« E faʼatupu vau i te hōʼē Hiʼo Maitaʼi »

Na Elder Craig C. Christensen

Nō te peresidenira’a o te Hitu ’Ahuru

Nō te mea hoʼi ’ua riro ʼo Iosepha ʼei peropheta, ’ua hau ia nō tātou i te hō’ē māramarama i te ra’i—’ua matara ïa te ’ūputa nō te oraraʼa ’e a muri noa atu nō tātou.

I tō Moroni haere-mātāmua-raʼa mai ia Iosepha Semita, ’ua fa’a’ara ʼoia ē « e haʼamaitaʼihia ʼe e faʼaʼinohia te iʼoa ʼo Iosepha i rotopū i te mau nunaʼa atoʼa ».¹ ’Ua ʼite tātou i te tupuraʼa o taua tohuraʼa ra. I roto i te tamaʼi i rotopū i te maitaʼi ʼe te ʼino, ’ua faʼauru te Faʼahoʼiraʼahia mai ʼo te ʼevānelia nā roto i te peropheta Iosepha Semita i te feiā faʼaroʼo o tei peʼe iāna ʼe ’ua turaʼi atoʼa i te mau ʼenemi ’ia ʼaro ’ūʼana atu ia Ziona ʼe ia Iosepha iho. ʼE ʼere teie tamaʼi i te tamaʼi ʼāpī. ’Ua haʼamata te reira i muri noa aʼe i tō te tamaiti ʼāpī ʼo Iosepha haereraʼa atu i roto i te Uru Rāʼau Moʼa e te tāmau noa ra te reira i teie nei mahana ma te ʼite-rahi-hia i niʼa i te ʼItenati.

’Ua parau mai te Fatu iho ia Iosepha Semita ē :

« E ui mai tō te mau hopeʼa nō te ao nei i tō ʼoe iʻoa, ʼe e parau amuamu hoʼi te feiā maʼamaʼa ia ʼoe, ʼe e faʼatupu o hade i te riri rahi ia ʼoe ;

« ’A tītau noa ai te feiā mā i te ʼāʼau, ʼe te feiā paʼari, ʼe te feiā mana, ʼe te feiā taiʼata ʼore ho’i, i te a’oraʼa, ʼe te mana, ʼe te mau haʼamaita’iraʼa i te mau taime atoʼa i raro a’e i tō ʼoe rima nā ».²

Tē pūpū atu nei au i teie mahana i tōʼu ʼiteraʼa pāpū i te feiā atoʼa o tē ʼimi nei ’ia māramarama atu ā i te misiōni moʼa a Iosepha Semita, Tamaiti, te Peropheta nō te Faʼaho i-faʼahou-raʼa mai.

’Eiaha tātou e taiā ’ia faʼaʼite pāpū i te misiōni a Iosepha ʼei peropheta, ’ei hiʼo, ʼe ’ei heheu parau, nō te mea ’ua haʼa noa nā te Fatu nā roto i te mau peropheta.³ Maoti te mau parau mau tei faʼahoʼihia mai nā roto ia Iosepha Semita, ’ua rahi atu ā ïa tō tātou ʼiteraʼa nō niʼa i tō tātou Metua i te Ao ra ʼe i te Faʼaora ʼo Iesu Mesia.’ ’Ua ʼite tātou i tō Rāua mau maitaʼi hanahana. Tō Rāua iho aura’a ʼe ia tātou nei, ʼe te ʼōpuaraʼa rahi nō te faʼaoraraʼa o te faʼatiʼa ia tātou ’ia hoʼi atu i mua i tō Rāua nei ʼaro.

’Ua parau te peresideni Brigham Young nō niʼa ia Iosepha : « ’Ua faʼauehia i roto i te mau ʼapoʼoraʼa nō te tau mure ʼore, hou te faʼatumuraʼahia te fenua nei, ʼo ʼoia, ʼo Iosepha ïa te taʼata, i roto i te tau tuʼuraʼa ʼevānelia hopeʼa o te ao nei, o te faʼatupu i te parau a te Atua i tōna ra mau taʼata, ʼe o te fāriʼi i te ’īraʼa o te mau tāviri ʼe te mana o te autahuʼaraʼa a te Tamaiti a te Atua. ’Ua hiʼo ātea te Fatu iāna … ’ua faʼatōroʼa-ātea-hia [ʼoia] i roto i te tau mure ʼore ’ia faʼatere i teie tau tuʼuraʼa ʼevānelia hopeʼa ».⁴

ʼEi faʼaineineraʼa nō teie ʼohipa rahi, ’ua fānauhia ʼo Iosepha Semita i roto i te hōʼē ʼutuāfare here tei faʼaruru i te mau hōpoiʼa ʼe te mau tamataraʼa ʼe rave rahi o te oraraʼa i te mau mahana atoʼa. ʼA haʼamata ai ʼo Iosepha i te feruri taʼata paʼari mai, e mea « hōhonu ʼe te mea pāpū »⁵ tōna mau manaʼo nō te Atua, ’ua pāpū ʼore rā ʼoia nō te mau manaʼo faʼaroʼo mārō tei haʼapiʼihia ʼe te feiā aʼo nō tōna ra tau. Au aʼe rā, ʼaita te tamaiti āpī ʼo Iosepha i vai’iho i tāna mau uiraʼa ’ia haʼaparuparu i tōna faʼaroʼo. ’Ua ʼimi ʼoia i te mau pāhonoraʼa i roto i te Bibilia ʼe ’ua ʼite i teie nei aʼo : « Tē ’ere ra rā te hō’ē o ’outou i te ’ite, e ani ’oia i te Atua ra, o tei hōro’a hua mai i te maitaʼi i te ta’ata ato’a ra, ma te pāto’i ’ore ; ’e e hōro’ahia mai tāna ».⁶

’Ua haʼamanaʼo Iosepha : « ’Aita roa ā te hō’ē pāpa’ira’a mo’a i ō ma te pūai rahi a’e i roto i te ’ā’au o te ta’ata nei, mai tō teie nei ’īrava i ō mai i roto tō’u nei ’ā’au. ’Ua ō mai te reira ma te pūai rahi i roto roa i tō’u nei ʼāʼau. ’Ua feruri pinepine noa vau i te reira ».⁷

Ma te faʼaroʼo ʼōhie, ’ua faʼaʼohipa ʼo Iosepha i teie mau manaʼo vārua. ’Ua ’imi ʼoia i te hōʼē vāhi moʼemoʼe, ’ua tūturi i raro, « ʼe ’ua haʼamata i te pūpū atu i te hinaʼaro o [tōna] ʼāʼau i mua i te Atua ».⁸ Tē vai nei te mana rahi i roto i te faʼaʼiteraʼa ʼa Iosepha i te mea tei tupu :

« ’Ua ’ite atura vau i te pou māramarama i te faʼaʼatiraʼa i ni’a noa a’e i tō’u upoʼo, ’e ’ua pou maira te reira i ni’a iho iā’u.

« … I te ma’irira’a taua māramarama ra i ni’a iho iā’u, ’ua ʼite atu ra vau e piti taʼata ; tō rāua teatea ʼe te hanahana a ti’a noa ai rāua i ni’a a’e iā’u i roto i te reva ra. ’Ua parau maira te hōʼē o rāua iā’u, ma te faʼatoro atu i tōna rima i ni’a i te tahi, ʼe ma te faʼahiti i tō’u i’oa, i te na-’ō-ra’aʼ mai ē—O Ta’u Tamaiti Here Teie. A fa’aro’o Ia’na ! »⁹

’Ua ’ite o Iosepha Semita i te Atua, te Metua Mure ’Ore, ia Iesu Mesia, te Fa’aora ’e te Tāra’ehara o te Ao nei. Teie ïa te ’Ōrama Mātāmua a Iosepha Semita. I te mau matahiti i muri mai, ’ua ʼīriti Iosepha Semita i te Buka ʼa Moromona nā roto i te hōro’a ʼe i te mana ʼo te Atua. E rave rahi mau veʼa nō te raʼi mai tei haere mai e fārerei iāna, nō te faʼahoʼi i te mau parau mau ʼe te mana tei moʼe e rave rahi mau tenetere. Nā teie mau fārereiraʼa ia Iosepha Semita i ʼīriti i te mau māramarama o te raʼi ʼe te mau hanahana nō te oraraʼa a muri atu i mua ia tātou. Tē tiʼa nei te oraraʼa ʼo Iosepha ʼei hōʼē ʼiteraʼa ē mai te mea tē ʼere ra te hōʼē o tātou i te ʼite, e nehenehe ïa tā tātou e ani i te Atua ma te faʼaroʼo ʼe ’ia fāriʼi i te mau pāhonoraʼa—na roto i te mau veʼa nō te raʼi mai i te tahi mau taime, e mea pinepine rā nā roto i te mana o te Vārua Maitaʼi, o te paraparau mai ia tātou nā roto i te mau manaʼo ʼe te mau ʼiteraʼa faʼauruhia.¹⁰ E nā roto i te Vārua Maitaʼi e nehenehe ai ia tātou ’ia « ʼite i te parau mau o te mau mea atoʼa ».¹¹

Nō te rahiraʼa o tātou, e haʼamata te hōʼē ’iteraʼa pāpū nō niʼa i te peropheta Iosepha Semita ’ia taiʼo tātou i te Buka ʼa Moromona. ’Ua taiʼo vau nō te taime mātāmua i te tāʼātoʼaraʼa o te Buka ʼa Moromona ʼei tamariʼi haʼapiʼi ʼevanelia i te poʼipoʼi. Ua ha’api’i mai au i te faufa’a o te mana’o papû i te tau e piahi apî au nō te ha’api’ira’a evanelia. Ma tōʼu manaʼo tamariʼi ’ūʼana ’ua faʼaoti au ’ia taiʼo mai te mea ra ʼo Iosepha Semita vau, o te ʼite ra i te mau parau mau i roto i te Buka ʼa Moromona nō te taime mātāmua. Nō te pūai o te reira i roto i tōʼu nei oraraʼa tē tāmau noa nei au i te taiʼo i te Buka ʼa Moromona mai te reira te huru. ’Ua ʼite pinepine au ē a nā reira ai au e hōhonu atu ā ïa tōʼu māuruuru nō te peropheta Iosepha Semita ʼe nō te mau parau mau tei faʼahoʼihia mai i roto i teie buka faufaʼa rahi.

ʼEi hiʼoraʼa, ’a feruri nā i te mau manaʼo ʼo Iosepha ʼa ’īriti ai ʼoia i te mau parau nō niʼa iho i te bāpetizoraʼa nō te matararaʼa hara. Nō te mea hoʼi ē ’ua faʼauehia ʼo Iosepha ʼeiaha roa e ’āmui atu i te hōʼē o te mau ʼēkālesia e vai nei, e mau uiraʼa ïa tā Iosepha nō niʼa i teie nei ’ōroʼa faʼaora. ’Ua arataʼi faʼahou ā tāna mau uiraʼa iāna ’ia pure, ʼe ’ua arataʼi taua pure ra i te hōʼē tere fārerei ia Ioane Bāpetizo, tei faʼahoʼi mai i te ʼautahuʼaraʼa ʼa ʼAʼarona ʼe te mana nō te bāpetizo.¹²

ʼAore rā ʼa feruri nā e aha ïa te manaʼo ʼo Iosepha ʼa ʼite ai ʼoia nō te taime mātāmua ē ’ua fārerei Iesu Mesia i te nunaʼa nō te fenua Amerika—ʼe ’ua haʼapiʼi ʼOia ia rātou, ’ua pure nō rātou, ’ua faʼaora i tō rātou feiā maʼi, ’ua haʼamaitaʼi i tā rātou mau tamariʼi, ’ua hōroʼa ia rātou te mana autahuʼaraʼa, ʼe ’ua faʼatere i te ʼōroʼa nō te pane ʼe te pape nō rātou.¹³ ’Aita paha Iosepha i ʼite i taua taime ra, te mea rā tāna i haʼapiʼi mai nō niʼa i te mau ʼōroʼa ʼe te faʼanahoraʼa o te ʼĒkālesia tahito ʼa te Mesia ’ua faʼaineine ïa iāna ’ia tauturu i muri iho i te Fatu ’ia faʼahoʼi mai i taua ihoa ʼĒkālesia ra i te fenua nei.

I roto i te ʼīritiraʼa o te Buka ʼa Moromona, ’ua heva o Iosepha ʼe tāna vahine faʼaipoipo ʼo Emma i te pohe o tā rāua tamaiti ʼaruʼaru. ’Ua haʼapiʼi nā te feiā aʼo i taua mau mahana ra ē e faʼaʼutuʼahia e a muri noa atu te mau tamariʼi teī pohe ma te bāpetizo-ʼore-hia. Ma teie haʼapiʼiraʼa i roto i tōna feruriraʼa, ʼa feruri nā e aha rā ïa te manaʼo ʼo Iosepha ʼa ʼīriti ai ʼoia i teie mau parau a te peropheta Moromona : « ʼAita hoʼi e au te tātarahapa i tā rātou tamariʼiriʼi ra, ʼaita atoʼa te bāpetizo … [Nō te mea] ’ua ora te tamariʼiriʼi i te Mesia mai te haʼamauraʼa mai ā o teie nei ao ».¹⁴

Penei a’e te ’īrava hau roa atu i te māere i te tamaiti ʼāpī ʼo Iosepha i roto i te Buka ʼa Moromona o te pene toru ïa nō 2 Nephi. Tei roto i teie nei pene te hōʼē tohuraʼa tahito nō niʼa i te hōʼē « hiʼo maitaʼi » tā te Fatu e faʼatupu i te mau mahana hopeʼa nei—hōʼē hiʼo i maʼirihia te iʼoa ʼo Iosepha, maʼirihia i te iʼoa o tōna ra metua tāne. E « manaʼo-maitaʼi-hia » teie nei peropheta ʼe e rave ʼoia i te tahi ʼohipa « faufaʼa rahi » nō tōna nunaʼa. E « taʼata rahi ʼoia mai ia Mose » ʼe e hōroʼahia iāna te« mana nō te faʼatupu i te parau ʼa te Atua ».¹⁵ ʼA feruri nā e aha ra ïa te manaʼo ʼo Iosepha Semita ʼa ʼite ai ʼoia ē teie nei tohuraʼa nō niʼa ïa iāna ! ’Aita ʼoia i ʼīriti noa i te ʼāʼai ; te ʼīriti rā ʼoia i te hōʼē ’ōrama nō te mau mahana hopeʼa nei, nō te Fa’aho’i-fa’ahou-ra’a mai māere o te ʼevānelia ʼa Iesu Mesia—ʼe nā Iosepha iho hoʼi e tauturu i te faʼatupu i te reira !

I teie nei mahana, fātata ʼe 200 matahiti i muri mai, e mea ʼōhie ’ia hiʼo e nāhea teie nei tohuraʼa i te tupuraʼa. ’Ua ʼite tātou i te mau mea faʼahiahia tā Iosepha i faʼaoti ʼei peropheta ʼa te Fatu. A haʼamanaʼo rā ē ʼa ʼīriti ai Iosepha i teie tohuraʼa, ’ua rave ʼoia i te tahi o te mau mea tā te mau peropheta i tohu na. E taureʼareʼa noa ā ʼoia e 20 matahiti. ʼAita ā te ʼĒkālesia i fa’anahonahohia atura. ʼAita e mau paroita ʼe e mau ’āmaʼa, ʼaita e mau misiōnare ʼe e mau hiero. ʼAita roa e taʼata i faʼaroʼo i te parau o Iosepha Semita, ʼe te tahi o tei faʼaroʼo i tōna ra parau ’ua pātoʼi ’ūʼana ïa iāna. ʼA hiʼo nā i teie nei i te ’ohipa rahi tā te Fatu i faʼatupu nā roto i te rima o Tāna tāvini ʼo Iosepha, noa atu te pātoʼiraʼa iāna. E ʼere ānei te tupuraʼa o teie nei tohuraʼa ʼei tāpaʼo pūai nō te piʼiraʼa peropheta ’o Iosepha Semita ?

I te feiā atoʼa o tē uiui nei paha nō niʼa i tō rātou ’iteraʼa pāpū nō niʼa ia Iosepha Semita ʼaore rā o tē fifi nei i te parau haʼamāramaramaraʼa hape, tiʼa ʼore, ʼaore rā faufaʼa ʼore nō niʼa i tōna oraraʼa ʼe tāna tāviniraʼa, tē ani nei au ia ʼoutou ’ia hiʼo i te mau hotu—te mau haʼamaitaʼiraʼa e rave rahi tei tae mai ia tātou nā roto i te misiōni māere ʼa Iosepha Semita, te Peropheta nō te Faʼahoʼi-faʼahou-raʼa mai.

Nō te mea hoʼi ’ua riro ʼo Iosepha ʼei peropheta, e ʼere atura ïa te mau heheuraʼa ʼe te mau peropheta i te tahi mea nō mutaʼa anaʼe ihora. ʼAita te tau nō te mau temeio—nō te mau ’ōrama, nō te mau faʼaoraraʼa maʼi, ʼe te utuuturaʼa a te mau melahi—i faʼaea.¹⁶

Nō te mea hoʼi ’ua riro ʼo Iosepha ʼei peropheta, e noaʼa ïa ia tātou tātaʼitahi te mana ʼe te mau haʼamaitaʼiraʼa nō te autahuʼaraʼa moʼa, mai te bāpetizoraʼa, te hōroʼaraʼa o te Vārua Maitaʼi, ʼe te ʼōroʼa nō te pane ʼe te pape.

Nō te mea hoʼi ’ua riro ʼo Iosepha ʼei peropheta, tei ia tātou ra ïa te mau haʼamaitaʼiraʼa ʼe te mau ’ōroʼa nō te hiero o te taʼati ia tātou i te Atua, o te faʼariro ia tātou ʼei nunaʼa Nāna, ʼe o te faʼaʼite mai ia tātou i « te mana o te huru Atua », e nehenehe ai ia tātou ia « ʼite i te mata o te Atua, ’oia ʼo te Metua, e ora ai ».¹⁷

Nō te mea hoʼi ’ua riro ʼo Iosepha ʼei peropheta, ’ua ʼite tātou ē e tuhaʼa faufaʼa rahi ïa te faʼaipoiporaʼa ʼe te ʼutuāfare nō te ʼōpuaraʼa ʼa te Atua ’ia ʼoaʼoa tātou. ’Ua ʼite tātou ē nā roto i te mau ʼōroʼa ʼe te mau fafauraʼa o te hiero, e nehenehe ïa tō tātou mau auraʼa ʼutuāfare herehia e vai mure ʼore noa.

Nō te mea hoʼi ’ua riro ʼo Iosepha ʼei peropheta, ’ua hau ia nō tātou i te hō’ē māramarama i te ra’i—’ua matara ïa te ’ūputa nō te oraraʼa ’e a muri noa atu nō tātou. E nehenehe tā tātou ’ia ʼite « i te Atua mau ra, ʼe ia Iesu Mesia, i [Tāna] i tono mai ».¹⁸ E nehenehe e riro te ora mure nō tātou.

Hau atu i te mau mea atoʼa, nō te mea hoʼi ’ua riro ʼo Iosepha ʼei peropheta, tē vai nei ia tātou te ʼiteraʼa ʼe te faʼaʼiteraʼa pāpū, ē ʼo Iesu Mesia te Tamaiti ʼa te Atua ʼe te Faʼaora o te ao. Tē vai nei ia tātou te hōʼē reni tāmau nō te mau ʼite taʼa ʼē nō Iesu Mesia, mai tō tātou peropheta i teie mahana, te peresideni Thomas S. Monson, te mau tauturu i roto i te Peresideniraʼa Mātāmua, ʼe te mau melo nō te Pupu nō te Tino ʼAhuru ma Piti ’Āpōsetolo. Tē ’āpiti nei au i tōʼu ’iteraʼa pāpū ʼe te ha’ehaʼa i tō rātou mau ʼiteraʼa. Tē ora nei ʼe tē arataʼi nei ʼo Iesu Mesia i Tāna ʼĒkālesia. ʼO Iosepha Semita te peropheta nō te Faʼahoʻi-faʼahou-raʼa mai. Tei te fenua nei faʼahou te autahuʼaraʼa ʼe te mana ʼo te Atua. ’Ei mau tamaiti ’e ’ei mau tamahine nā te Atua, ’ua fānauhia mai te mau tamari’i nō te hāmani. ’Ia faʼaʼite tātou ma te mātaʼu ʼore i tō tātou ʼiteraʼa ʼe tō tātou māuruuru nō teie peropheta faʼahiahia, hiʼo, ʼe heheu parau ʼa te Fatu o tāʼu ïa pure i te iʼoa moʼa ʼo Iesu Mesia, ’āmene.