Domodra na Yalododonu Edaidai
Na Bausi a Yali
Droini mai vei Wilson Ong
Ena dua na gauna wale toka ga oqo au a toki ki na dua na vale vou ka kerea eso na lewe ni Lotu me ra vukei au ena dua na cakacaka mai noqu vale. Ena lomadonu ni cakacaka, au a lako meu volia eso tale na iyaya e gadrevi me vakaoti kina. Ni sa oti na cakacaka au qai kila ni sa yali noqu bausi. Au nuiqawaqawa baleta ni tu ena noqu bausi na noqu iyaya vakamareqeti kei na ilavo au se qai ciqoma ga ena mataka oya mai vua e dua au qarava tiko. Au lesuva tale na vanua au a volivoli kina, ia e sega ga. Au lako i vale ka laki vaqaqara de dua na vanua au vakalutuma kina, ia au sega ga ni kunea. Au sa tekivu vakasamataka meu na cakava tale na ilavelave vovou ni veiyaya oya. Ni se bera niu biuta noqu vale, a taroga e dua na itokani, “O sa bau masu?”
Au vakasamataka ena gauna vata ga, “O io au sa masu oti!”
Ia na ka dina, au se bera ni bau masu mai vuniyaloqu. Ia, au a vinakata meu vakasaurarataka na lomaqu vei Tamada Vakalomalagi ka me Nona itavi me vukei au meu kunea noqu bausi. Oti au qai nanuma na vosanikalou ena Aisea 55:8: “Ni sa duatani na noqu vakanananu ka duatani nomudou vakanananu, ka sa duatani na noqu ivalavala ka duatani na nomudou ivalavala, sa kaya ko Jiova.”
Au a lako i lotu ena Sigatabu, ka tukuna vei au e dua na lewenilotu a tiko vata kei au ena noa ni a masu tiko vagumatua vei Tamada Vakalomalagi me rawa niu kunea noqu bausi. E kaya o koya ni vakila niu na kunea. E muri niu dabe ena noqu vuli yadua tiko. Sa tekivu meu wilika na Receiving Answers to Our Prayers mai vei Elder Gene R. Cook, lewe ni Vitusagavulu vaka-emeritu. Na imatai ni tabana e tukuni koto kina e dua na leqa tautauvata kei na noqu: A vakayalia na luvena tagane o Elder Cook na nona bausi, eratou qai soqoni vata na matavuvale ka masu vua na Turaga me ratou kunea.
Niu wilika na veika a yaco oya, au vakatovotovotaka na veika au vulica ka soqoni iratou vata mai na watiqu kei na luvequ. Keitou a tuva wavoki, ka cabora na tamata yadua e dua na masu, ka kerea vua na Turaga me vukei keitou me keitou kunea na bausi ke vakakina na Lomana.
Au sa vakadinadinataka oti na mana ni masu, ia e muri, niu masu duadua, au kerea vei Tamada Vakalomalagi me sauma na neitou masu me vaqaqacotaki kina na nodratou vakabauta na watiqu kei na luvequ.
Ena siga tarava sa qiri mai e dua na turaga. E kaya ni sa kunea na noqu bausi, oka kina na ilavo. Au a tagi vaka e dua na gonelailai ni sa saumi mai na noqu masu ka sa vaqaqacotaki na vakabauta ni noqu matavuvale.
Au kila na Tamada Vakalomalagi, e dina ni levu tu na luvena me qarava, sa dau rogoci keda ena Nona gauna ga kei na Nona ivakarau.