Juon Būriij n̄an bōk Kōjatdikdik im Kōmour
Kōn jipan̄ ko rejejjet, ro emōj ko̧kkure er kōn m̧ōm̧ in kanniōk remaron̄ bōk jipan̄ in kōmōur eo eļap aer aikuji.
Kōmeļeļe jān Cristina Bernazzani
Ļōmņak n̄e en kar kwe eo kwoj pād ilo tōrerein juon jikin eutiej ilo juon komlaļ im kokōnņaan anjo̧ jān apan̄ kein reļļap, ijo emōj kallim̧ur i eok bwe kwōnaaj lo m̧ōņōņō. Ilo am̧ kappukōt wāween am̧ kijoone, kwōnaaj ellolo jet kein jerbal ko me, eļan̄n̄e enej jim̧we am̧ kakobaiki ippān doon, enaaj ejaake juon būriij n̄an kijoone komlaļ eo.
Eļan̄n̄e kwōjaje kilen kalōk būriij eo, kein jerbal kein renaaj jettokjeer im kwōnaaj illu im ejjeļo̧k am̧ kōjatdikdik. Ak eļan̄n̄e kwōnaaj bōk jipan̄ jān juon eo me etijem̧ļo̧k ilo ekkal būriij, am̧ jeļā im meļeļe remaron̄ ļapļo̧k im jerbal ko remaron̄ dedeļo̧k.
Ium̧win 18 iiō ko remootļo̧k, jerbal eo aō ej kar n̄an elleļo̧k kein jerbal im kein tōl n̄an jipan̄ armej ro kijoone ak eļļā jān en̄taan in en̄jake ko ak ļōmņak ko. Ilubwiljin armej ro emōj aō kar leļo̧k naan in katak, ejjeļo̧k iaan rein raar itok kōn eļapļo̧k metak ijjeļo̧kin wōt ro me em̧ōj ko̧kkure er kōn m̧ōm̧ in kanniōk. Em̧ōj aō lo tōprakin jipan̄ in n̄an kōm̧m̧an bwe kajjojo ren maron̄ kijenmej ilo aer niknik n̄an jem̧ļo̧kin.
Ijoke, em̧ōj aō jeļā ke jemaron̄ en̄jake aenōm̧m̧an jān apan̄ ko im en̄taan ko ad kōn Rilo̧mo̧o̧r. Iakwe eo An ej kotak armej jān marok n̄an meram.
Etke ko̧kkure an m̧ōm̧ in kanniōk ebōktok eļap metak?
Ro em̧ōj ko̧kkure er kōn m̧ōm̧ in kanniōk rej ba n̄an eō kōn juon mour eobrak kōn inepata eļap, pere, im en̄jake ko jet rekōmmetak. Būreejtōn Gordon B. Hinckley (1910–2008) eaar jipan̄ kōj meļeļe etke ko̧kkure ko an m̧ōm̧ in kanniōk ebōktok eļap metak:
“En̄in ej juon men eo enana, kōm̧m̧an jerbal in ko̧kkure ko an m̧ōm̧ in kanniōk. Jelukkuun ban meļeļe kake. Ej jum̧ae m̧wil ko rem̧m̧an an em̧m̧aan im kōrā. Ej juon ko̧kkure n̄an men eo ekwojarjar im kwojarjar. Ej juon ko̧kkure eļap ilo mour an ajri ro. Ej juon men eo enana im ej juon jerawiwi eļap.
“Kajjookok n̄an jabdewōt em̧m̧aan ak kōrā ro me rej ko̧kkure ajri ro kōn m̧ōm̧ an kanniōk. Ilo kōm̧m̧ane menin, riko̧kkure ro rejjab kōm̧m̧ane wōt joreen in eļap. Lio ak ļeo rej barāinwōt jutak im̧aan mejān Irooj ilo aer jerawiwi.”1
Kajoor in kōm̧anm̧an eo ej juon kajoor eo ekwojarjar Jemedwōj Ilan̄ eaar letok n̄an kōj ro Nejin. Elder David A. Bednar jān Doulul eo an Jon̄oulruo Rijilōk eaar katakin: “Kajoor in kōm̧anm̧an armej eo ej juon men eo eaorōk ilo jetōb. … Jemedwōj Ilan̄ im Eo Nejin Ejitenbōro rej rikōm̧anm̧an ro im raar letok n̄an kōj kajjojo mōttan ļo̧k kajoor in kōm̧anm̧an eo aer.”2 Ejjab menin kabwilōn̄lōn̄, etke, ko̧kkure in jorrāān n̄an kajoor in ekwojarjar ej “juon jerawiwi eļap” im ekōm̧m̧an bwe en “juon jorrāān eļap.”
Meļeļe kōn Jon̄an Kōmetakin
Kōmeļeļe ko © nuvolanevicata/iStock/Getty Images
Ko̧kkure an m̧ōm̧ in kanniōk ej jabdewōt m̧akūtkūt ko rejjab mālim rekitbuuj m̧wil ko ilo jibwe ak jab jibwe ānbwinin bar juon n̄an wōt kamōņōņōik armej eo juon. Ekkā wōt an waļo̧k, ro em̧ōj ko̧kkure er kōn m̧ōm̧ in kanniōk rej pok ilo aer ļōmņak im en̄jake kōn aer jab erreo im aer jook, ko me remaron̄ kōm̧m̧an bwe ren lukkuun eddodo kaki. Metak im en̄taan ko ro em̧ōj ko̧kkure er rej en̄jaki ekkā an ļapļo̧k kōn naan ko an ro jet ilo aer jab meļeļe kōn ko̧kkure ko an m̧ōm̧ in kanniōk im ta ko rej waļo̧k jāni. Jet armej rej likūt bwe ro em̧ōj ko̧kkure er kōn m̧ōm̧ in kanniōk rej riab im ba bwe an ro raar ko̧kkure er bōd. Ro jet raar likjab ilo aer tōmak bwe rein rej aikuj ukwelo̧k, āinwōt n̄e raar jerawiwi ilo aer kar ko̧kkure er.
Elōn̄ armej ro iaar jerbal ippāer ro raar en̄jake ko̧kkure an m̧ōm̧ in kanniōk ke raar dik wōt ak jodikdik im armej rekar ba n̄an er bwe ren “meļo̧kļo̧ke.” “joļo̧k bwe menin jem̧aan,” ak “jeorļo̧k aer bōd im meļo̧kļo̧ke.” Kain naan rōt kein—eļaptata n̄e ej itok naan kein jān ro mōttad, uwaan baam̧le eo, ak ritōl ro an Kabun̄ in—remaron̄ kōm̧m̧an bwe ro emōj ko̧kkure er en ļapļo̧k aer nooji en̄jake kein aer im aer jook ijjeļo̧kin aer bōk kōmour im kappukōt aenōm̧m̧an. Āinwōt juon jorāān in ānbwin ak kinejnej, en̄jake in kakinejnej kein rejjab maron̄ kajju jako n̄e jej jab erlo̧k n̄ani. Ijeļo̧kin, tarpok in me eaar ijjino ilo iien ko̧kkure eo, im ippān ļo̧k en̄jake ko rekōmetak, ļōmņak an juon armej ej jino oktak, ej tōl ļo̧k n̄an mōl ko rejjab kam̧ōņōņō. Ejjab pen an ro emōj ko̧kkure er kile ke ta eo eaar waļo̧k n̄an er eaar juon ko̧kkure, aeet remaron̄ ejaake mōl ko rejjab kam̧ōņōņō im en̄jake ko rekōmetak.
Hannah (etan em̧ōj an oktak) eaar en̄jake ko̧kkure an m̧ōm̧ in kanniōk ke ej dik wōt. Āinwōt ro jet emōj ko̧kkure er, eaar rūtto tak ilo an kar ļōmņak bwe ej juon armej nana eo ejjeļo̧k tokjen. Eaar joļo̧k aolep iien ko an n̄an kajeon̄ jerbal n̄an ro jet bwe en kajakoik ļōmņak in ke “ejjab lukkun em̧m̧an” im̧aan mejān Jemedwōj Ilan̄ im ro jet n̄an iakwe e. Ilo jemjerā ko an, eaar mijak n̄e jabdewōt armej rejeļā kōn e, remaron̄ kar ļōmņak elukuun nana āinwōt ļōmņak eo an. Eaar en̄jake eļap mijak n̄e redike, kōn menin eaar mijak in kajeon̄i jabdewōt men ko rekāāl ilo mour eo an ak kōm̧m̧ane jerbal dikdik ko āinwōt kōnnaan ippān juon ilo taļboon. Eaar ļap an jeraam̧m̧an kōn juon an tōļan in jin̄n̄a ak eaar bōjrak an kōm̧m̧ane kōn wōt an mijak n̄e rekajirere kake e.
Ium̧win 50 iiō ilo an jab ellolo jipan̄, ejjeļo̧k an kajoor, eaar mijak, ilulu, tarpok, jook, ajimakeke, im an kālet n̄an kattoļo̧k e make aolep raan.
Ukōt jān Metak n̄an Aenōm̧m̧an
Ilo Pinmuur eo an Rilo̧mo̧o̧r, Eaar en̄taan kōn “metak ko im kaen̄taanan ko im kapo ko otemjeļo̧k.” Eaar kōm̧m̧ane menin bwe En maron̄ “jeļā ekkar n̄an kanniōk ekōjkan jipan̄ armej ro An ekkar n̄an m̧ōjņo̧ ko aer” (Alma 7:11–12). En̄taan eo an ejjab n̄an jerawiwi ko ad wōt ak ej barāinwōt n̄an ad bōk kōmour n̄e jerawiwi an bar juon armej ej kaen̄taan kōj.
Eļan̄n̄e enkar pād ijin rainin, ij pijaik ļo̧k an Rilo̧mo̧o̧r naaj jan̄ im kōjeraam̧m̧an ro em̧ōj ko̧kkure er kōn m̧ōm̧ an kanniōk, āinwōt an kar jan̄ im kōjeraam̧m̧an Ri Nipai ro (lale 3 Nipai 17). Men̄e Ejjab pād ijin ilo ānbwin, Jetōb eo an emaron̄ pād ippād, im Em̧ōj an letok juon iaļ bwe jen bōk kōmour, n̄an en̄jake aeņōm̧m̧an, im kajjieon̄ jeorļo̧k bōd.
N̄an ro em̧ōj aer metak jān menin, ļōmņak eo in bwe metak ko rej ineeki remaron̄ oktak n̄an aeņōm̧m̧an eo me epen tōmake. Ekkā an ro jet jab jeļā im jab kile en̄taan in kinej ko an ro kar ko̧kkure er ium̧win elōn̄ iiō. Metak in epenjak kōn mejān etōn̄dikdik, im kōnņaan jerbal n̄an ro jet, im mour āinwōt n̄e ejjeļo̧k men eaar waļo̧k, aaet metak eo ej pād wōt.
Jen m̧ōk keidi jerbal in kōmour en̄jake ko n̄an kea im lukkuun kōjparok juon jorrāān ilo ānbwin. Ļōmņak n̄e kwōn kar dik wōt, im kwaar bwilo̧ke ņeem. Ijjeļo̧kin am̧ etal n̄an ippān taktō ro n̄an kōm̧m̧ane, kwoj kijenmej m̧ae iien ejako metak eo, ak kwōj nej ioon wōt metak ilo aolep bun̄tōn ko kwōj kōm̧m̧ani. Iiō ko tokālik kokōņaan bwe metak ko ren jako, kōn menin kwoj loļo̧k taktō eo. Taktō eo ej kōmour di eo, karreoik jabdewōt men ko rej kōm̧m̧an an jorrāān, juļo̧ki, im leļo̧k eok n̄an jikin kōmmourur ānbwin n̄an kōkajoorļo̧k ņeem.
Jerbal in kōmour in jān ko̧kkure ej āinwōt ilo wāween an ro em̧ōj ko̧kkure aikuj jino kile bwe metak in em̧ool im bwe emaron̄ anjo̧ jān e. Jerbal in ekoba kile ta eo eaar waļo̧k im kōtļo̧k en̄jake in metak eo, mijak, im būrom̧ōj, kile im kam̧ool e. Ekkā an bar jipan̄ n̄e kwōj jerbal ippān juon eo etijem̧ļo̧k ilo jerbal in kōmour rōt in. (Etale ippān ritōl ro an priesthood n̄an ekkatak eļan̄n̄e ewōr LDS Family Services ilo jikin eo kwōj jokwe ie.)
Mekarta ro rejelet er ak ro ejjab jelet er raar bōk jipan̄ ko retijem̧ļo̧k, em̧m̧an tata jar, ekkatak kōn mour eo an Rilo̧mo̧o̧r im Pinmuur eo An, im loļo̧k ritōl ro an priesthood aolep iien. Emaron̄ jipan̄ eok kōmeraikļo̧k eddo ko am̧ im bōk im̧we n̄an jipan̄ eo em̧ōj ko̧kkure meļeļe kōn jon̄an kwojarjar im jem̧jerā eo an ippān Jemedwōj Ilan̄ im Rilo̧mo̧o̧r eo. Āinwot an Sister Carole M. Stephens, Rikakpilōklōk eo Kein Kajuon ilo Doulul eo an Kōrā, kar katakin: “Jerbal in kōmour emaron̄ juon tōre eo eaitok kitien. Emenin aikuj bwe kwōn jar n̄an bōk tōl im jipan̄ ko rekkar, ektibuuj naan in katak jān priesthood ro em̧ōj kapit er. Ilo am̧ ekkatak n̄an ekōnono ilo ejjeļo̧k uwōta, kālet jikin ko rekkar im bolen kappukōt naan in katak ko jān ro retijem̧ļo̧k. Dāpij wōt ājmour eo ilo jetōb ilo am̧ kōm̧m̧ani jerbal in jipan̄ kein eaorōk!”3
Ippān Hannah, mour eo an eaar jino abņōņō, kōn menin, eaar kappok jipan̄. Eaar jeļā jān naan in kam̧ool eo an bwe eaar en̄jake aenōm̧m̧an im m̧ōņōņō ilo mour in ak ejeja an en̄jaki. Kōn jar im ekōnono ippān bisop eo an, eaar bōk tōl im naan in kapilōk, ijo me eaar maron̄ bōk kein jipan̄ ko me eaar lukkuun aikuji n̄an bōktok m̧ool eo jān marok im kwaļo̧k jon̄an nana in eddodo eo eaar ineek make iaan. Ilo kōm̧m̧ane menin, eaar maron̄ jakoļo̧k metak im jino lo aenōm̧m̧an eo Rilo̧mo̧o̧r eo eaar kallim̧ur kake (lale Jon 14:27). Ippān ļo̧k aenōm̧m̧an in im kaenōm̧m̧an eaar itok juon ikdeelel im maron̄ n̄an jeorļo̧k bōd.
Aikuj eo n̄an Jeorļo̧k bōd
Ļōmņak in n̄an jeorļo̧k bōd ekkā an pen ippān ro em̧ōj ko̧kkure er n̄an ron̄ kake im ekkā aer jab meļeļe kake. Eļan̄n̄e rej ļōm̧ņak kōn jeorļo̧k bōd āinwōt aer kōtļo̧k bwe eo eaar kōm̧m̧ane ko̧kkure in en ba bwe men eo eaar kōm̧m̧ane ejjab nana, im eo em̧ōj ko̧kkure en jab errā. Ilo an mōj kakien kōj bwe jen jeorļo̧k bōd (lale K&B 64:10), ilo jekjek eo me eļap metak ie, kōmour ej aikuj ijjino m̧o̧kta jen an eo kar ko̧kkure e jeorļo̧k an riko̧kkure eo bōd.
Ro rej en̄taan kōn metak ko me rej waļo̧k jān ko̧kkure an m̧ōm̧ in kanniōk remaron̄ lo aenōm̧m̧an ilo naan in katak in ilo Bok in Mormon: “n̄a, Jekab, ikōņaan kōnono n̄an kom̧ ro rej ettā būruweer. Reilo̧k n̄an Anij kōn kōļmenļo̧kjeņ eo edim, im jar n̄an e kōn eļap tōmak, im Enaaj kaenōm̧m̧an kom̧ ilo en̄taan ko ami, im Enaaj akweļap kōn kōttōpar eo ami, im jilkinlaļtak idenoņe n̄an ro rej pukōt ko̧kkure eo am̧” (Jekab 3:1). Aikuj eo n̄an ekajet im jim̧we n̄an kōļļā wōņāān emaron̄ ajeļo̧k n̄an Irooj bwe En maron̄ ukōt metak ko ad n̄an aenōm̧m̧an.
Hannah eaar lo bwe emaron̄ kar ajeļo̧k ekajet eo n̄an Rilo̧mo̧o̧r im bwe en en̄jake aenōm̧m̧an ilo mour eo an me ejjan̄in kar en̄jake m̧okta. Mokta, eaar mijak n̄e riko̧kkure eo ej pād ilo iien ippān doon ko an baam̧le. Kiiō, kōn wōt an ikdeelel n̄an jelm̧ae en̄jake ko reppen ilo an bōk kōmour, ejjab kiiō mijak in jede im̧aan mejān eo eaar ko̧kkure e im emaron̄ wōr an turiamo n̄an e n̄e eļōļļap.
Eļļā Jān Edodo ko Ejjelļo̧k Tokjeer
Elder Richard G. Scott (1928–2015) jān Doulul eo an Jon̄oulruo Rijilōk ro eaar ba “kōmour eo ewāppen enaaj itok jān tōmak eo am̧ ilo Jisōs Kraist im An kajoor im maron̄, kōn pinmuur eo An, n̄an kōmour jeno̧k in kinej ko me rejjab erreo im rejjab jejjet. …
“Ej iakwe eok. Eaar leļo̧k mour eo an bwe kwōn maron̄ eļļā jān edodo ko ejjelļo̧k tokjeer. Enaaj jipan̄ eok anjo̧ jāni. Ijeļā bwe ewōr an kajoor n̄an kōmour eok.”4
Rinana eo ekōņaan bwe en likwōj eok kōn metak im en̄taan kōnke e eobrak kōn nana (lale 2 Nipai 2:27). Kōn jipan̄ an Rilo̧mo̧o̧r, Jisōs Kraist, metak remaron̄ oktak n̄an aeņōm̧m̧an, āinwōt an Rilo̧mo̧o̧r eo maron̄ leļo̧k, im jemaron̄ mour ilo lan̄lōn̄. “Adam eaar wōtlo̧k bwe armej ren kar āinwōt, bwe ren maron̄ āinwōt, bwe ren maron̄ m̧ōņōņō” (2 Nipai 2:25). Mour ilo lan̄lōn̄ ej kōtļo̧k bwe mālijjon̄ ko jej iooni ren meraļo̧k im kōmaron̄ kōj n̄an ekkatak im eddōkļo̧k im erom āinwōt Jemed Ilan̄.
Eļap aō ettā kōn kōjeraam̧m̧an kein ilo mour e aō n̄an jelm̧ae ro rej metak jān ko̧kkure an m̧ōm̧ in kanniōk im lo menin kabwilōn̄lōn̄ ko rej waļo̧k jān Rilo̧mo̧o̧r n̄an kōmour. Eļan̄n̄e kwōj en̄taan, jouj im jar n̄an kajjitōk jipan̄. Kwōj jab aikuj ineeki eddodo ko make iaam. Ijeļa Ej kōmour, kōnke em̧ōj aō kam̧ool e elōn̄ alen.