Te ’ē’a maita’i hope i te ’oa’oa
Nā te peresideni Thomas S. Monson
Tē fa’a’ite pāpū nei au nō teie hōro’a rahi, te fa’anahora’a a tō tātou Metua nō tātou. ’O te ’ē’a maita’i hope ’e te hō’ē roa i te hau ’e te ’oa’oa.
E au mau taea’e, e au mau tuahine, i roto i teie pū ’āmuira’a ’e nā te ao ato’a nei, ’ua māuruuru roa vau nō teie taime e fa’a’ite i tō’u mau mana’o ia ’outou i teie po’ipo’i.
’A pae ’ahuru ma piti matahiti i teienei, i te ’āva’e tiurai 1964, ’ua tonohia vau i New York City i te taime tē tupu ra te Fa’a’ite’itera’a rahi a te ao. Hō’ē mahana, i te po’ipo’i roa, ’ua haere atu vau i te vāhi fa’a’itera’a a te mōmoni. ’Ua nā mua ri’i noa vau i te hō’ē fa’a’itera’a o te hōho’a a te ’Ēkālesia, Te ta’ata ’imi i te ’oa’oa, e vauvaura’a nō ni’a i te fa’anahora’a nō te fa’aorara’a, tei riro roa mai ’ei hōho’a mātauhia i roto i te ’Ēkālesia. ’Ua pārahi au i pīha’i iho i te hō’ē taure’are’a e 35 paha matahiti. ’Ua paraparau ri’i māua. E ’ere ’oia i te melo nō tā tātou ’Ēkālesia. Mohimohi a’era te mōrī, ’e ’ua ha’amata te hōho’a.
’Ua fa’aro’o mātou i te ta’ata paraparau i te uira’a i nā uira’a rahi e uihia nei e te ta’ata ato’a : Nō hea mai au ? Nō te aha tei i’ō nei au ? I hea vau e haere ai ’ia fa’aru’e au i teie orara’a ? Pauroa te tari’a tei fa’afatafata maita’i nō te fa’aro’o i te mau pāhonora’a, ’e pauroa te mata tei hi’o pāpū i te mau hōho’a. E fa’a’itera’a nō tō tātou orara’a hou i te tāhuti tei hōro’ahia mai, nā reira ato’a te hō’ē tātarara’a nō tā tātou fā i ni’a i te fenua nei. ’Ua ’ite mātou i te fa’a’itera’a nō te fa’aru’era’a mai te hō’ē pāpā rū’au i te orara’a nei ’a tāhō’ē ai ma te hanahana i te feiā tāna i here ’e tei nā mua iāna i roto i te ao vārua.
I te hope’a o te reira fa’a’itera’a nō ni’a i te fa’anahora’a a tō tātou Metua i te Ao ra nō tātou, ’ua haere mū noa te ta’ata i rāpae, e rave rahi tei putapū i te poro’i o teie hōho’a. ’Aita te taure’are’a i pīha’i iho iā’u i ti’a. ’Ua ani au iāna e aha tōna mana’o nō ni’a i te fa’a’itera’a. Tāna pāhonora’a pāpū : « E parau mau te reira ! »
Tē fa’a’ite nei tā tātou mau misiōnare nō ni’a i te fa’anahora’a a tō tātou Metua i te Ao ra nō tō tātou ’oa’oa ’e tō tātou fa’aorara’a, nā te ao ato’a nei. E ’ere pauroa te ta’ata te fa’aro’o i teie poro’i hanahana, te fāri’i ’e te ’apo mai. Noa atu rā, e mau tāne ’e e mau vahine i te mau vāhi ato’a, mai teie hoa taure’are’a i te Fa’a’ite’itera’a rahi i New York, e fāri’i mai i te reira mau parau mau ma te tanu roa i tō rātou ’āvae i ni’a i te ’ē’a e arata’i ia rātou i te fare ma te pāpū. E taui a muri noa atu tō rātou orara’a.
Te ta’ata faufa’a rahi o te fa’anahora’a, ’o tō tātou ïa Fa’aora, ’o Iesu Mesia. ’Aita tāna tusia tāra’ehara, ’ua mo’e ïa te tā’āto’ara’a. Teie rā, ’aita i nava’i te ti’aturi-noa-ra’a iāna ’e i tāna misiōni. Tītauhia ’ia ’ohipa tātou ’e ’ia ha’api’i ho’i, ’ia ’imi ’e ’ia pure, ’ia tātarahapa ’e ’ia ha’amaita’i ia tātou. Tītauhia ’ia ’ite tātou i te mau ture a te Atua ’e ’ia ora i te reira. Tītauhia ’ia fāri’i tātou i tāna mau ’ōro’a fa’aora. Mea nā reira noa e noa’a ai ia tātou te ’oa’oara’a mau ’e te mure ’ore.
’Ua ha’amaita’ihia tātou, tei ia tātou nei te parau mau. E fa’auera’a nā tātou ’ia fa’a’ite atu i te parau mau. Ora ana’e i te parau mau ’ia noa’a ia tātou te mau mea ato’a a te Metua nō tātou. ’Aita e mea tāna e rave maori rā nō tō tātou maita’i. I pārau ho’i ’oia ē : « ’O teie ho’i ta’u ’ohipa ’e tō’u hanahana ho’i, ’ia fa’atupu i te tāhuti ’ore ’e te ora mure ’ore o te ta’ata nei ».1
Mai te hōhonu o tō’u vārua, ’e ma te ha’eha’a, tē fa’a’ite pāpū nei au nō teie hōro’a rahi, te fa’anahora’a a tō tātou Metua nō tātou. ’O te ’ē’a maita’i hope ’e te hō’ē roa i te hau ’e te ’oa’oa, i’ō nei ’e i te ao nō muri mai.
Tō’u mau taea’e ’e mau tuahine, tē fa’aoti nei au ’e tē vaiiho nei ho’i i tō’u here ’e ta’u ha’amaita’ira’a, ’e tē nā reira nei au i te i’oa o tō tātou Fa’aora ’e Tāra’ehara, ’oia ho’i ’o Iesu Mesia, ’āmene.