Domodra na Yalododonu Edaidai
Vakayacori!
Droini mai vei Allen Garns
Ena noqu veivakatarogi vakabisopi ena dua na yakavi ni Sigatabu, e ka ni marau niu dabe vata kei na dua na itokani vinaka me keirau veitalanoataka eso na bolebole a sotava tiko. Niu vakarogoca tiko na nona lomaleqa ena vica na miniti, au vakila ni ka e gadreva me dau wilika e veigauna na ivolanikalou. A vakananumi talega vei au, niu nona bisopi, sa dodonu meu dau wilika na ivolanikalou e veigauna talega, e dua na ka a dredre tiko vei au. O koya au vakatura kina ni sa yaco me keirau “veitokani dau veitarogi” ena neirau sasaga me keirau dau vuli e veigauna.
E veisiga ni sa oti neirau wilika na neirau ivolanikalou, keirau na dui tekstaka na vosa Sa oti! Ni keirau kila ni wawa tiko e dua tale me rogoca se sa oti nona wiliwili ni siga oya na kena ikarua se sega sa ka ni veivakayaloqaqataki vei keirau ruarua. Kevaka e guilecava e dua vei keirau, sa na vakananumi ena teks. Kevaka e sega ni teks na kena ikarua, ena sega ni vaqaqai kina. Keirau dui laiva vua na kena ikarua me sotava na bolebole ka sega ni vakayalolailaitaki koya.
Keirau a tekivuna na bolebole oqo ena ono na vula sa oti nikua, kau sega ni nanuma rawa e dua na siga me keirau calata kina na wilika na neirau ivolanikalou. A tucake na turaga oqo ena soqoni ni lolo kei na soli ivakadinadina ena vica na vula sa oti ka wasea nona ivakadinadina ena veika vinaka sa vakayacora tiko vua kei na nona matavuvale na wili ivolanikalou e veisiga.
Au vakavinavinaka vakalevu ena vukuna na turaga oqo kei na nona veitokani, vakakina na nona teks e veisiga. Au sa raica na ivakarau e rawa ni vakavinakataka cake kina na noda bula na tekenolaji, ni vakayagataki vakadodonu. Au sa vakavinavinaka talega ena vuku ni ivolanikalou kei na kena vakadinadinataki Karisito. Au kila ni nona iSoro ni Veivakaduavatataki na iVakabula ena rawa kina vei keda yadua me da lesu tale ka bula vata kei Koya ena dua na siga.