Bwanaaia Aika Itiaki ni Boong Aika Kaitira
Antai ae Tauraoi Ngkai?
Kamataata n te Tamnei iroun Richard Hull
N te Tabati teuana imwiin te kabanea n tetere n te maungatabu ni kabuta, I namakina te wirikiriki ae rangin n onoti bwa n na tiaina n au akaunti n au FamilySearch ao ni karaoi tabeua mwakuri n rongorongon au utu. I aki kukurei ni mwakuri iaon rongorongon au utu bukina bwa I a tia n aki karekea te nakoraoi ngke I a tia ni karaoia mai imwaina. A tia kain au utu ni kaman karaoi mwakuri n rongorongon te utu aika bati, ao Irou akea n au iango te bwai ae e na manga karaoaki.
I tekateka n rara rikaaki ni kanakoa te ang ni kaota uniu ngke I taraa mwiin au kakaae are akea riki te bwai ae n na kantaningaia are I a tia ni mwakuriia inanon ririki, ma te kantaninga bwa aio te kabanea ni bong are n na kona ni kunei tabeua rongorongo. I moana au kakaae ae teimatoa rinanon ikoikotakin rongorongo, ao bonginibung, ao imwiin teuana te aoa akea te bwai ae I kunea. Ngkanne te Tamnei are e a tia ni wirikiriki nakoiu kabanei boong ni motirawa rinanon tetere n ni maungatabu e tuangai bwa n na tataro ao ni kakaea bwa antai ae tauraoi ibukin aia mwakuri ae na karaoaki ngkai.
Ngke I atia n tataro, I okirikaaki nakon oin arau ao ni waaki nako rinanon te rain. I namakina te Tamnei n ae mataata ni kairai man te rain teuana nakon teuana ni karokoa I roko n ana itera ana utu taman taman tamau. Inanon te aua are imwiina I kona n namakina te Tamnei n roota nanon te ruu, ao I nako ma onoua aara aika n na uoti nakon te tembora. Ngke I tia ni bubuti aara ibukin te tembora, I tara rikaaki nakon tabeua rekooti ake I a tia ni karekei rongorongo mai iai. E onrake matau ma rannimata ao I namakina te kimwareirei ae korakora—e a tia n roko te rongorongo mairouia taan karin ara ake a tia n anga nanoia n aia tai bwa ana karin rekooti ibukiia au bakatibu. Ma te kakaitau, I karin aara ibukiia tabeman aomata ibukin te aua are imwiina.
N te bong anne e rikirake au koaua ao I kaonaki ma te kakaitau ibukin bwaai aika uoua. Moan bukina, bwa n tain te maungatabu ni kabuta, e a tia te Tamnei ni kairai bwa n na karaoa te mwakuri n rongorongon te utu ao n atai aara aika n na ukerii. Kauouan bukina bwa bukina bwa kaain te Ekaretia ni kabuta te aonaaba ake a karin aara bwa aonga aomata n arou ni kona raoi ni kuneia ara bakatibu ao ni kawaekoa ao ni waekoa ni katia aia mwakuri n te tembora ibukiia. Bon te koaua ae itiaki ao ni korakora nakoiu n ana mwakuri te Atua ni kabuta te aonaaba.