Na Vakavakarau ena iLakolako Vou
E vakaitikotiko o dauvolaivola e Paraná, Brazil.
Me vakataki Nifai ga ni sokota yani na vanua tawakilai, sa gadrevi sara meu na vakabauta na Turaga ena kena tekivutaki e dua na matavuvale.
iTaba mai vei © Getty Images
Ena veimacawa ka mua tiko yani ki na noqu vakamau kei na vauci e valetabu, au sa tekivu leqataka tiko vakalailai na veika kece e gadrevi meu cakava ni bera niu tekivutaka na noqu matavuvale vou. Dina ni rekitaki taucoko tiko na gauna o ya, au a lomaocaoca ena kena vakarautaki na ituvatuva vou, tuvai vakadodonu na veika vakailavo, laurai na vanua me maroroi kina na iyaya, kei na noqu veilesilesi vou kece vaka-yalewa vakawati. Au gadreva meu vakadeitaka me keirau tekivutaka na neirau vakamau ena sala dodonu ena kena caka tiko na veika bibi me vakataka na maroroi ni ivakaro kei na veigauna vata vakaveiwatini se cava ga na veigauna osooso.
Ni sa roro mai na siga ni vakamau, au a kidacala ena veilecayaki ni yaco mai na veileqaleqa eso a rawa ni vakaleqa na noqu matavuvale. Baleta ga niu tadu mai ena dua na matavuvale lomani ka vakaloloma, ka dau vakacacani ena veiba kaukauwa kei na kavoro ni yalo, sa dau vakayavalati au vakasivia na tatadra ca. Dua na bogi, me vakataki ira ga na kena vo, au a yadra cake ena buno ka saga meu sa na muria na ivakasala nei Sister Neill F. Marriott, iKarua ni Daunivakasala ena Mataveiliutaki Raraba ni Goneyalewa, ena nona vosa “Yielding Our Hearts to God” (Liaona, Nove. 2015, 30–32). Au a bobo ka masu,“Tamaqu Vakalomalagi lomani, na cava meu cakava me kau tani kina na veika ca oqo mai na noqu matavuvale?”
A curumi au mai vakatotolo ka vakaukauwa na kena isau me vaka ga e dua e dolava na katuba ni uluqu ka biuta kina na vakasama o ya. A vakauqeti au na domo lailai ka rogo vinaka, “Cakava ga na ka e dodonu mo cakava. Yalodina tiko ena veikalawa yadua.” A vakasolokakanataka vei au na Yalotabu eso na ivakasala bibi, kau a vakila keu na cakava na veika o ya ena vinaka na veika kece.”
Au a dredre ka vakila ni sa katakata vinaka na lomaserequ. Sa guileca vakasauri na lomaleqa, baleta niu kila ni sa ka dina. Au sa vakila oti mada na Yalotabu, ia a sega ni kaukauwa sara me vaka na bogi o ya. Au a vakila ni sa solegi au na loloma nei Tamada Vakalomalagi kei na iVakabula, kau kila ni vakacegu kei na vakabulai ni noqu matavuvale sa ka bibi talega vei Rau me vaka vei au.
Me veivakadeitaki talega, a votu mai vei au e dua na italanoa mai na ivolanikalou—o ya na gauna a vakaroti Nifai kina na Turaga me tara e dua na waqa: “A sa vosa vei au na Turaga ka kaya ka vaka: Mo taya e dua na waqa, meu vakaleleci ira kina na nomu tamata ki na tai kadua ni wasawasa oqo ia au na vakatakila vei iko na kena icakacaka” (1 Nifai 17:8; vakamatatataki).
Sa vica na yabaki na nodratou lako voli ena lekutu o Nifai kei na nona matavuvale, ka vosota tiko na veimataqali bula dredre. A rawa vua me vakila na rerevaki ni tekivutaki e dua na ilakolako e wasawasa ka me kaukauwa cake nona rere mai na nona vakabauta. Ia a sega. A ciqoma ka muria na ivakaro ni Kalou. A vakabauta ga ni na yaco ga na veika sa yalataka o Koya. A sega ni tukuna na Turaga vei Nifai ni na sega ni yaco na cava se na sega ni roba na waqa na ua lelevu. Ia a kaya vei Nifai ni kevaka e muria na Nona ivakasala, sa na rawa me dusimaka yani ka taqomaka na nona matavuvale me kosova na wasawasa ki na vanua yalataki.
Au raica niu sa lakova talega na veilekutu ena vuqa na yabaki, ia au sa mai tu oqo e mata ni wasawasa, meu vakavakarau ki na dua na ilakolako vou: na vakamau. Au sa mai kacivi—au nanuma ni sa vakaoqo ki na matavuvale taucoko ni Yalododonu Edaidai—mera tara e dua na waqa ena ivakasala ni Kalou.
Niu sa mai vakamau kei turaga watiqu, sa yaco mai na leqa eso. Au a tauvimate, ka keirau saga me tudonu na neirau bula vakailavo ka cakava na veitovo vinaka kece keirau sa lewa oti me vakamuri.
Ia na vakasala au a ciqoma ena bogi o ya a toka ga e yaloqu. Keirau a saga ena veisiga me vulica ka karona na vosa ni Kalou e yaloi keirau, me muri na nodra ivakaraitaki vinaka na neimami iliuliu lomani—oka kina na Karisito—ka vakatorocaketaka na neirau dui itovo. A qaqaco cake sara na noqu ivakadinadina ni masu ka vakila vakaidina na loloma ni Kalou vei keirau. Sa tekivu levu cake na noqu vakanuinui ka yali na rere. Keirau raica ni veika dredre keirau sotava na yaco me ikakalawa ki na toro cake. Nikua sa vaka e dua na tiki lailai kei lomalagi na neirau itikotiko.
Keirau se tikoga ena itekitekivu ni neirau ilakolako, ia na vakamau kei na tekivutaki ni matavuvale sa digidigi vinaka duadua au se qai bau cakava. E taucoko na reki ni yaloqu niu vakasamataka na cakacaka vakalotu ni valetabu keirau sa ciqoma ka kila ni sa vauci ena lewa ni Kalou. Na levu cake ga ni noqu kila vinaka na bibi ni matavuvale ena ituvatuva nei Tamada Vakalomalagi ka sa ka tabu na veiyalayalati keirau sa cakava, na levu cake ni noqu vinakata meu vukei ira eso mera ciqoma talega na cakacaka vakalotu talega o ya.
Au sa vulica ni sega ni gadrevi meda lomaleqataka na veika ena rawa ni yaco, baleta “Ni sa sega ni solia mai vei keda na Kalou na yalo ni rere; na yalo ni kaukauwa ga, kei na yalololoma, kei na yalomatua” (2 Timoci 1:7). E vinakati ga meda talairawarawa, muria na ivakasala sa soli tu ena ivolanikalou kei na nodra vosa na parofita edaidai, ka kerea ena masu na vakalevutaki tiko ni ivakasala kivei keda yadudua. Ke da cakava na veika oqo, sa rawa meda takosova na wasawasa ni iotioti ni gauna oqo ena yalonuidei se cava ga na mataqali leqa e coqai keda, era na tiko taqomaki na noda daulomani.