Kōppopo n̄an juon Em̧akūt Kāāl
Rijeje eo ej jokwe ilo Paraná, Brazil.
Āinwōt Nipai ke ekar jerak n̄an ijo jab jeļā kake, ij aikuj bar kōjerbal tōmak ilo Irooj n̄an jino juon baam̧le.
Photograph © Getty Images
Ilo an wiik ko epaaktok n̄an iien m̧are im liāp eo aō ilo tampeļ, iaar jino mijak kōn aolep men ko inaaj aikuj in kōm̧m̧ani m̧okta jān aō jino juon aō baam̧le. Kōjekdo̧o̧n aolep m̧ōņōņō ko ilo iien eo, iaar jino m̧ōk in kakoņ ijjino eo am̧, kōpooj jāān ko am̧, kappok jikin men ko m̧weim̧, im aolep eddo ko aō rekāāl āinwōt lio pālele. Iaar kōņaan bwe kōm̧in kaju jinoe ālkin wōt am̧ro m̧are n̄an kōm̧m̧an bwe en wōr jikin m̧akūkūt ko raorōk āinwōt kōjparok kien ko im joļo̧k iien ippān doon āinwōt ļeo im lieo pālele jekdoon n̄e kōm̧ boub ilo mour ko am.
Ke raan in m̧are eo ej epaaktok, iaar ilbōk kōn juon ettōņak eo me ekitbuuj aolep inepata ko me renaaj jelet baam̧le eo. Kōnke ij itok jān juon baam̧le eo ettā, kōm̧m̧an ko im iakweleel ko im rub bōro ko raar waļo̧k, ettōņak ko renana raar ļapļo̧k aer jelet eō. Juon bon̄, ālkin ettōņak ko jet, iaar ruj im kar ļōmņak in ļoor kapilōk eo an Sister Neill F. Marriott, rikakpilōklōk eo Kein Karuo ilo Doulul eo Eutiej an Jiron̄ Ro, ilo kar kōnōnō eo an “Kwaļo̧k Būruwōd n̄an Anij” (Liaona, Nob. 2015, 30–32). Iaar kiil meja im jar, “Jemedwōj Ilan̄, ta imaron̄ kōm̧m̧ane n̄an juļo̧k men kein renana jān baam̧le eo aō?”
Uwaak eo eaar m̧ōkaj an itok āinwōt n̄e juon ej kōpeļļo̧k bōra im likūt naan eo. Aaet, juon ainikien edik eaar im̧we eō, “Baj kōm̧m̧ane ta ko kwōj aikuj in kōm̧m̧ane. Kwōn tiljek ilo aolep jon̄ok.” Jetōb eaar unoojdikdik kōn jet kapilōk ko rejejjet, im iaar en̄jake bwe n̄e inaaj kōm̧m̧an men kein, aolep men renaaj em̧m̧an.
Iaar ettōn̄ im kar en̄jake ineem̧m̧an ilo būruwō. Aolep inepata ko aō raar m̧ōkajin jako, kōnke iaar jeļā ke raar m̧ool. Iaar en̄jake Jetōb Kwojarjar in m̧okta ļo̧k, ak eaar jab kajoor in wōt kar joteen eo. Iaar en̄jake iakwe eo an Jemedwōj Ilan̄ im ad Rilo̧mo̧o̧r kar jepooļ eō, im iaar jeļā bwe ineem̧m̧an im lo̧mo̧o̧r eo an baam̧le eo aō eaar lukkuun aorōk n̄an E āinwōt an aorōk n̄an n̄a.
Juon ļōmņak eaar itok, kōn juon bwebwenato jān jeje ko rekwojarjar eaar itok n̄an kōļmenļo̧kjeņ e aō—kōn tōre eo Irooj eaar jiron̄ Nipai bwe en jek juon wa: “Kōn menin Irooj eaar kōnono n̄an eō, im ba: Kwonaaj jek juon wa, ilo wāween eo Inaaj kwaļo̧k n̄an eok, bwe in maron̄ bōk ļo̧k armej ro am̧ ioon dān ko” (1 Nipai 17: 8; eoon eo eaorōk kar kobaiktok).
Nipai im baam̧le eo an raar pād ilo āne jem̧aden ium̧win elōn̄ iiō, dipļo̧kki elōn̄ inepata ko. Emaron̄ kar mijak in jino em̧akūt n̄an kijoone lom̧alo im kar kōm̧m̧an bwe mijak eo an en kajoor jān tōmak eo an. Ak eaar jab. Eaar bōke im pokake naan in jiron̄ ko an Anij. Eaar wōr an tōmak bwe kallim̧ur ko An renaaj kūrm̧ool. Irooj eaar jab ba n̄an Nipai bwe ke lan̄ ko im ņo̧ ko reban bun̄it wa eo. Ak Eaar jiron̄ Nipai bwe eļan̄n̄e enaaj pokake naan in jiron̄ ko An, enaaj maron̄ in tōl baam̧le eo an ioon dān ļo̧k n̄an āneen kallim̧ur.
Iaar kile bwe iaar bar dipļo̧ke āne jem̧aden elōn̄ alen, im kiiō ij jelm̧ae lom̧alo, kōppopo n̄an juon em̧akūt kāāl: m̧are. Em̧ōj kar kūr eō—im ij ļōmņak bwe en̄in ej jekjek eo an aolep baam̧le ko Rekwojarjar—n̄an jek juon wa im ļoor naan in jiron̄ ko an Anij.
Ke ej m̧ōj am̧ro ļeo ippa m̧are, inepata ko raar itok. Iaar nan̄inmej, im eaar pen am̧ kōjparok jāān ko am̧ im kar likūt aolep iminene ko rem̧m̧an kōm̧ ar kālet n̄an ļoori.
Ak kapilōk eo iaar bōk joteen eo eaar pen wōt ilo būruwō. Kōm ar kajjieon̄ kajjojo raan n̄an jeļā im kautiej naan in Anij ilo būruwōm̧, n̄an ļoor waanjon̄ok ko rem̧m̧an an ritōl ro ad rejitenbōro—ekoba Kraist—im n̄an kōkm̧anm̧an m̧wil ko am̧ make. Iaar bōk juon naan in kam̧ool eo epen kōn jar im lukkuun kar idajon̄jon̄ e iakwe eo an Jemed n̄an kōj. Eaar ļapļo̧k aō leke im dikļo̧k aō mijak. Kōm̧ ar kile bwe apan̄ ko kōm̧ ar iooni raar erom jon̄ok ko rem̧m̧anļo̧k. Rainin jukjukin pād eo am̧ ej āinwōt ļo̧k lan̄.
Kōm̧ij pād wōt ilo jinoin em̧m̧akūt in am̧, ak m̧are im jino juon baam̧le eaar kālet eo em̧m̧antata iaar kōm̧m̧ane. Būruwō eaar obrak kōn m̧ōņōņō ke iaar ļōmņak kōn kain̄i eo an tampeļ kōm̧ ar bōke im jeļā bwe kar liāp jān kajoor eo an Anij. Toon wōt aō meļeļe kōn karōk eo an Jemedwōj Ilan̄ kōn aorōk eo an baam̧le im kwojarjar in bujen eo kōm̧ ar kōm̧m̧ane, enaaj toon wōt aō kōņaan jipan̄ baam̧le ko jet bōk ejja kain̄i in.
Iaar jeļā bwe jejjab aikuj in inepata kōn ta eo enaaj waļo̧k, kōnke “Anij ear jab letok n̄an kōj jetōb in mijak, a jetōb in kajoor, im iakwe, im jim̧we” (2 Timote 1:7). Kōm̧ ar aikuj in pokake, n̄an ļoor naan in jiron̄ ko letok ilo jeje ko rekwojarjar im naan ko an rikanaan ro raan kein, im kajjitōk ilo jar n̄an bōk elōn̄ ļo̧k naan in jiron̄ an juon make. Eļan̄n̄e jenaaj kōm̧m̧ane men kein, innām jenaaj kijoone lom̧alo eo an raan kein āliktata kōn peran jekdo̧o̧n ta inepata ko renaaj iooktok kōj, ad iakwe n̄an ro jej iakwe er enaaj jokne.