Bwanaia Aika Itiaki Ni Boong Aika Kaitira
Karineaia Aine—N Aki Taraia Bwa Rorora
Kamataata n te tamnei iroun Joshua Dennis
I weteaki bwa n na angareirei n te Nakoanibonga ae te Aaron n au mwaanga, ao n te Tabati teuana atuun te reirei te karinerine ibukiia aine. N tain te reirei ti maroroakina ae riai te karinerine anne ni kaotaki nakoia aine ni kabane, man ae uarereke nakon ae ikawai, n aron are e taekinaki n aia boki n reirei kaain te Nakoanibonga ae te Aaron.
Aran Gabriel (e a tia ni bitaki), temanna te ataeinimwaane n te kiraati, e taekinna bwa irouna te aine bon te aine ae a ikawai ao n tau n riki bwa tinana ao te aine are e uarereke riki nakon anne e riai ni karinea bukina bwa ngaia te mwaane. Akea man te kiraati ae kukurei ma ngaia, are e kaangaanga irouna bwa e na kakoaua.
Ti reitinako ni maroroakin kawai ni kaota te karinerine nakoia aine, ao I tuangiia te bwai teuana ae I karaoia bwa I anganakon au kaintekateka iaon te bao ni mwamwananga te waen ae bubura ngke e toka te aine, e ngae ngke N na tei ibukin te maan ae 30–40 te miniti imwain ae I roko n au tabo. I tuangiia ae a riai mwaane n tei ao n tuangiia aine bwa ana tekateka. E teimatoa Gabriel n aki kukurei n te reirei.
Uoua te bong imwiina, I toka iaon te waen ao n tekateka mai moa. A bane n on kaintekateka ngke te mwaane ao natina te aine ae uarereke a toka ao n nakonako nako buuki. E aki maan, te aine ae a kara e rin n te waen, ao I teirake n anganna au kaintekateka.
Te mwaane are ibukiu e ororea angau, ni kotea bukin te waen, ao n tuangai bwa e a tia te ataeinimwaane n tuangnga bwa n na taraia. I nakonako nako buki n taraia bwa antai te ataeinimwaane aei. A bane ni ngare aomata ake a kaan bukina bwa te ataeinimwane e a tibwa tia n anga ana kaintekateka nakon te mwaane ma natina te aine ae aua ana ririki ake a tia n toka imwaina. Bon Gabriel, te ataeinimwaane n au kiraati n te nakoanibonga, are e a tia n aki kukurei ma atuun te reirei ae karineaia aine.
E taku nakoiu, “I tarataraiko ngkana ko na tei ibukin te aine are e a tibwa rin n te waen. I rangin n rotaki ngke I noriko bwa ko karaoa aio, ao I uringa ara reirei n te Tabati ao n na riai n teirake ibukin te ataeinnaine ma tamana.”
I rangin ni kukurei n noriia ara ataeinimwaane n ira te bwai ae a tia n reireinaki n te Ekaretia. E taneiai n iangoia bwa e riai te karinerine anne ni kaotaki ti nakoia aine aika a ikawai, ma imwiin ara Reirei n Tabati, e rineia bwa e na kaota te karinerine ibukin te ataeinnaine ae aua ana ririki.
I kukurei naba bwa I rineia ni maiuakina ae I reireinaki, ni buokia n reireinna ni kaota te karinerine nakoia ni kabane. N na miimi bwa e na kanga aron ana namakin ngke I aki teirake ibukin te aine inanon te waen. E roko n au iango te kibu: “Ngkana kam atai baikai, ao kam a kabaia ngkana kam karaoi” (Ioane 13:17).