Ennaan eo an Būreejtōnji eo Kein Kajuon
A Riwānōk Enaaj Mour kōn Tōmak
Rabbi im Rikōm̧m̧an Soap eo
Ewōr juon bwebwenato an Rijew kōn juon rikōm̧m̧an soap eo ekar jab tōmak ilo Anij. Juon raan ke ekar etatal ippān juon rabbi, ekar ba, “Ewōr juon men eo ijjab maron̄ meļeļe. Kabun̄ ekar pād ippād ium̧win taujin iiō ko. Ak aolep jikin kwoj reilo̧k ie ļo̧k ewōr men ko renana, jorrāān, riab, bōd in ekajet, metak, kwōle, im kakkure ko. Ej kallikar bwe kabun̄ ej jan̄in kōkōm̧anm̧anļo̧k laļ in. Kōn menin, ij kajjitōk ippām̧, ewi wōt menin em̧m̧an?”
Rabbi eo ekar jab uwaak ilo tōre eo ak ekar wōnm̧aanļo̧k wōt etetal ippān rikōm̧m̧an soap eo. Ejjab etto rej itok n̄an juon jikin ikkure ijo ajri ro, ānbwinnier eobrak kōn bwin̄al, rekar ikkure ilo pedkat.
“Ewōr juon men eo me ijjab maron̄ meļeļe,” rabbi eo ekar ba. “Reilo̧k n̄an ajri raņ. Soap ekar pād ippād ium̧win taujin iiō ko, im kiiō ajri raņ retonoon. Ta em̧m̧an eo an soap?”
Rikōm̧m̧an soap eo ekar uwaak, “Ak rabbi, ejjab jim̧we bwe jen jekpen ņae soap kōn ajri rein retonoon. Jej aikuj kōjerbal soap m̧okta innām ej tōpar jibadbad eo an.”
Rabbi eo ekar ettōn̄ dikdik im ba, “Ejim̧we.”
Ewi Wāween Ad Mour?
Rijilōk Paul, ej kouti juon rikanaan in Kallim̧ur Mokta, ekar kōmeļeļeik ta meļeļein erom juon ritōmak ke ekar ba, “A riwānōk enaaj mour kōn tōmak” (Rom 1:17).
Bōlen ilo enaan in jemaron̄ meļeļe oktak eo ikōtaan juon kabun̄ eo me ej erub im juon eo ejjab maron̄ kōkkōm̧anm̧anļo̧k im juon ewōr an kajoor n̄an ukōt mour ko.
Ak n̄an meļeļe ta meļeļein n̄an mour kōn tōmak, jej aikuj meļeļe ta in tōmak.
Tōmak eļapļo̧k jān tōmak. Ej leke Anij ilo m̧ool im jerbal ko rej barāinwōt itok ippān tok.
Eļapļo̧k jān baj ba ke ewōr lōke ippād.
Eļapļo̧k jān baj okjaklikļo̧k, m̧ōm̧ajidjid, im ba kōm̧ij errā. N̄e jej ba “ke riwānōk renaaj mour kōn tōmak,” meļeļe eo ad jej ba bwe jej tōl im ļoor kōn tōmak eo ad. Jej m̧akūtkūt ilo juon wāween me ej jejjet ippān tōmak eo ad—jab jān juon wāween pokake eo ewōr pere ie ak jān juon leke im iakwe em̧ool n̄an ad Anij im kōn mālōtlōt eo jejjab maron̄ kōļļāiki eo Ekar kwaļo̧k tok n̄an ajri ro Nejin.
Tōmak ej aikuj ippān tok jerbal; eļan̄n̄e jab ippān e make mej (lale Jemes 2:17). Ejjab tōmak n̄an jidik. Ejjeļo̧k an kajoor n̄an ukōt juon armej, jen make iaad ilo laļ in.
Em̧m̧aan ro im kōrā ro retōmak rej lōke ilo Jemedwōj Ilan̄ eo etūriam̧o̧—aaet men̄e ilo iien ko reppen, aaet men̄e ilo iien pere im apan̄ n̄e rejjab maron̄ loe ak alikkar aer meļeļe.
Em̧m̧aan ro im kōrā ro retōmak rej lukkuun etetal ilo iaļ in rikaļoor im kajjieon̄ ļoor waanjon̄ak eo an Rilo̧mo̧o̧r eo aer, Jisōs Kraist. Tōmak ej kareel im, em̧ool, ej im̧we kōj n̄an kareel būruwōd n̄an lan̄ im n̄an niknik pukōt ļo̧k, kotak, im kōjeraam̧m̧an ro riturir.
Kabun̄ eo ejjeļo̧k jerbal ie ej āinwōt juon soap eo ej pād wōt ilowaan bo̧o̧k eo an. Emaron̄ kabwilōn̄lōn̄ kōtmāne ko ippān, ak ilo m̧ool, jidik wōt an kajoor n̄an kōm̧m̧ane juon oktak m̧ae iien ej kakūrm̧ool jibadbad eo an. Gospel eo an Jisōs Kraist ej juon gospel in m̧akūtkūt. Kabun̄ eo an Jisōs Kraist ej katakin kabun̄ eo erreo āinwōt juon ennaan in kōjatdikdik, tōmak, im iakwe em̧ool, ekoba jipan̄ ro riturir ilo jetōb im wāween ko jet ilo kanniōk.
Jet allōn̄ rem̧ootļo̧k, kōrā eo pāleeō, Harriet, im n̄a kar pād ilo juon tūreep ippān baam̧le eo ippān jet iaan ajri ro nejūm̧ ilo bukwōn ko ilo Mediterranean. Kōm̧ ar loļo̧k jikin kōppād ko an rijpo̧kwe ro im kar bwebwenato ippān baam̧le ko jān laļ ko rekar jorrāān jān tariņae ko. Armej rein rekar jab jān tōmak eo ad, ak rekar ro jeim̧ im jatūm̧ im rekar lukkuun aikuj jipan̄. Būruwōm̧ rekar lukkuun m̧weiūr ke kōm̧ kar loe kōn mejām̧ wāween an ro uwaan Kabun̄ in reniknik bōktok jipan̄, kōmour, im kōjatdikdik eo n̄an armej ro riturim̧ rekar pād ilo aikuj, mekarta kabun̄ ta eo aer, laļ ta eo aer, ak jeļāļo̧kjeņ.
Tōmak ej aolep iien itok ippān tok m̧akūtkūt ko rej aolep iien jejjet rej kobrak būruwōd kōn jouj, im ļōmņak kōn mālōtlōt im meļeļe, im jetōb eo kōn aenōm̧m̧an im iakwe.
Tōmak eo ad emaron̄ kōjeraam̧m̧an im kareel ilo jetōb jim̧or ro ipeļaakid im kōj.
Tōmak eo ad emaron̄ kobrak laļ kōn em̧m̧an im aenōm̧m̧an.
Tōmak eo ad emaron̄ ukōt dike n̄an iakwe im rikōjdat n̄an m̧ōttad.
Innām, riwānōk, rej mour jān jerbal kōn tōmak, rej mour jān aer lōke ilo Anij im etetal ilo iaļ eo An.
Im en̄in ej kain tōmak eo me ej ukōt kajjojo armej, baam̧le ko, laļ ko, im laļ in.