Maanjabpopo n̄an Tampeļ eo Aolep Raan
Ke eaar ruatimjuon aō iiō, eaar wōr juon aō rūkaki in būraimere eo em̧m̧an etan in Sister Kohler. Iaar lukkuun jook, im eaar lukkuun jouj im em̧m̧an pād ippān. Juon raan eaar letok n̄an kōm kajjojo mōttan peba. Kōm kar aolep jeik ta ko kōm kar kōņaan n̄e kōm naaj rūttoļo̧k. Iaar je: “Etal n̄an kaļōj im m̧are ilo tampeļ.” Iaar taibi peba eo aō im kōdāpe ilo kōjem in kōbat eo aō. Ilo bon̄, meram jān tōma ko ilo iaļ eo rej kōmeram tok jān wintō eo aō. Iaar reilo̧k im lale mōttan peba eo aō. Eaar kakeememej eō ke iaar kōņaan etal n̄an tampel.
Tōre ko m̧okta, ekar wōr wōt 12 tampeļ ipeļaakin laļ in. Iaar kōņaan etal n̄an kajjojo iaer.
Jabdewōt iien jinō im jema rej karōke juon iien kakkije, rej bōk kōm aolep n̄an tampeļ. Kōm kar jokwe ilo Oregon, USA. Tampeļ eo epaake tata 600 m̧aeļ (965 km) ettoļo̧kin ilo Cardston, Alberta, Canada. Wa eo waam eaar jab jerbal kein kam̧ōļoļo eo ie. Ro jeiū im jatū im n̄a kōm kar jijjet ilo jea ko lik. Kōm kar katoto nuknuk maļawi inamōj in wintō in wa eo. Innām kōm kar likūt i ilo būruōm̧ n̄an kam̧ōļoiki kōm.
Ekar juon iien ekam̧ōņōņō ke kōm ej lo tampeļ eo. Iaar jab lukkuun jeļā kōn ta eo eaar waļo̧k ijo, ak ro jinō im jema raar lukkuun m̧ōņōņō ke rej diwōj jān wa eo. Iaar jeļā bwe tampeļ elukkuun aorōk. Iaar jeļā ke ej m̧weo im̧ōn Irooj. (Ilo pija in, n̄a ņe ej kōņak juon jōōt mouj.)
Ālkin an 12 aō iiō, iaar kōm̧m̧an peptaij ilo tampeļ ilo jet iaan tampeļ ko. Innām ke iaar ioon e ļeo ippa, iaar jeļā ke eļap an iakwe tampeļ ko! Kōm kar m̧are ilo Manti Utah Temple.
Komaron̄ kōpopo n̄an tampeļ aolep raan. Etal n̄an tampeļ n̄e kwomaron̄. Jibwe dipin. Ke ļaddik eo jibū Jarret ekar 11 an iiō, ekijon̄ kōm̧m̧ane menmenbwij eo an baam̧le eo an aolep Jabōt ippān Jemān. Eaar lo elōn̄ etan ro jibūn im jim̧aan etto. Kiiō ke ej 12 an iiō, ej etal n̄an kōm̧m̧ani peptaij ko ilo tampeļ n̄an ro nukun etto!
N̄e kwoj pād ilo tampeļ, komaron̄ etetal ijo Jisōs ej etetal ie. Ej m̧weo imōn. Ij kōjatdikdik kwonaaj jar aolep raan n̄an Jemedwōj Ilan̄ bwe En jipan̄ eok kōpopo n̄an deļo̧n̄e tampeļ im iakwe eo An.