Domodra na Yalododonu Edaidai
Yalovinaka Kua ni Vakatagitaka na Sere Oqori
Droini mai vei Bradley H. Clark
Ena dua na gauna sa oti a vakaitikotiko na noqu matavuvale mai Veracruz, e Mexico, ka ratou a vuli kina na noqu gone ena imatai ni itabavuli. Ena veimataka niu vukei iratou na luvequ e tolu me ratou vakarau laki vuli, keitou dau vakarorogo ki na retio—na siteseni kilai levu duadua ena siti—ena dua na parokaramu taleitaki ka liutaka e dua na daukacikacivaki cauravou gone.
Keitou a tekivu vakarorogo ki na dua na sere taleitaki. Ni tekivu meu vakarogoca vinaka na qaqana, au qai kila ni veika e tukuna, e dina ni sega ni vosaca, e veivagaroi ka sakasaka.
Au kaya vakadodonu vei iratou na luvequ, “Tou sega ni rawa ni vakarorogo ki na mataqali vosa vakaoqo.” Rairai ratou sega beka ni vakarogoca na qaqa ni sere, ia na nodratou vakarorogo sa rawa kina ni ratou vagugutaka toka.
Eratou raici au ena noqu sogota na retio ka taroga se cava au cakava. “Au na tukuna vua na daukacikacivaki ena retio me kauta laivi na sere mai na parokaramu.” Na nodratou kurabui e vakayaloqaqataki au meu cakava eso tale na ka.
Eratou sega ni vakabauta rawa vakakina o au, ia au tomika cake na talevoni ka qirita na siteseni ni retio. Au a sega ni namaka me dua na kena isau, ia ka ni kidacala, ni sa sauma mai ena gauna vata ga na daukacikacivaki keitou se qai rogoca tiko ena retio.
Au tukuna vua niu sega ni duavata kei na vakarogoca tiko na sere oya, me vaka ni levu na matavuvale era dau vakarorogo tiko ki na retio ena gauna vata oya ena mataka. E taroga se cava au nanuma me vakaisosomitaka, ia sa rui daumaka nona itovo au mani kerea me kua ga ni vakatagitaka na sere oya ena gauna era tiko voli kina e vale na gone.
Au sega ni mani kila se a kaburaki e macawa na noqu qiri, ia au vakavinavinaka ga ni a vakarorogo na daukacikacivaki ena retio. Ena vica na siga i muri, au rawa ni kila ni sa ciqomi na noqu kerekere.
E vakadeitaka vei au na ka a yaco oya ni dodonu me da yaloqaqa ni toka e ligada na gauna me da vakatulewa ka cakava na ka e ganita me da taqomaki ira na luveda mai na veivakayarayarataki ca. Ni da kitaka vakakina, sa na rawa ni noda itokani tikoga na Yalo Tabu.