“Ewi wāween aō jeļā ke Anij ej ron̄jake aō jar?”

Jar ej juon kōjeram̧m̧an eļap, im emōj kalim̧uri kōj ke Jemedwōj Ilan̄ ej eoron̄ kōj aolep iien, ak ekkā an bōk jet iien n̄an kile uwaak ko.¹

Ļōmņa kōn menin: Anij ej eoron̄ eok ak Ejjab. Eļan̄n̄e Ejjab, innām ta tokjen ad jar. Ak n̄e Ej eoron̄ eok (aeet Ej eoron̄ eok!), jej aikuj pukōt kilen n̄an lukkuun kōnono Ippān ilo jar, kile uwaak ko, im tiljek ilo niknik n̄an jem̧ļo̧kin.

N̄e jej en̄jake bwe Ejjab eo̧ron̄ kōj, bōlen jej aikuj etale jet iaan eddōkļo̧k ko ad make. Komaron̄ kajjitōkin eok make jet kajjitōk ko: ij ke mour erreo? Kōm̧m̧an ko aō rem̧m̧an ke? Ij ke ikdeelel n̄an kōm̧m̧ane ta ko Ej kajjitōki?² Eļan̄n̄e uwaak eo n̄an kajjojo men kein ej aaet, komaron̄ lōke bwe “Irooj am Anij enaaj … lewōj n̄an eok uwaak n̄an jar ko am” (K&B 112:10). Keememej, jet iien uwaak ko rej itok ilo wāween ko rejalikkar ak jab kōtmāne.

Eļan̄n̄e kwar uwaak jaab n̄an kajjitōk ko jet, ej wōr wōt iien! Kōm̧m̧ane oktak ko remenin aikuj ilo mour eo am bwe Jetōb en maron̄ pād ippam. Kwōn ikdeelel n̄an kōm̧m̧ani im̧we ko kwōj en̄jaki.

Im jab meļo̧kļo̧k bwe aolep rej bōk uwaak ilo wāween ko roktaktak. Jar bwe Jetōb Kwojarjar enaaj katakin eok wāween am maron̄ kile uwaak ko. Ejjab pidodo n̄an kili ilo jinoin, ak ej āinwōt kapāāl ko jet: kaminene enaaj bōktok jejjetin. Kwon tōmak im lōke ke Jemedwōj Ilan̄ ej ron̄jakekōj aolep iien.

Ron̄jake Jetōb

Kajjieon̄ ron̄jake Jetōb Kwojarjar. Armej rej ron̄jake Jetōb Kwojarjar ilo wāween ko roktaktak, kōn menin bolen kwōj ron̄jake ainikien eo edik im mera n̄e im̧we ej itok āinwōt juon en̄jake. Ijeļā bwe Jetōb Kwojarjar enaaj ba n̄an eok aolep men ko kwoj aikuj jeļā—kwōj aikuj ron̄jake.

Elise G., 13 an iiō, Alberta, Canada

Uwaak ko ilo Kabun̄ in

Juon tōre iaar lukkuun pere kōn kālet eo eļan̄n̄e ij etal im bwebwenato ippān juon aō date eo ejjab uwaan kabun̄. Juon Jabōt ilo iien kweilo̧k in kwojkwoj eo, juon sister eaar kōnono im āinwōt n̄e ej kajju kalel eō. Ilo tōre eo, Iaar bōk juon kam̧ool bwe Irooj eaar uwaake jar eo aō. Mokta, iaar tarpok kōn ta eo in kōm̧m̧ane, ak innām iaar bōk kaenōm̧m̧an jān Jetōb Kwojarjar, eo eaar kōbrak buruō kōn lan̄lōn̄ im peran. Anij ej uwaaki jar ko ad ilo en̄jake, ļōmņak, jeje ko rekwojarjar, im emaron̄ jān rikōnono ilo iien jar eo!

Karen V., 19 an iiō, Minas Gerais, Brazil

Keememej Wōn Kwe

Ijeļā Anij ej eoron̄ kōj kōnke jar ej bōktok en̄jake in aeņōm̧m̧an, mera, im iakwe ilo būruōm. Ij lo bwe Eaar kōrōlļo̧k eō jān elōn̄ kauwōtata ko jān raan n̄an raan im bwe Ej kōjparok baam̧le eo aō, im Ij en̄jake bwe Ej iakwe eō. Mokta jān aō etal im jikuul, ij ba etan theme eo an Jiron̄ ro; ej jipan̄ eō kakeememej bwe n̄a nejin Anij, eo ej iakwe eō.

Nicol M., 19 an iiō, Lima, Peru

Juon Jar an Ajri

Ijeļā Jemedwōj Ilan̄ ej eoron̄ aō jar kōnke naan ko ilo al eo an Būraimāri “A Child’s Prayer” (Children’s Songbook, 12): “Jemedwōj Ilan̄, kwoj ke pād ijo? Im kwōj ke eoron̄ im uwaake aolep jar ko an aolep ajri? Jet rej ba lan̄ ettoļo̧k, ak Ij en̄jake bwe epaake eō n̄e ij jar.” N̄e ij keememej tok al in, Ijeļā bwe Ej eoron̄ eō kōnke Ij en̄jake jetōb im an iakwe n̄an eō ejjeļo̧k jem̧ļo̧kin. Ilo aō keememej bwe Ej iakwe eō, iaar lukkun en̄jake aeņōm̧m̧an im jeļā bwe Ej eoron̄ jar ko ad.

Elaine B., 16 an iiō, North Carolina, USA

Leke ilo E

Jemedwōj Ilan̄ ej eo̧ron̄ jar ko ad aolep iien, ak jet iien emaron̄ jab uwaaki jar ko ad kōnke emaron̄ jab uwaake kōj ekkar kōn wāween im kōņaan ko ad. Jej aikuj ikdeelel n̄an leļo̧k ankilaad n̄an Ankilaan im tōmak bwe Ejeļā ta eo em̧m̧an n̄an kōj. Jemedwōj Ilan̄ ej iakwe kōj im enaaj kajjieon̄ aolep iien n̄an jipan̄ kōj ekkatak im eddōkļo̧k ilo An uwaaki jar ko ad.

Mosiah M., 17 an iiō, Utah, USA

Kajjitōk im Kwonaaj Bōk

Kōn jeje ko rekwojarjar, emōj katakin kōj bwe Anij ej eo̧ron̄ jar ko ad aolep iien im enaaj uwaaki eļan̄n̄e jej jar n̄an E kōn tōmak im kōn bōro em̧ool. Ilo buruōd jenaaj en̄jake im kam̧ool bwe Ej eo̧ron̄ kōj, juon en̄jake in aeņōm̧m̧an im meļak. Jemaron̄ barāinwōt en̄jake bwe aolep men renaaj em̧m̧an n̄e jej ļoor anikaan Jemād. Eļan̄n̄e kwoj pere bwe Ej eoron̄ kōj, jej kajeon̄ n̄an pukōt tōl ilo jejej ko rekwojarjar innem kajjitōk eļan̄n̄e men kein jej riiti rem̧ool.

Constanza L., 20 an iiō, Bío Bío, Chile

Kappukōt E

Juon iien Iaar lukkun ļōmņak eļan̄n̄e Anij emaron̄ ron̄jaki jar ko aō, innem iaar en̄jake uwaak eo ilo buruō. Iaar ron̄ an juon armej kwaļo̧k an naan in kam̧ool kōn jar, im iaar maron̄ en̄jake Jetōb Kwojarjar. Naan in katak eo aō juon enkar bwe jen kajjitōkin ro jined im jemed, bisop eo, ak membōr ro jet ilo ward eo am. Komaron̄ bar jar kōn jipan̄ kōn unin kōnono in!

Joshua S., 13 an iiō, Oregon, USA

Jar ilo Mool

Ālkin jar eo am, komaron̄ ron̄jake en̄jake ko am im kōttōpar ko kwōj en̄jake ilo buruōm. Juon iaaer emaron̄ in uwaakin jar eo am. N̄e jej jar kōn kōttōpar im bōro em̧ool, Jemedwōj Ilan̄ ej uwaak ekkar n̄an tōmak eo am ilo E. Ejjab uwaak n̄an kam̧ōņōņōik kōj kōnke jekōņaan jeļā.

Jean-Claude N., 16 an iiō, Kasaï-Central, Democratic Republic of the Congo