Ainikien Armej ro Rekwojarjar ilo Raan-ko Āliktata
Waļļōt eo Ejako
Kōmeļeļe jān Wilson Ong
Jem̧aanļo̧k iaar em̧m̧akūt ļo̧k n̄an juon em̧ kāāl im kar ba n̄an jet iaan membōr ro bwe ren tin jipan̄ eō kōm̧m̧ane būrojāāk eo ilo m̧weo m̧ō. Ilo lukwōn būrojāāk eo, iaar etal in tin wiaiki tok kabbwebwe ko kōm̧ij aikuji bwe en dedeļo̧k. Ālkin am̧ kadedeļo̧k būrojāāk eo, iaar en̄jake ke ejako waļļōt eo aō. Iaar jabrijrij kōnke ilowaan waļļōt eo aō epād ie aolep peba ko raorōk ippān ļo̧k jāān eo ij kab bōke jān juon m̧ōtta jibbon̄ōn̄ eo. Iaar etale ijoko iaar wia ie ak iaar jab maron̄ in loe. Iaar ro̧o̧ļ n̄an m̧weo im bar pukote eļan̄n̄e iaar likūti jabdewōt jikin, ak iaar jab bar loe. Iaar jino ļōmņak in bar kōm̧m̧an kape in aolep peba ko. Innām m̧okta jen aō etal jān m̧weo, eo m̧ōtta eaar ba, “Kwar ke baj jar?”
Iaar m̧ōkaj in uwaak, “Aaet iaar jar!”
Ak ilo m̧ool, iaar jab jar kōn lukkuun kōttōbar. Ijoke, iaar kōņaan likūt ankilaaō ilo Jemedwōj Ilan̄ bwe en kōm̧m̧an eddo eo An n̄an jipan̄ eō lo waļļōt eo aō. Ak iaar keememej eoon eo ilo Aiseia 55:8.: “Bwe ļōmņak ko Aō rejjab ļōmņak ko am̧, ak iaļ ko am̧ rejjab iaļ ko Aō, Irooj ej ba.”
Juon Jabōt iaar ilo̧k n̄an m̧ōn jar eo, im juon membōr eo me eaar pād ippa raan eo ļo̧k eaar ba ke eaar jar emakijkij n̄an Jemedwōj Ilan̄ bwe in maron̄ lo waļļōt eo aō. Eaar ba ke ej en̄jake ke inaaj loe. Tokālik, ke ij jijet im riit ippa make, iaar jino riiti Bōk Uwaak n̄an Jar ko Ad jān Elder Gene R. Cook, ekar juon uwaan Jiljilimjuonn̄oul eo. Peij eo jinointata ej kōn juon bwebwenato ejjeļo̧k oktak jān jorrāān eo aō: Ļaddik eo nejin Elder Cook eaar bar jako waļļōt eo an, kōn menin baam̧le eo raar kuk ippān doon im kar jar n̄an Irooj bwe ren maron̄ loe.
Ālkin riiti en̄jake in, iaar jeļā ke ij aikuj in kōm̧m̧ane im kakuk tok kōrā eo im ajri ro ippān doon. Kōm̧ ar kōm̧m̧ane juon doulul, im kajjojo armej ej jar, kajjitōk bwe Irooj en jipan̄ kōm̧ lo waļļōt eo eļan̄n̄e ej Ankilaan.
Mokta ļo̧k iaar kam̧ool kajoor eo an jar, ak tokālik, iaar jar ippa make, iaar kajjitōk ippān Jemedwōj Ilan̄ bwe en uwaake jar eo am̧ bwe en maron̄ kōkajoorļo̧k tōmak eo an kōrā eo ippa im ajri ro.
Raan eo juon juon em̧m̧aan eo eaar ko̧o̧ļ tok. Eaar ba ke eaar lo waļļōt eo aō, ekoba jāān ko. Iaar jan̄ āinwōt juon ajri kōnke jar eo aō eaar uwaak im bwe tōmak eo an baam̧le eo eaar kajoorļo̧k.
Ijeļā bwe Jemedwōj Ilan̄, men̄e eaar lukkkun lōn̄ ajri ro ilo jar eo, n̄an uwaak ekkar n̄an iien eo An im ilo karōk eo An.