Meļeļe kōn Kōjeraam̧m̧an ko an Petriak eo Am̧
Rijeje rein rej jokwe ilo Illinois, USA, im New York, USA, n̄an kautiej wōt.
Kile m̧ōttan kōjeraam̧m̧an ko am̧ emaron̄ jipan̄ eok lo uwaak n̄an mour eo am̧.
Man in maze © Digital Vision Vections/Getty Images
Laļ in eobrak kōn kajjitōk ko: Ia eo iaikuj jikuuļ ie? Ta eo ij aikuj in Kōm̧m̧ane? Iaikuj ke jerbale juon mijen? Wōn eo inaaj m̧areki? Eļan̄n̄e en kar wōr juon māāp ippām̧ n̄an kōjebwebweiki kālet ko an mour in, kwōn ke kar ļoore?
Jemedwōj Ilan̄ im Jisōs Kraist raar letok n̄an kōj juon māāp—kōjeraam̧m̧an ko an petriak—kar letok n̄an kōj tōl n̄an mour ko ad. Men̄e kar letok n̄an kōj menin letok eo an anemkwoj n̄an kōm̧m̧ani kālet ko ilo iien ko ad make, kōjeraam̧m̧an ko an petriak remaron̄ kōmeram iaļ ko renaaj bōktok m̧ōņōņō eo eļap.
Ak ejjab bwe n̄an bōk juon māāp. Jej aikuj ekkatak, meļeļe, im mour kake ta eo ej waļo̧k ilo māāp eo. Ejjeļo̧k oktak, ilo am̧ meļeļe kajin eo kar kōjerbale ilo kōjeraam̧m̧an in petriak eo am̧—tōl eo am̧ ilo mour in—kwonaaj maron̄ in jeļā wōn kwe im̧aan mejān Anij im wōn eo kwon maron̄ erom āinwōt.
Jeļā Bwij eo Am̧
Moktata im ejjab diktata, kōjeraam̧m̧an in petriak eo am̧ ej kwaļo̧k bwij eo am̧, ak lukkuun bwij ko jon̄oulruo an Jekab (ro kar ņa etāer tokālik Israel) me ej am̧. Men̄e jejjab aolep jen bwijin Jekab, ak jeje ko rekwojarjar rej katakin kōj bwe ro uwaan Kabun̄ in rej itok jān m̧weo im̧ōn Israel: “Bwe jon̄an wōt an lōn̄in eo enaaj bōk gospel in naaj ņa etan ilo̧kan Eta, im enaaj bōnbōn ineem̧, im enaaj jutaktok im kōjeraam̧m̧an eok, āinwōt jemāer” (Ebream 2:10).
Shelisa Schroeppel jān Utah, USA, eaar ba, “Ilo aō jeļā ke ij itok jān m̧weo im̧ōn Jekab ejipan̄ eō meļeļe jibadbad eo aō ilo mour in im ta unin aō kar kūr n̄an jet kūr ko ilo Kabun̄ in.”
Kōjeraam̧m̧an eo am̧ ilo petriak enaaj barāinwōt kōmeļeļeik jabdewōt kōjeraam̧m̧an ko reinļo̧k wōt me ejipan̄ bwij eo am̧. N̄an waanjon̄ok, elōn̄ ro uwaan Kabun̄ in rej jān bwijin Ephraim, juon bwij me ej kajjejet jerbal eo n̄an kajedeed enaan eo kōn gospel eo em̧ōj an jepļaaktok n̄an laļ in (lale Duteronomi 33:13–17; K&B 133:26–34).
Pukot Kapilōk eo Am̧ Make
N̄e ejim̧we kōjerbale, juon māāp ej kōjparok juon rito itak jān an jābwābwe. Ejjeļo̧k oktak, jān em̧akūt in ioon laļ in, kōjeraam̧m̧an in petriak eo am̧ emaron̄ lewaj kapilōk im tōl n̄an mour eo am̧. Kōjeram̧m̧an in petriak eo am̧ ejjab jiron̄ eok ta eo kwoj aikuj kōm̧m̧ane, ak emaron̄ lewaj ļōmņak ko an juon make kōn iaļ eo—eļan̄n̄e pukote kōn tōmak—maron̄ jipan̄ eok jeļā n̄e mour eo am̧ ej ekeijeļ ļo̧k ilo ankilaan Jemedwōj Ilan̄. Ilo am̧ lin̄uri kōjeraam̧m̧an in petriak eo am̧ im pukot n̄an mour kake ilo juon wāween eo me emaron̄ bōk Jetōb in Irooj, kwomaron̄ in lo jokne, lan̄lōn̄, im tōl.
Gabriel Paredes jān Lima, Peru, eaar ba “Jet iaan kapilōk eo me kar letok n̄an eō ilo kōjeraam̧m̧an eo aō iaar maron̄ in lukkuun mour kake ilo baam̧le eo aō ālkin aō liāp n̄an kōrā eo ippa.
“Jem̧aanļo̧k kōm̧ eaar ļōmņake ta eo kōm̧ naaj kōm̧m̧ane n̄an kōkajoorļo̧k im kapen baam̧le eo am̧. Kajjitōk eo am̧ eaar uwaak ilo kōjeraam̧m̧an in petriak eo aō. Ilowaan eaar kakeememej eō bwe in kautiej im̧aantata, kijenmej, im iakwe baam̧le eo aō, kōnke rej jet iaan pedped ko raorōk ilo gospel eo an Jisōs Kraist.
“Ilo am̧ kalimjek menin, kōrā eo ippa im n̄a kom̧ro maron̄ kar anjo̧ ioon inepata ko. Ej wōr wōt idajon̄jon̄ ko kōm̧ij iooni āinwōt juon baam̧le, ak kōm̧ij m̧ōņōņō. Iaar en̄jake bwe Irooj ej kakeememej eō elmen bwe en wōr aō baam̧le eo me Eaar kallim̧uri eō. Ijeļā bwe Irooj ej kōnono ilo kōjeraam̧m̧an ko an petriak im bwe kapilōk in ilo er en maron̄ jerbal ilo mour ko ad.”
Wōnm̧aanļo̧k im Etali
Juon māāp eban lukkuun kwaļo̧k kajjien aolep kauwōtata ko repād im̧aan, ak ilo m̧ool, kōjeraam̧m̧an ko ilo petriak ekkā aer kwaļo̧k kakkōļ ko n̄an kōjparok kōj ilo ial ko ad. Jet iaan etali kein rej kōjparok kōj jān im̧we ko an Setan; jet remaron̄ kōmeram̧ļo̧k kōj ilo wāween ad maron̄ anjo̧ jān piktokin armej eo ilo kōj.
Ak Caitlin Carr jān Utha, jet iaan etali ko ilo kōjeraam̧m̧an in petriak eo an raar jab m̧ōkaj aer waļo̧k, ak tokālik ke ej lin̄ūri kōjeraam̧m̧an eo an eletok loļo̧kjeņ ko rekāāl.
“Ke iaar bōk kōjeraam̧m̧an in petriak eo aō, em̧ōj kar kakkōl eō kōn armej ro me renaaj kajjieon̄ im kinōōrļo̧k eō jān m̧ool in kōn naan in kauwe. Iaar jab lukkuun ļōmņak kake; eaar wōr aō tōmak edim ilo katak ko iaar ekkatak kaki.
“Ijoke, iiō eo tokālik iaar ioon pepe ko im katak ko me, ilo alikkar in, raar āinwōt n̄e raar tōt okraaer ilo jim̧we im iakwe ak raar jab. Ennaan kein raar itok jān aolep jikin ko: ilo media, jikuuļ, ak jān ro jera. Men̄e iaar jeļā bwe katak kein raar jum̧ae karōk eo an Anij, iaar lo aō kōņaan make n̄an rie pepe kein jim̧or an laļ in im ilo Kabun̄ in. Tokālik iaar kile bwe ‘ejjeļo̧k juon armej enaaj kabun̄ n̄an ruo m̧aajta’ (Matu 6:24) im bwe ijjab aikuj pedped ioon māletlet eo an armej. Jemedwōj Ilan̄ eaar mijaļ pera ko aō ilo jeje ko rekwojarjar im kar kōnono n̄an kōļmenļo̧kjeņ im būruwō. Ilo juon tōprak, naan in kam̧ool eo aō eaar kajoorļo̧k im iaar jino dim n̄an jurake ta eo ijeļā ke em̧ool.”
Kōļapļo̧k Menin Letok ko im Tōļan ko
Kōjeraam̧m̧an in petriak eo am̧ emaron̄ barāinwōt kwaļo̧k menin letok eo am̧ ilo jetōb im tōļan ko me Irooj eaar liwaj n̄an eok n̄an kalōk aelōn̄ in kiin̄ eo An. Eļan̄n̄e kōjeraam̧m̧an eo am̧ ej kwaļo̧k juon taļen me ejjab alikar n̄an eok, menin emaron̄ in kōnke kwojjan̄in bōke ak kōļapļo̧k tōļan in. Kōn tiljek in pukote im jipan̄ eo an Irooj, komaron̄ rūttoļo̧k im lo tōļan in im ko jet.
Kōļapļo̧k tōļan ko am̧ ejipan̄ eok kile men ko rejjejet kwoj liļo̧k n̄an jerbal in an Irooj. Johanna Blackwell jān California, USA, kar kōļmenļo̧kjeņ kōn menin letok ko im tōļan ko ilo kōjeraam̧m̧an eo an ke eaar en̄jake kapo n̄an keidi e make ippān ro jet: “Ke ij bar riiti naan ko ilo kōjeraam̧m̧an in petriak eo aō, kar kakeememej eō bwe em̧ōj kōjeraam̧m̧an eō kōn menin letok ko me aō make iaar aikuji n̄an anjo̧ jān apan̄ ko im n̄an bōk koņaaō n̄an kōm̧ōkajļo̧k jerbal in an Irooj.
“Kōjeraam̧m̧an eo aō eaar kwaļo̧k n̄an eō bwe in iakwe, jeo̧rļo̧k bōd, im wōr aō peran n̄an iaiio ippān ro ipeļaakū. Iaar kōjerbal menin letok in, bwe Irooj eaar kōjeraam̧m̧an eō kōn juon kōņaan eo eļap n̄an ioon im m̧ōttā ippān ro rekāāl im m̧anit ko. Ilo m̧ool, naan in kam̧ool eo aō eaar kajoorļo̧k bwe jej aolep ro nejin Jemedwōj Ilan̄ eo ej iakwe kōj, im iaar maron̄ in jipan̄ ro jet ilo ad kajjojo pukot bwe jen āinwōt Kraist.”
Pukot Kōjeraam̧m̧an ko kar Kalim̧m̧uri Kōj kaki
Āliktata, kōjeraam̧m̧an ko ilo petriak eo ad ej kwaļo̧k kōjeraam̧m̧an ko Jemedwōj Ilan̄ eaar kallim̧ur kaki n̄an kōj eļan̄n̄e jenaaj tōmak wōt ilo E. Ejjab alikar n̄āāt kallim̧ur kein renaaj kūrm̧ool, ak jemaron̄ in jeļā n̄e jenaaj pokake im mour kōn gospel in, renaaj kūrm̧ool, men̄e ilo laļ in ak mour eo juon.
Sergio Gutierrez jen Nevada, USA, ej kakūrm̧ool juon kōjeraam̧m̧an ilo kōjeraam̧m̧an in petriak eo an ke n̄e ej inepata kōn kōttōbar ko an ilju im jeklaaj: “Ilo iien ko n̄e ij en̄jake m̧ōk kōn men ko rejjab jejjet n̄an ilju eo aō, ak ewōr juon kallim̧ur ilo kōjeraam̧m̧an in petriak eo aō me aolep iien ej jiktok ilo ļōmņak e aō. Kallim̧ur in ejipan̄ eō jeļā bwe toon wōt aō jerbale im tōmak wōt, inaaj bōk menin jipan̄ ko rekkar me rekōm̧m̧an bwe in kōjparok baam̧le eo aō im kalōk Kabun̄ in. Ijjab jeļā ta kōttōbar eo aō epād im̧aan, ak bōk kallim̧ur in eletok n̄an eō tōmak im leke.”
Eļan̄n̄e kwaar ļōmņak ta ankilaan Jemedwōj Ilan̄ n̄an eok, kwojjab make iam̧. Irooj emeļeļe bwe kwoj ioon elōn̄ iaļ ko roktak me komaron̄ loi ilo mour eo am̧, bwe Eaar lewaj n̄an eok juon māāp n̄an dāpij mour eo am̧ n̄an gospel eo An. Kōjeraam̧m̧an ko an petriak rejjab kōm̧m̧ani kālet ko ad, ak rej tōlļo̧k kōj n̄an revelesōn eo ad make. Kōn kōjeraam̧m̧an ko ad ilo petriak, jej jeļā elmen ad karbab ilo karōk eo an Irooj n̄an kobaik Israel n̄an jeļā bwij eo ad; kar letok n̄an kōj make kapilōk, kile, im kallim̧ur ko; im kar katakin kōj kōn menin letok ko rejjejet im tōļan ko Jemedwōj Ilan̄ eaar litoki n̄an kōj bwe jān jerbal n̄an E. Toon wōt am̧ kajjieon̄ im mour ekkar aolepān men kein ilo kōjeraam̧m̧an in petriak eo am̧ make, kwonaaj jeļā bwe kālet ko am̧ raar ilo ankilaan Irooj ilo mour eo am̧.