Te Boki iaon Nnen te Boki

Iroun Unimwaane Walter F. González

Man te Itingaun

“Ukeuke, iango, ao te tataro bon bwaai aika I riai ni karaoi” (Aia Boki n Anene Ataei, 109).

Ai 12 au ririki ngke I ongo taekan Ana Ekaretia Iesu Kristo Ibukiia Aika Itiaki ni Boong Aika Kaitira. I kaitibo ma mitinaren te LDS iaon te bwati. A tuangai ngkana a kona n roko n reirei ma au utu.

Mitinare a katikui ana Boki Moomon ao te boki ae uarereke n ana koaua Iotebwa Timiti. Au karo bon aomata aika tikiraoi. Ma a bon aki kaina te Ekaretia n te tai anne.

Booki akekei a tiku iaon nnen te boki inanon ririki aika a mwaiti. Ngkanne n te bong teuana ngke ai 18 au ririki, I taratarai booki iaon nnen te boki ni kakaea te boki ae raoiroi bwa N na warekia. I anaa Ana Boki Moomon ao I wareka te moan mwakoro. E roko irou te namakin ae e onoti ngke I warekia.

I karekea te taneiai ae okoro man aei I ataia bwa e koaua te boki. Ana Boki Moomon iai te rongorongo iai ae onoti n taekan ana Mwakuri ni Kamaiu Iesu Kristo. I reiakina riki ae mwaiti ibukin maiu ao taekan ana kakabwaia te Tama are i Karawa.

Imwiina I reiakinna bwa e ngae ngke ai tibwa 14 ana ririki Iotebwa Timiti, iai irouna te ninikoria ni wareki booki aika tabu ao ni butiia te Tama are i Karawa bwa tera te ekaretia ae koaua.

Man te tai anne, I a tia n iriira ana banna ni katooto Iotebwa Timiti. I wareki booki aika a tabu ao I butiia Tamau are i Karawa ana ibuobuoki ao ana kairiiri. Te tataro ao ana Boki Moomon bon mwakoro aika a rang kakaawaki ni maiu.

Ngkana iai am kaangaanga, wareka ana Boki Moomon ao tataro. Ko na ataa riki rongorongon te euangkerio ao ni kunei kaeka ake ko kainnanoi, n ai arou. Uringa te namakin anne ngkana e reke.