“Au na kila vakacava ni sa rogoca voli na noqu masu na Kalou?”

Na masu e dua na veivakalougatataki cecere, sa yalataki vei keda ni dau vakarorogo tiko e veigauna na Tamada Vakalomalagi, ia e vakavuqa ni dau vinakati me da cakacaka me rawa ni da ciqoma na kena isau mai Vua.¹

Vakasamataka mada oqo: e dua ga vei rau e rogoci iko na Kalou se sega ni rogoci iko. Kevaka e sega ni rogoci iko o Koya, e sega ni dua na kena yaga na masu. Ia kevaka e rogoci keda (e rogoci keda dina tiko o Koya!), sa dodonu me da fikataka na ivakarau me da veitaratara dina kina kei Koya ena masu, rogoca ka kila na kena isau, ka toso ki liu ena yalodina.

Ni da vakila ni sega ni vakarorogo tiko, de rairai eda gadreva me da vakila mada eso na tubu yadua. Mo taroga mada vei iko eso na taro: Au sa savasava tiko li? Sa kilikili tiko li na noqu inaki? Au sa tuvakarau beka meu cakava na ka e kerea o Koya?² Kevaka e isau ni veitaro yadua oqo na io, sa rawa ni o vakanuinui ni “na Turaga na nomu Kalou [ena] vakayacora na nomu kerekere” (V&V 112:10). Nanuma tiko, ena so na gauna dau yaco mai na isaunitaro ena veisala malumalumu ka sega ni namaki.

Kevaka o sauma ena sega eso na taro oqori, e sega vakadua ni sa rui bera! Cakava na veisau e ganita me caka ena nomu bula me rawa ni tiko kina na Yalotabu. Tuvakarau mo cakacakataka na veivakauqeti o ciqoma.

Kua ni guilecava ni tamata kece ena duidui na ivakarau ni nona ciqoma na isaunitaro. Masuta me vakavulici iko na Yalo Tabu ena ivakarau mo kila kina na isaunitaro. Ena dredre toka beka me da kila ena imatai ni gauna, ia e vaka ga na maqosa kece tale: ni vakatovotovotaki ena yaco me vinaka sara. Vakabauta ka nuitaka ni Tamada Vakalomalagi ena dau vakarorogo tikoga.

Vakarogoca na Yalotabu

Tovolea mo vakarorogo ki na Yalo Tabu. E duidui nodra rogoca na Yalo Tabu na tamata, rairai o vakarogoca tiko na domo malua lailai ka yaco mai na veivakauqeti ena ka o vakila e lomamu. Au kila ni na tukuna vei iko na Yalo Tabu na veika kece o gadreva mo kila—mo vakarorogo ga.

Elise G., yabaki 13 mai Alberta, Canada

iSaunitaro ena Lotu

Ena dua na gauna a yaco vei au e dua na lomalomarua levu meu veigadivi kei na dua e sega ni lewenilotu. Ena dua na Sigatabu ena soqoni ni sakaramede, a vosa kina e dua na marama ka vaka me vosa tikoga mai vei au. Ena gauna oya, au ciqoma kina na veivakadeitaki ni sa sauma na Turaga na noqu masu. E liu, au a veilecayaki ena ka meu cakava, ia ena gauna oya au sa kune vakacegu mai na Yalo Tabu, ka vakasinaita na yaloqu ena reki kei na yaloqaqa. Dau sauma mai na Kalou na noda masu ena veika eda vakila, na vakanananu, na ivolanikalou, kei ira sara mada ga na vosa i valenilotu!

Karen V., yabaki 19, e Minas Gerais, mai Brazil

Nanuma se o cei o iko

Au kila ni dau rogoci keda na Kalou baleta na masu e kauta mai na yalosautu, na vakacegu, kei na loloma e yaloqu. Au raica ni vagalalataki au o Koya mai na veika rerevaki ni veisiga yadua ka taqomaka na noqu matavuvale, kau vakila niu lomani mai Vua. Ni se bera niu lako i vuli, au dau cavuta na ibole ni Goneyalewa; e vukei au meu nanuma ni o au na luvena yalewa na Tamada Vakalomalagi, ka lomani au.

Nicol M., yabaki 19, Lima, Peru

Na Masu ni Dua na Gonelailai

Au kila ni rogoca na noqu masu na Tamada Vakalomalagi baleta na veimalanivosa oqo ena sere ni Lalai “A Child’s Prayer” (Children’s Songbook, 12): “Heavenly Father, are you really there? (Tamaqu mai Lomalagi o ni tiko dina beka?) And do you hear and answer ev’ry child’s prayer? (O dau rogoca li na masu ni gone kece sara?) Some say that heaven is far away, but I feel it close around me as I pray.” (So e kaya ni yawa sara ko lomalagi, ia au vakila ni voleka vei au niu masu) Niu nanuma na sere oya, au kila ni vakarorogo tiko o Koya baleta niu vakila na Yalotabu kei na Nona loloma tawayalani vei au. Niu nanuma ni lomani au o Koya, au vakila na vakacegu ka kila ni rogoca o Koya na noqu masu.

Elaine B., yabaki 16, North Carolina, Amerika

Vakararavi Vua

E dau vakarorogo na Tamada Vakalomalagi ki na noda masu, ia ena so na gauna e vaka ni sega ni sauma tiko mai o koya na noda masu baleta beka ni sega ni dau sauma mai o Koya ena ivakarau kei na gauna eda vinakata kina. Eda gadreva me rawa ni da tuvakarau me da vakasotara na lomada ki na Lomana ka vakabauta ni kila o Koya na ka e vinaka duadua vei keda. E lomani keda na Tamada Vakalomalagi ka na dau tovolea tikoga me vukei keda me da vulica ka tubu ena Nona sauma noda masu.

Mosiah M., yabaki 17, Utah, Amerika

Drau Kerekere, ka na Soli vei Kemudrau

Mai na ivolanikalou, eda vakavulici kina ni na dau rogoca tikoga noda masu na Kalou ka na sauma mai kevaka eda vosa yani Vua ena vakabauta kei na inaki dina ni lomada. Eda na vakila e yaloda na veivakadeitaki ni rogoci keda dina o Koya, ena yalo vakacegu kei na yalodei. Eda na vakila talega ni na vinaka na ka taucoko ni da muria na lomai Tamada. Kevaka eda vakatitiqataka ni rogoci keda tiko o Koya, e dodonu me da vaqara na veituberi mai na ivolanikalou ka qai taroga kevaka e dina na veika eda wilika.

Constanza L., yabaki 20, Bío Bío, Chile

Vakasaqara

Au a dau vakataroga kevaka e rawa ni rogoca na Kalou na noqu masu, oti au qai vakila na kena isau e yaloqu. Au rogoca nona wasea nona ivakadinadina e dua me baleta na masu, ka rawa niu vakila na Yalo Tabu. Dua tale noqu ivakasala mo ni taroga nomuni itubutubu, bisopi, se so tale na lewe ni nomuni tabanalevu. E rawa sara mada ga ni o ni masuta na veivuke ena ulutaga oqo.

Joshua S., yabaki 13, Oregon, Amerika

Masu ena Yalodina

Ni sa oti nomu masu, e rawa ni o vakarorogo ki na vakanananu kei na inaki e lako mai ki yalomu. E dua vei ira e rawa ni isau ni nomu masu. Ni da masu ena inaki dina ni yaloda kei na yalodina, ena sauma mai na Tamada Vakalomalagi me vaka na noda vakabauti Koya. E sega ni sauma mai me vakamamautaki walega kina na noda lomatarotaro.

Jean-Claude N., yabaki 16, Kasaï-Central, Democratic Republic of the Congo