i hi’o ’e i rave i tā rātou mau tamari’i ? Mea au nā’u teie fa’ahitira’a tei parauhia ra nā Goethe : « Te huru e hi’o ’oe i te hō’ē [tamari’i], ’o te huru ïa e rave ’oe ia rātou, ’e te huru e rave ’oe ia rātou ’o te mea ïa e riro mai rātou ».10 ’Ua riro te ha’amana’ora’a i te ihota’ata mau o te hō’ē tamari’i ’ei hōro’a hi’o na, ’o te fa’auru i te hi’ora’a ātea a te ha’avā parau ti’a.
Pū’ohura’a
’Ua ha’api’i mai te peresideni Thomas S. Monson : « ’Eiaha e vaiiho i te hō’ē fifi e tano ’ia fa’a’āfaro ’ia riro ’ei mea faufa’a a’e i te hō’ē ta’ata e here ».11 E mea faufa’a roa ho’i teie parau tumu nō te rirora’a ’ei mau ha’avā parau ti’a, nō tātou iho ā rā ’e tā tātou mau tamari’i.
Hō’ē noa rāve’a e ha’avā ai i te ha’avāra’a parau ti’a, mai ia Iesu Mesia, ’oia ho’i, te rirora’a mai iāna te huru. Nō reira, « e aha tō ’outou huru [te tāne ’e te vahine] e au ai ? ’Āmene, e parau atu vau ia ’outou, mai tō’u nei ïa » (3 Nephi 27:27). I te i’oa o Iesu Mesia ra, ’āmene.