Tē ha’api’i mai nei te Fatu ra ’o Iesu Mesia ia tātou ’ia pure

Na Elder Juan A. Uceda

Nō te Hitu ’Ahuru

’Ia pure ana’e ’outou, te pure mau ra ānei ’outou ’e ’aore rā tē fa’ahiti noa ra ānei i te mau pure ?

I te matahiti 1977, tē tāvini ra vau ’ei misiōnare rave tāmau i Cusco, Peru. ’Ua fāri’i au ’e tō’u hoa i te parau fa’ati’a ’ia ’āfa’i i te mau misiōnare pā’āto’a nō te tuha’a nō Cusco i te vāhi ano nō Machu Picchu.

I te pae hope’a o tō mātou tere māta’ita’i i teie vāhi ano, ’ua hina’aro te tahi mau misiōnare e haere i te Inca Bridge (te ara turu inca) hō’ē tuha’a o te purumu mou’a. I taua iho taime ra, ’ua fa’a’ite mai ra te Vārua iā’u ē, ’eiaha e haere i reira. Tei te hiti mou’a roa te purumu e 2000 ’avae (610 m) topatarere. E rave rahi vāhi hō’ē ana’e ta’ata e nehenehe ’e haere i te taime hō’ē. ’Ua parau atura vau ’e tō’u hoa ia rātou ē, ’eiaha mātou e haere i te ara turu.

Terā rā, ’ua onoono te mau misiōnare e haere. ’Ua haere noa te tūra’ira’a i te rahi, e noa atu te fa’a’itera’a a te Vārua iā’u, ’ua fāri’i au i te tūra’ira’a a te mau hoa ’e ’ua parau atu vau ē, e haere mātou e māta’ita’i i te ’ē’a turu, mai te mea noa iho ē, e ha’apa’o maita’i mātou.

’Ua tomo mātou nā ni’a i te ’ē’a nō te haere atu i te ’ē’a turu, o vau te hope’a o te pupu, ’e i te ha’amatara’a, ’ua haere marū noa te ta’ata tāta’itahi mai tei parauhia. I muri iho ’ua ha’amata te mau misiōnare i te haere vitiviti ’e ’ua horohoro roa. ’Ua ha’apa’o ’ore rātou i tā’u mau anira’a ’ia haere marū. ’Ua mana’o vau e tāpapa ia rātou, nō te parau ia rātou ’ia ho’i i muri. E mea ātea vau i muri ia rātou, ’e ’ua tītauhia iā’u ’ia horo vitiviti nō te tāpapa ia rātou.

’Ia tae a’era vau i te hō’ē tipu’ura’a, hō’ē vāhi oaoa roa nō te ta’ata to’opiti ’ia haere, ’ua ’ite atu vau i te hō’ē misiōnare e ti’a noa ra, ma te ha’uti ’ore, ’ua piri te tua i ni’a i te matomato. ’Ua ani atu vau iāna e aha ’oia i ti’a noa ai i reira. ’Ua parau mai ra ’oia ē, ’ua puta mai te mana’o i roto iāna ’ia fa’aea noa i reira nō te tahi ma’a taime ’e e ti’a iā’u ’ia haere.

’Ua tae mai te mana’o i roto iā’u ’ia tāpapa ’oi’oi i te feiā i mua roa, nō reira, ’ua tauturu mai ra ’oia iā’u ’ia haere na mua iāna, ’e ’ua tae au ma’a vāhi iti i raro atu i te purumu. ’Ua ’ite a’era vau ē, ’ua ’ī roa te repo i te ’aihere matie maita’i. ’Ua ta’ahi au i ni’a i te repo, ’e ’ua ’ite a’era vau ē, ’aita ’e repo i raro a’e i taua mau ’aihere ra. ’Ua haru atura vau i ni’a i te tahi mau ’āma’a rā’au i raro a’e i te purumu. Nō te hō’ē taime poto ’ua ’ite atu vau i raro, e 2000 avae i raro atu iā’u, i te ’Ānāvai Urubamba ’e tahe ra nā roto i te ’Āfa’a Mo’a nō te mau Incas. ’Ua ’ite a’era vau ē, mai te huru ra ē, te fa’aru’e mai ra tō’u pūai, ’e tei te huru o te taime e toe ra, e’ita tā’u e nehenehe fa’ahou ’e tāpe’a. I taua taime ra, ’ua pure ’ū’ana a’era vau. E pure iti poto roa. ’Ua hāmama vau i tō’u vaha ’e nā ’ō a’era, « E te Metua, a tauturu mai ia’u ! »

’Aita i nava’i te pa’ari o te mau ’āma’a rā’au nō te amo i te teimaha o tō’u tino. ’Ua ’ite au te fātata mai ra te hope’a. I te taime mau e topa ai au, ’ua ’ite a’era vau i te hō’ē rima pautuutu i te tāpe’ara’a mai i tō’u rima ’e te hutira’a iā’u i ni’a. Ma taua tauturu ra, ’ua ti’a iā’u ’ia tāmau ā i te ’aro nō te fa’aho’i fa’ahou mai iā’u i ni’a i te purumu. Te misionare tei fa’aea i muri, nāna i fa’aora iā’u.

Te ti’ara’a mau rā, na tō tātou Metua i te Ao ra i fa’aora iā’u. ’Ua fa’aro’o ’oia i tō’u reo. E toru taime tō’u fa’aro’ora’a i te reo ’o te Vārua nā mua atu, i te paraura’a mai iā’u ē, ’eiaha e haere i te ’ē’a turu Inca, ’aita rā vau i ha’apa’o i taua reo ra. E ri’ari’a rahi tō’u, ’ua māheahea vau, ’e ’aita vau i ’ite e aha te parau e parau. Ha’amana’o a’era vau ē, tei mua te tahi atu mau misiōnare, ’e nō reira ’ua haere māua e ’imi ia rātou, e ’itehia atura rātou ’e ’ua fa’a’ite atura māua i te ’ohipa tei tupu i ni’a iā’u.

’Ua ho’i fa’ahou mātou i Machu Picchu, ma te ha’apa’o maita’i, ’e ma te muhu ’ore. I te ho’ira’a mai mātou, ’āita vau i parau a’e i te hō’ē parau, ’e ’ua puta mai ra te mana’o ē, ’ua ha’apa’o mai ’Oia i tō’u reo, ’aita rā vau i ha’apa’o noa a’e i Tōna. ’Ua tupu te hō’ē ’oto rahi i roto i tō’u ’ā’au nō te ha’apa’o-’ore-ra’a i Tōna reo ’e i te reira ato’a taime, ’ua tupu mai te hō’ē mana’o mēhara nō Tōna aroha. ’Aita ’Oia i fa’a’ohipa i Tāna parau ti’a i ni’a iho iā’u, i roto rā i Tōna aroha rahi, ’ua fa’aora ’Oia i tō’u ora (hi’o Alama 26:20).

I te hope’a ’o taua mahana ra, i te taime nō tō’u pure ta’otora’a, ’ua pure au i « te tumu o te aroha, e ’o te Atua Nōna ana’e te māhanahana » (2 Korinetia 1:3). ’Ua pure au « ma te ’ā’au hina’aro mau, ma te mana’o pāpū, e ma te fa’aro’o i te Mesia » (Moroni 10:4).

I te po’ipo’i roa i taua mahana ra, ’ua pure au na tō’u utu noa, ’e i te taime ’ua fātata vau i te pohe, ’ua pure au Iāna nā roto mai i tō’u ’ā’au. ’Ua feruri au i tō’u ora i taua taime ra. ’Ua ’ite a’era vau ē, e rave rahi taime, ’ua fa’a’ite tō tātou Metua i te Ao ra i te aroha rahi iā’u. ’Ua ha’api’i mai ’Oia iā’u ’e rave rahi ha’api’ira’a i taua mahana ra i Machu Picchu ’e i Cusco, Peru. Hō’ē ’o te mau ha’api’ira’a rārahi maori rā, ’e ti’a iā’u ia pure i te mau taime ato’a ma te ’ā’au tae, « ma te ’ā’au hina’aro mau, ma te fa’aro’o i te Mesia ».

I te hō’ē taime « te pure ra » te Fatu o Iesu Mesia « i te hō’ē vāhi, » ’e « e oti a’era, ’ua parau mai ra tāna hō’ē pipi iāna, e te Fatu, a ha’api’i mai ia mātou i te pure » (Luka 11:1). E ’ua ha’api’i atura ’Oia i Tāna mau pipi i te pure. ’E i teie mahana te ha’api’i mai nei ’Oia ia ’outou ’e iā’u ’ia pure mai tā tātou e ’ite nei Iāna i roto i tō tātou ferurira’a i te purera’a i Getesemane i te nā-’ō-ra’a ē, « ’ia tupu rā tō ’oe hina’aro ’eiaha tō’u » (Luke 22:42). ’Ia pure ana’e ’outou, tē hina’aro mau ra ānei ’outou ē, « ia tupu rā [tōna] hina’aro ’eiaha tō’u » ?

Tē fa’a’ite mai nei Paulo e mea nāhea Iesu i te purera’a « i tōna orara’a ra, » i Getesemane ihoā rā : « ’Ua pūpū ho’i ’oia i te pure i tōna orara’a ra, i te anira’a atu iāna ma te ’oto rahi ’e te roimata, i tei ti’a ’ia fa’aora iāna mai te pohe mai ra, ’ei fa’aro’ohia ’oia i tāna i mata’u ra » (Hebera 5:7). ’Ia pure ana’e ’outou, tē pure mau ra ānei ’outou ’e ’aore rā tē fa’ahiti noa ra ānei i te mau pure ? E mea na ni’ani’a noa ānei tā ’outou mau pure ?

’Ua pure Iesu ma te tu’utu’u ’ore ’e ’ua paraparau i Tōna Metua. « I bapetizo-ato’a-hia Iesu, e te pure ra ’oia, vetea a’era te ra’i » (Luka 3:21). ’Ia pure ana’e ’outou, tē mana’o ra ānei ’outou ē, te vetea ra te ra’i ? E aha te taime hope’a i ’ite ai ’outou i taua tu’atira’a ra e te ra’i ?

’Ua fa’aineine Iesu Iāna iho nō te rave i te mau fa’aotira’a faufa’a na roto i te purera’a i Tōna Metua.

« I te reira pu’e mahana tōna ha’api’ira’a i ni’a i te hō’ē mou’a e pure, e ao noa ihora te ru’i iāna i te purera’a atu i te Atua.

« E ao a’era, ’ua parau atura ’oia i tāna mau pipi e haere mai iāna ra, ’ua ma’iti ihora ’oia i te tino ’ahuru e ma piti » (Luka 6:12-13).

E fa’aineine ānei ’outou ia ’outou iho nō te rave i te mau fa’aotira’a faufa’a ’a pure ai i tō ’outou Metua i te Ao ra ? E fa’aineine ānei ’outou ia ’outou iho nō te hō’ē taime purera’a ?

’A haere ai Iesu i te fenua Amerika, ’ua ha’api’i atu ’Oia i te ta’ata ’ia pure. « ’E ’ua nā ’ō atura Iesu ia rātou : E pure ā; aita rā rātou i fa’aea i te pure ra » (3 Nephi 19:26).

Tē ani manihini mai nei Iesu ia tātou ’ia « pure tāmau noa » (PH&PF 10:5). ’Ua ’ite Iesu ē, e fa’aro’o tō tātou Metua i te Ao ra, ’e e hōro’a mai ’Oia i te mea maita’i a’e nō tātou. Nō te aha i te tahi taime ’aita tātou e hina’aro e fāri’i ? Nō te aha ?

I te taime mau ra e parau tātou, « e te metua i te ao ra », e fa’aro’o ’Oia i tā tātou pure ’e e pūtapū ’Oia nō tō tātou mau hina’aro’o. ’E nō reira, e tu’ati Tōna nā mata ’e Tōna nā tari’a i ni’a ia ’outou i teie nei. E tai’o ’Oia i tō tātou ferurira’a, ’e ’e ’ite ’Oia i te huru o tō tātou ’ā’au. E’ita e ti’a ia ōutou ’ia huna i te hō’ē mea Iāna. I teie nei, te mea nehenehe roa ’oia ho’i, e hi’o mai ’Oia ia ōutou ma te mata o te here ’e te aroha—te here ’e te aroha o te ’ore e ti’a ia tātou ’ia hāro’aro’a hope roa. Terā rā, tei roto Iāna te here ’e te aroha i te taime mau ra ’a parau ai ’outou, « e te Metua i te Ao ra ».

Nō reira, e taime mo’a roa te taime nō te pure. E ’ere ’oia i te ta’ata o te parau ē, « e’ita, e’ita vau e fa’aro’o ia ’outou i teie nei, nō te mea, tē haere mai nei ’outou iā’u nei i te taime ana’e tei roto ’outou i te fifi ». O te ta’ata ana’e te nā reira. E ’ere ’oia i te ta’ata o te parau ē, « ’Aita ’oe i ’ite i tā’u rahira’a ’ohipa i teienei ». O te ta’ata ana’e te nā reira.

E mata na tātou pā’āto’a i te pure mai tā Iesu i ha’api’i mai ia tātou ’ia pure, tā’u ïa tia’ira’a ’e tā’u ho’i pure, nā roto i te i’oa o te Fatu ’o Iesu Mesia ra, ’āmene.