Ainikien Armej ro Rekwojarjar ilo Raan-ko Āliktata
Lo̧mo̧o̧r ilo Foyer eo
Kōmeļeļe jān Allen Garns
Ļeo ippa ekkā an jerbal ilo raan in Jabōt, ekōm̧m̧an bwe in make lolorjake ļaddik ro emen neju ļo̧k n̄an jar. Juon Jabōt ilo iien kweilo̧k in kwojkwoj eo, ļaddik ro ruo neju raar illu ippān doon. Eļan̄n̄e juon iaan ļaddik rein rekōņaan juon bok, ļaddik juon enaaj bar kōņaan. Iaar kajjieon̄ leļo̧k snack ko, kein ikkure ko, ak ejjeļo̧k tōprak. Iaar inepata ippān ļaddik ro neju, ro me reban baj jijet wōt ium̧win juon awa.
Iaar jibwe tok juon kein ikkure jidikdik jān pāāk eo aō im leļo̧k n̄an ļaddik eo neju juon an iiō. Im em̧ōkaj an Tyson lam̧ōj, eo jilu an iiō, ke ej baiti ļaddik eo jatin, kajjieon̄ in bōk kein ikkure eo. Iaar inepata ke ij diwōj nam̧ōjļo̧k kōn ļaddik ro ruo rej kōm̧m̧an ekeroro.
Eaar m̧ōkaj aō jan̄ kōn dānin kōmjaļļaļ. Etke menin elukkuun pen? Iaar kōm̧m̧ane ta eo Jemedwōj Ilan̄ eaar kōņaan bwe in kōm̧m̧an ilo aō bōktok baam̧le eo aō n̄an jar, ejim̧we ke? Ak ijamin bar kōm̧m̧ane. Eaar kam̧ōkm̧ōk im kajokook n̄an keto ketak ippān ļaddik ro neju ilo iien kweilo̧k in kwojkwoj eo kajjojo wiik. Iaar jab bar kōņaan ro̧o̧l ļo̧k.
Iaar jijet im kōļmenļo̧kjeņ kōn men kein ium̧win 15 minit, innām juon sister eo me eaar lukkuun kea eaar diwōj tok ilikū n̄an nam̧ōj. Etan in Sister Beus. Ekkā an jijet make iaan, ļeo ippān ej jerbal ilo bisoprik eo im ajri ro nejin rerūtto. Eaar ba, “Aolep iien kwoj make iaam̧! Ij lo ke kwoj lukkuun kajjieon̄. Tyson emaron̄ ke jijet ippa?” Iaar jab maron̄ ļōmņak kōn juon uwaak! Iaar em̧m̧ajidjid ke ej jibwe pein im bōk e, kiiō aenōm̧an im m̧ōņōņō, bar etal n̄an m̧ōnjar eo.
Iaar kōmōrāik ļo̧k dānin meja, kotak nin̄nin̄ eo neju, im deļo̧n̄ ļo̧k ilo m̧ōnjar eo kōn m̧ōņōņō ilo aolepān kweilo̧k kōn aenōm̧m̧an.
Jabōt eo juon ke kōmij deļo̧n̄ ļo̧k ilo kweilo̧k in kwojkwoj eo, Tyson eaar pukot eo m̧ōttan. Ilo bon̄ ej jar, “Kom̧ool, Jememwōj Ilan̄, kōn Sister Beus. Iaar lukkuun iakwe e!”
Emootļo̧k de jilu iiō, im Tyson ekab de pukot Sister Beus ilo m̧ōnjar eo. Iiō eo ļo̧k kar kūr e bwe en an Tyson rūkaki ilo Būraimere. Eaar juon ļaddik eo ekam̧ōņōņō.
Ij lukkuun m̧ōņōņō bwe Sister Beus im an kōņaan iakwe im jerbal n̄an ro jet. Ijeļā bwe jemaron̄ kōjeraam̧m̧an mour ko an ro jet n̄e jej jerbal āinwōt kar Rilo̧mo̧o̧r.