Mweengara, Ara utu
I Tangiria ni Maeka ma Ngkoe n Aki Toki!
E maeka te tia korokaraki i Santo Domingo, Dominican Republic.
Ana onimaki te ataei ae onoua ana ririki e buokai ni manga kaoka au onimaki.
Ngke I roko n au ka 22 n ririki, e a bitaki maiu n te aro ae I aki kantaningaia: tinau e a tia ni mate. Neiei ao au karo bon aomata aika a korakora aia onimaki, ao a kaikawaai inanon te euangkerio. Imwiin maten tinau, au karo e mwaing man abara nakon te United States. E a nako te tai ma arona, I moanna namakina te maroa ngkai ngai bon tii natiia au karo. Akea tinau irarikiu iaon te aba, ao au karo e maeka n raroanako; I ti konaa n nooria tenua te wiiki inanon te ririki.
Bon man te namakin anne are I a moanna n rikirake n ukora te karaunano ao te butimwaeaki ibuakoia “raoraou” man te kuura ao man te aobiti are I mwakuri iai. Teutana mwin teutana, I moanna ni kunei kaairuan kakukurein bwaai n te maiu n rabwata. I toki n nanako n taromauri, ao I amoana n aki kakaonimaki. Imwina, I mareaki ma temwaane ae kakateke are,e ngae ngke tiaki kain te ekaretia ma iai irouna ana koaua aika tamaroa ibukin te euangkerio. Iai teniman natira: Leah, Isaac, ao Ismael.
Kamataata n te Korotamnei iroun Kelley McMorris
Teuana te tai n Okitobwa, au karo e roko ni kawariira ao e noora natira ae boou. Inanon rokona, Leah ae onoua ana ririki e titirakina tibuna te uninwaane bukin tera e aki kaira tibuna te unaine ma ngaia. Au karo ngkanne e kabwarabwara nakoina bwa tibuna te Unaine e mena n te tabo ae onoti ni kaan nakon Tamara i Karawa. Ngke e waekoa n nako au karo, Leah e imanono n tuangai, “Tinau, I tangiria ni kaitibo ma tibu te Unaine. I ataia e mena i karawa, ma I tangiria naba ngaira ni ikotaki ikekei teuana te tai—tibu te Unaine ao tibu te Unimwaane, Tamau, Isaac, Ismael, ao ngkoe, ao ngai. I kan maeka ma ngkami n aki toki. I tangiriira n riki n aron ara utu aei i karawa n aron ae iaon te aba ikai are ti na kona n takakaro ma tibu te unaine!”
I aki ataa te bae N na taekinna. I riinga tamaroan, moamoana ae aki ataibwai, ao ngkanne I a nakon au ruu ni matu. I bwaka nako aon bubuaniwaei ao n tang ni karokoa a toki ranin matau. I butiia te Tama are i Karawa ibukin kabwaraan au bure. I ataia bwa I a tia ni kitana te kawai are ti na kariaiakaki ni maeka ni ikotaki n aron te utu ae akea tokina. I a tia ni bwaka n tibwangau ni kairiia iaon te kawai ae eti, ao I tia ni bwaka n aki taetaekina te euangkerio nakon kainabau.
Ngkai I a matoa raoi n tei, I a reitaki ma mataniwiin te Ekaretia, ao e karekea reitakiu ma unimwaane inanon au uoote. Te tairiki are imwiina, a roko ao a reirei ma kainabau. Man te tairiki anne n reitinako,maiura a bitaki n aki toki. Man te tai aei tia babane ngaira ara utu nanako n te taromauri ni katoa Tabati. Iai weteau are I anganaki bwa N na buokiia taari aine ake aki kakaonimaki. Ti bane ni katauraoi naba n rin n te tembora.
Tamnein te Atua n tabetai e kairiira rinanoiia koraki ake ti kantaningaia. N te tai aei e riki rinanon natiu te aine ae onoua ana ririki. I ataia ngkai bwa man mwin kabaeakira n te tembora, I kona ni maiu ma au utu n akea tokina.