Ļōmņak ko n̄an Nokon in Jota eo an Baam̧le

Bok in epād ie bwebwenato im m̧akūtkūt ko me remaron̄ in jerbal n̄an iien Nokin in Jota eo an Baam̧le. Laajrak in ej ruo waanjon̄ak ko.

“Rekar Loe E,” peij 58: Ālkin riiti bwebwenato eo āinwōt juon baam̧le, komaron̄ kōnono kōn wāween ko komaron̄ in erom rikam̧ool ro an Kraist. Komaron̄ ļōmņak kōn wāween ko n̄an am epaakeļo̧k Rilo̧mo̧o̧r eo āinwōt pukōt iien ko rem̧m̧an n̄an jipan̄ rijojoļāār ro ilo jukjukinpād eo am̧, ekkatak kōn mour eo an Rilo̧mo̧o̧r ilo iien am ekkatak jeje ko rekwojarjar, kōkkaajriri n̄an ruo ripālele bwe ren maron̄ etal n̄an tampeļ eo, ak pukōt ļo̧k juon m̧ōttam̧ epād ilo aikuj. Komaron̄ barāinwōt alooje pija eo ej pād ilo mormon.org/easter im kejōkļo̧kjeņ kake aorōk in an Kraist im Jerkakpeje eo An ilo mour ko ad.

“Maanjabpopo n̄an Tampeļ eo Aolep Raan,” peij 69: Komaron̄ ļōmņak in kōm̧m̧ane juon “menmenbwij im bon̄ n̄an tampeļ” n̄an nokon in jota eo an baam̧le. Komaron̄ ekkatak wāween kōm̧m̧an index im pukōt reko̧o̧t in baam̧le ko ak ekōnono kōn aorōk in kain̄i ko an tampeļ eo im lale pija in tampeļ ko ipeļaakin laļ in. N̄e kwoj jokwe ilo juon tampeļ epaake eok, komaron̄ loļo̧k meļan tampeļ eo im kōnono kōn wāween an naaj kepaakeļo̧k kōj n̄an Jemedwōj Ilan̄ im jipan̄ kōj en̄jake iakwe eo An.