Uarokoan katekean te Taakete

Iroun Beretitenti Dieter F. Uchtdorf

Te Kauoman ni Kauntira n te Moan Beretitentii

N tai ae aki maan nako, I matakuakiniia kurubu n aomata aika a kataneiai ni mwakurian te kainikatebe. Man matakuakinana, e roko ni mataata nakoiu bwa ngkana ko bon tangiria n rabwakau raoi mwakurian te kainikatebe ma kanoan te katebe, e na anaa te tai ao te kataneiai iaona.

I aki iangoia bwa ko konaa ni karikirakea arom n riki bwa te tia katebe ae nakoraoi man katebean te o ae akea kanoana ao ni kanakoi ngkanne taian taakete n raauni tenaan kanoa ni katebe. Ko riai n reiakina te atatai ni ukora te taakete ao katekean nukan te taakete.

Te Taakete ae Mwaakenaki

Katebe moa ao ni kaotinakoa te taakete imwiina are e na riai n taraa n tei ni baba teutana, ma n tabetai ngaira i bon iroura ti tarai tamnein aroaro akanne inanon tabeua riki oin waakin te maiu.

N aron katabeara kain te Ekaretia, ti karaoi bwaai ake a kakaraoaki n te namakin are akea nanona ni boutoka nakon ana buroukuraam te euangkerio, tabeka ake ana taekinaki, ao riki tuua are a taraa ni kakaongora, ni kakawaki, ke ni kakukurei nakoira. Ti kaririaki ni kanakoi ara taakete n raauniia, n anganiira bwa ti na kakoaua uarokoan ana taakete te euangkerio.

Aio e bebete karaoana.

Rinanon rongorongon te aonaaba ti a tia ni karekei tamaroan reirei ao te kairi mairoun ana burabeti te Atua. Ti karekei naba kairiiri ao tamaroan kamataata man booki aika boreetiaki, aeniboki, ao ana boki ni kairi te Ekaretia. E kona ni bebete rinean ara atuu ae mamate nanora iai n te euangkerio, korea matan te kao-mwaane n rauniia, ao ni baireia bwa ti na kinaa kakawakin mwakoron te euangkerio.

E kamataata te Tia Kamaiu

Aio tiaki te kaangaanga ae onoti n ara bong. N taai ake ngkoa, taan kairiiri n te aro a kabanei aia tai ae korakora ni babairei booki, karinanii n aroia, ao ni maroroakin babaire bwa e ngaa mai buakon tebubua tuua are te moan kakawaki.

N te bongina kurubu ake taan reiakina taekan te aro a kataia ni kairekerekea te Tia Kamaiu nakon mwaitin te aki boraoi ao te kauntaeka. A titiraki Nakoina n anga te iango iaon taekan iangoan tabeka bwa a ngaa tabeua aika kariaia.

“Te tia Reirei,” a titiraki Nakoina, “tera te tua ae korakora i buakon taian tua?”

Ti bane n ataia bwa e kanga Iesu ni kaeka: “Ko na tangira Iehova ae Atuam n nanom ni kabanea, ao n tamneim ni kabanea, ao ni wanawanam ni kabanea.

“Aio te moan ao te tua ae e korakora.

“Ao ai aron naba are te kauoua, Ko na tangira raom n ai aron tangiram i bon iroum.

“E bane te tua aika uoua aikai n tauraki ni kabane ma aia taeka burabeti.”¹

Taiaoka taraa te kabanea n tiententi: “E bane te tua aika uoua aikai n tauraki ni kabane ma aia taeka burabeti.”

Te Tia Kamaiu e aki ti kaota nakoira te taakete, ma E kinai naba matan te kao-mwane.

Teken te Taakete

N aroia kaain te Ekaretia, ti karaoa ara berita ni katoka iaora aran Iesu Kristo. N te oota ni mwakoron te berita ae tabu aei bon te oota are ti na keiaki n reiakina taekan te Atua, n Tangiriia, ni karikirakea ara onimaki Irouna, ni Karinea, n nakonako ni Kawaina, ao teimatoa n riki bwa te tia kakoaua Ibukina.

Ti na reiakina riki taekan te Atua ao n namakina Ana tangira ibukira, n ataakin riki a na anga karea Iesu Kristo ae akea tiana bon ana bwaintangira te Atua ae akea tokina. Ao ana tangira te Atua e kaungaira nakon kabonganaan te kawai ae eti n rairannano, are e na kairiira nakon te kakai ni kabwarabure. Mwakuriana aio e anganiira karekean korakoran te tangira ao te nanoanga nakoia koraki ake a katobibiira. Ti na reiakinna bwa ti aonga noora riki are ti kantaningaia. Ti na totokoi kariiri nakon te bukibuki ke motikan taekaia tabeman man aia bure, kaairua, te kauntaeka ibukin te kaetieti, te uneaki ibukin te aro, kain te aba, ke karan te kun.

Ti na iangoiia aomata ni kabane ake ti boo ma ngaiia n riki bwa natin Tamara are i Karawa—mwanera ke tarira.

Ti na anga baira nakoia tabeman inanon te oota ao te tangira—riki koraki ake a na aki bebete te tangira nakoiia. Ti na tang ma ake a tang ao ni karau nanoia ake a kainnanoa karauan nanoia.²

Ao ti na ataia bwa bon akea te kainnano ibukira n namakina rakan te korakai ngkana ti aki kona ni karaoa te babaire.

Te kauoua n tua are e korakora bon te taakete. Iaon tuua aika uoua aikai a tauraki ni kabane tuua ao aia taeka burabeti.³ Ngke ti kariaia aio, ni kabane bwaai tabeua a na riki n oota ni kaeti nakon oin kakawakiia.

Ngkana ara moan taratara, ara iango, ao ara mwakuri a boboto iaon karikirakean ara tangira ibukin Mimitongin te Atua ao karaababaan nanora nakoia tabeman, ti na kona n ataia bwa ti a tia ni kunea te taakete ae eti ao uarokoan matan te kao-mwaane—n riki bwa ana reirei Iesu Kristo ae koaua.